Isaías
Isaíasta Tayta Dios qayashqan
6 Rey Uzías wanushqan watami Tayta Diosta rikarqä jana patsacho kuyaylapaq trönuncho jamaraykämuqta. Tsay trönunpita patsami röpanpa kuchun templu junta kaykarqan. 2 Jamaraykämushqan jananpami serafín *angilkuna kaykarqan. Tsay serafín angilkuna soqta älayuqmi karqan. Ishkay älankunawanmi qaqlanta tsapakurqan. Ishkaywanmi chakinkunata tsapakurqan. Ishkay kaqwannami pärirqan. 3 Paykunami juknin juknin kayno nirqan:
¡Lapanta mandaq TAYTA DIOSQA santumi kaykan!
¡Payqa maytsaychöpis munayniyuqmi kaykan!”
4 Tsayno nishqan mayakämuptinmi templupa punkunkunapis siksikyarqan y qoshtaynami templuman juntarqan.* 5 Tsawraqa pasaypa mantsakashqami kayno nirqä:
“¡Kananchi kananqa! ¡Kananqa wanushaqchari!
¡Lutankunata rimaq kaykarpis y manakaqkunata rimaq runakunawan qoturaq kaykarmi mandaq Reyta rikaykushqä!
¡Payqa kaykan lapanta mandaq TAYTA DIOSMI!”*
6 Tsayno parlaykaptïmi juk serafín ángel pärimurqan. Paymi *altarpita jorqamushqan rawraykaq shanshata tenäzawan apamurqan. 7 Tsay shanshata shimïman töpaykatsirmi kayno nimarqan: “Kay shanshata shimikiman töpatsiptïmi lapan jutsa rurashqaykipita perdonashqana kaykanki”.
8 Tsaypitanami TAYTA DIOS kayno parlamuqta mayarqä: “Wilakuq aywananpaq ¿pilataraq kachashaq? ¿Pilaraq wilakuqnintsi kanqa?”
Tsaymi kayno nirqä: “Kaychömi kaykä, Tayta. Noqa aywashaq”.
9 Tsayno niptïmi kayno nimarqan:
“Aywar tsay runakunata niy:
‘Mayjina mayashpaykipis manami tantiyapäkunkitsu.
Mayjina rikashpaykipis manami cuentata qokärinkitsu’.
10 “Tsay runakunapa shonqunta chukruyätsiy.
Rinrinkunatapis upayätsiy.
Nawinkunatapis qaprayätsiy.
Tsaynöpami mana rikar, mana wiyar, mana tantiyakur jutsankunata mana kacharinqatsu.*
11 Tsayno nimaptinmi kayno tapurqä: “Tayta Dios, ¿imayyaqtaq tsayno wilakushaq?”
Tapuptïmi kayno nimarqan: “Tsayno wilakunki markakuna ushakaptin ni juk runalapis wayincho mana tashqanyaq y chakrakunapis pasaypa chunyaq rikakushqanyaq. 12 Tsaynöpis wilakunki runakunata juk läduman prësu apatsishqäyaq y kay nación chipyaq ushakashqanyaq.
13 “Kay nacioncho cada chunka runakunapita juklaylapis putsuptinqa yapaymi ushakätsishaq. Tsayno kaptinpis roble yörata y encina yörata mutuptin troncun quëdashqannölami noqa akrashqä runakuna walkala quëdanqa. Troncunpita tsintsimuqnömi juk ishkay kawaykar quëdaqkunapita yapay miranqa. Tsay runakunaqa shumaqmi cäsukamanqa”.