Mateo

Casarakuy fiestaman tinkutsiypa Jesús yachatsishqan

Lucas 14.15-24

22 Mastapis tinkutsiypa yachatsirmi Jesús kayno nirqan: 2 “Tayta Dios *mandaykashqanqa casaray fiestanömi kaykan. Juk reyshi olqu tsurin casaraptin fiestata rurarqan. 3 Tsayshi ashmayninkunata kacharqan invitashqan runakunata qayamunanpaq. Qayatsiptinpis manashi aywayta munarqantsu. 4 Tsaypitashi wakin ashmayninkunatana kachar kayno nirqan: ‘Törükunata y werannin turitukunata pishtarkatsir mikuyta maynami yanukatsishqä. Lapanpis kamarishqanami kaykan. Invitashqä runakuna shamutsunna’. 5 Tsayno nir qayatsiptinpis manashi mayqanpis fiestaman aywarqantsu. Wakinshi chakran aruq aywakurqan. Wakinshi negociun rantikuq aywakurqan. 6 Wakinnashi reypa ashmayninkunata maqaykashqalancho wanutsirqan.

7 “Tsayshi reyqa fiyupa rabyakur soldädunkunata kacharqan. Chayaykurshi ashmaynin wanutsiq runakunata wanurkatsir markantapis rupatsipäkurqan. 8 Tsaypitanashi ashmayninkunata kayno nirqan: ‘Tsurï casarananpaq lapanpis kamarishqanami kaykan. Tsayno kaptinpis invitashqä runakuna manakaqman churamarmi shamushqatsu. 9 Kananqa nänikunapa ayway tarishqayki runakunata qayapäkamuy casaray fiestaman shapäkamunanpaq’.

10 “Tsayno niptinshi ashmayninkuna nänikunapa yarqur lapan tarishqan runakunata wilapäkurqan. Tsayshi ali runapis y fiyu runapis wayiman juntaqpaq fiestaman chayarqan. 11 Invitashqan runakunata rikaq yaykurshi tsay rey rikarqan juk runa trukaküni kaykaqta. 12 Tsayshi tsay runata kayno nir tapurqan: ‘Amïgu, casarakuy fiestaman invitaykaptïqa ¿imanirtaq mana trukakuylapa shamushqanki?’ Tsayno tapuptinshi tsay runa ima niytapis mana kamäpakurqantsu. 13 Tsayshi ashmayninkunata rey kayno nirqan: ‘Kay runata chakinpita y makinpita matwarkur yanawyaykaq tsakayman jitarpamuy. Tsaychömi fiyupa waqar kiruntapis uchunqa’ ”.*

14 Tsayno wilaparkurmi Jesús kayno nirqan: “Atskaqtami Tayta Dios qayashqa. Itsanqa walkaqlatami akrashqa”.

Impuestuta pägananpaq Jesústa tapushqan

Marcos 12.13-17; Lucas 20.20-26

15 Tsaypitanami *fariseukuna templupita yarqurkur wilanakurqan Jesústa imanöpapis lutanta parlatsinanpaq. 16 Tsaymi shumaq yacharkatsir fariseukuna kacharqan discïpulunkunata y Herodespa favornin sharkuq runakunata. Paykunami Jesústa kayno nirqan: “*Rabí, noqakuna musyapäkümi rasun kaqlata yachatsishqaykita. Manami runakuna alabashunaykita munartsu yachatsinki, sinöqa Tayta Dios munashqannölami. 17 Kanan tantiyaykatsilämay. Romacho mandaq *Césarpaq ¿impuestuta pägashwanku o manaku?”*

18 Lutanta parlatsinanpaq tapushqanta tantiyarmi Jesús kayno nirqan: “¡Ishkay cära runakuna! ¿Imanirtaq lutanta parlatsimayta munapäkunki? 19 Mä impuestu pägana qellayta rikatsimay”.

Tsawraqa tsararashqan qellayta Jesústa aptaparqan. 20 Tsayta rikaykurmi Jesús tapurqan kayno nir: “Kay qellaycho ¿pipa reträtuntaq kaykan? Tsaynöpis ¿pipa jutintaq qelqaraykan?”

21 Tsaymi kayno nipäkurqan: “Mandaq Césarpami”.

Tsawraqa Jesús kayno nirqan: “Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy”.*

22 Tsayno niptinmi tsay runakuna espantashqa aywakärirqan.

Wanushkuna kawarimunanpaq kashqanta Jesústa tapushqan

Marcos 12.18-27; Lucas 20.27-40

23 Tsay junaqlami *saduceukuna Jesústa tapuq aywapäkurqan. Paykunaqa manami criyipäkuntsu wanuqkuna kawarimunanpaq kashqanta.* 24 Tsaymi Jesústa tapur kayno nipäkurqan: “*Rabí, Moisés qelqashqancho kaynömi niykan: ‘Warmiyuq runa tsuriynaq wanuptin wawqinmi cuñädan viüdawan tanqa. Tsaynöpami wamrankuna kaptin tsay wanuq wawqinpa tsurinkunano kanqa’.* 25 Kanan nishayki. Juk kutishi qanchis wawqikuna karqan. Qechpa kaqshi warmita ashirqan. Payshi manaraq tsurin kaptin wanurqan. Tsayshi shulka kaq wawqinna tsay viüdawan tarqan. 26 Paypis tsurin manaraq kaptinshi wanukurqan. Tsaypita mas shulkan kaqnashi tsay viüdawan tarqan. Paypis tsurin manaraq kaptinshi wanukurqan. Tsaynölashi lapan wawqinkuna tsay viüdawan tarqan. Tsurin manaraq kaptinshi lapanpis wanukurqan. 27 Tsaypitanashi tsay viüdapis wanukurqan. 28 Wanushkuna kawarimunan junaqqa ¿mayqanpa warmintaq kanqa, qanchis wawqiwan tashqa kaykarqa?”

29 Tsayno niptinmi Jesús kayno nirqan: “Qamkunaqa lutantami yarparkaykanki. Manami Tayta Diospa palabrantapis ni Tayta Dios munayniyuq kashqantapis tantiyapäkunkitsu. 30 Kawarimurqa mananami pipis warmiyuqtsu ni runayuqtsu kanqa, sinöqa jana patsacho [Tayta Diospa] *angilninkunanölanami kanqa. 31 Wanushkuna kawarimunanpaq kashqanta ¿manaku Tayta Dios nishushqaykita liyipäkushqanki? Palabrancho kaynömi nin: 32 ‘Noqaqa Abrahampa, Isaacpa y Jacobpa Diosninmi kaykä’.* Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi”.

33 Tsayno yachatsishqanta mayaykurmi runakuna pasaypa kushikärirqan.

Mas cäsukunantsipaq kaq mandamientu

Marcos 12.28-34; Lucas 10.25-28

34 *Saduceukunata upälatsishqanta musyaykurmi *fariseukuna juntakaykur Jesús kaqman aywapäkurqan. 35 Tsaychömi ley yachatsiq juk fariseo runa Jesús yachashqanta o mana yachashqantapis musyayta munar tapurqan kayno nir: 36 “*Rabí, ¿mayqan mandamientutataq mas cäsukushwan?”

37 Tsawraqa Jesús kayno nirqan: “ ‘Tayta Diosta *kuyanki lapan shonquykiwan, lapan voluntänikiwan y lapan yarpaynikiwan’.* 38 Kay mandamientumi lapan mandamientupitapis mas cäsukunantsipaq kaykan. 39 Tsaynölami jukaq mandamientupis kayno niykan: ‘Kikiki kuyakushqaykino runa mayikita kuyanki’.* 40 Tsay ishkan mandamientuta cumplirqa Moisés qelqashqan lapan mandamientukunata y profëtakuna wilakushqantapis cumplirkaykankimi”.*

Davidpitapis Cristo mas mandaq kashqan

Marcos 12.35-37; Lucas 20.41-44

41 *Fariseukuna tsaycho juntakashqa kaykaptinmi Jesús tapurqan: 42 “Cristo ¿pï kashqantataq yarpapäkunki? ¿Pipa Tsurintaq kaykan?”

Tsayno tapuptinmi kayno nipäkurqan: “*Davidpa Tsurinmi, tayta”.*

43 Tsawraqa Jesús kayno nirqan: “Davidpa Tsurin kaptinqa ¿imanirtaq Espíritu Santu tantiyatsiptin kikin Davidpis nirqan mandaqnin rey kashqanta? Pay nishqanqa kayno nirmi qelqaraykan:

45 Kikin Davidpis mandaqnin rey kashqanta niykaptinqa ¿imanöpataq Cristuqa Davidpa Tsurin kanman?”*

46 Tsayno niptin manami pipis ima niytapis kamäpakurqantsu. Tsay junaqpita patsa manami pipis Jesústa tapupayta almitirqannatsu.