Jeremías
Israel runakunata nacionninman shuntamunanpaq nishqan
31 TAYTA DIOSMI kayno nin: “Tsay witsanmi lapan Israel aylu runakunapa Diosnin kashaq. Paykunanami kuyashqä runakuna kanqa”.
2 TAYTA DIOSMI kayno nin:
“Wanuypita qeshpiq unay Israel runakuna chunyaq jirkapa pasaptin kuyaparmi yanaparqä.
3 Promitishqä partiman aywarkaykaptin yuriparkurmi kayno nirqä:
‘Qamkunataqa imayyaqpis kuyashaykimi.
Kuyaparmi imaypis qamkunawan kaykäshaq’.
4 “Kuyashqä Israel runakuna, yapaymi yanapashayki nacionnikicho jawka kawanaykipaq.
Tsaymi panderëtata tukar danzaraykar cällikunapa kushishqa tumapäkunkipaq.
5 Samaria markacho kaq jirkankunachömi üvakunata yapay plantapäkunkipaq.
Wayushqantapis kushishqami palapäkunkipaq.*
6 Tsay witsanmi Efraín jalqakunacho rikachakuqkuna qayakunqa kayno nir:
‘TAYTA DIOSNINTSITA adoranantsipaq *Siónpa aku aywashun’ ”.
7 TAYTA DIOSMI kayno nin:
“Jacobpita miraq runakunata shuntamushqäpita kushishqa cantapäkuy.
Nacionniki wakin nacionkunapita mas ali kashqanpita kushishqa alabapäkuy.
Fuertipa kayno nipäkuy: ‘¡Kawaykar quëdaq Israel runakunataqa TAYTA DIOSMI salvashqa!’
8 Israel runakunataqa norti kaq lädu nacionpitami kutitsimushaq.
Kay patsapa kuchunpitami shuntamushaq.
Paykunawanmi kutimunqa qaprakuna, weqrukuna, qeshyaq warmikuna y iti wawayuq warmikuna.
¡Punta puntami kutipäkamunqa!
9 Noqami kä Israel runakunapa taytan.
Efraín runakunaqa* qechpa tsurïmi kaykan.
Waqaraykar aywakurkurpis kuyapaptïmi kushishqa kutipäkamunqa.
Mana yakunänanpaqmi chuya yaku kashqalanpa pushamushaq.
Mana ishkinanpaqmi ali nänilapa pushamushaq”.
10 Maytsay nacioncho taq runakuna, TAYTA DIOSPA wilakuyninta mayapäkuy.
Mayjina karucho taqkunatapis nishqanta wilapar kayno nipäkuy:
“Israel runakunata maytsayman qarqushqanpitami shuntamushaq.
Uyshankunata ämun shuntaqnömi lapanta shuntarkamur rikashaq.
11 Jacobpita miraqkunatami* contrankunapita salvashaq.
Paykunataqa munayniyuq nacionpa makinpitami jorqamushaq.*
12 Kutiykamurmi Sión jirkanman witsarkur kushishqa cantapäkunqa.
Bendicionnïta churamuptïmi mikuypis, vïnupis, aceitipis, uyshapis y wäkapis tsaytsika kanqa.
Tashqan parti parquna huertano kaptinmi imapis mana pishinqanatsu.
13 Kushikushpanmi jipashkunapis, mözukunapis y awkinkunapis qatswapäkunqa.
Mana lakikuypa kushishqa kawananpaqmi consulashaq.
14 Ali alilata mikunanpaqmi cürakunatapis kamaripäshaq.
Kuyashqä runakunataqa lapan nistashqankunatami kamaripäshaq.
Noqa TAYTA DIOSMI tsayno nï”.
Lakikushqanpita Raquel kushikunanpaq nishqan
15 TAYTA DIOSMI kayno nin:
“Ramá markacho lakikur ataypa atar waqashqanmi mayakaykämun.
Lakikur fiyupa qaparashqanmi mayakaykämun.
Tsayqa Raquel waqashqanmi kaykan.
Payqa wawankunapaqmi fiyupa waqaykan.*
Wawankuna wanushqanpitami shoqaptinpis mana chawaypa waqaykan”.* *
16 TAYTA DIOSMI kayno nin:
“Raquel, amana waqaynatsu.
Weqikita amana jichaynatsu.
Contrayki nacionpita wawaykikuna kutimunqami.
Kanan lakikurpis kutimuptinqa kushikunkipaqmi.
Noqa TAYTA DIOSMI tsayno nï.
17 Tsaymi shamuq watakunacho wawaykikuna nacionninman kutimuptin kushikunkipaq.
Noqa TAYTA DIOSMI tsayno nï.
18 “Mayashqämi Efraín runakuna* lakikur kayno manakamashqanta:
‘Qela töruta wiruqnömi pasaypa castigapäkamashqanki.
Tsayno castigamarpis qammi noqakunapa TAYTA DIOSNÏQA kaykanki.
Yapay shuntamaptikiqa cäsukärishaykimi, Tayta.
19 Mana cäsukuq kapäkushqäpitami penqakärï.
Jutsata rurashqäkunata tantiyakurmi perdonta manakärimü.
Mözu kar jutsata rurashqäkunapita penqakurmi pasaypa lakishqa uysurpäkü’.
20 “Efraín runakunaqa kuyashqä wamräkunami kaykan.
Paykunata rikar pasaypami kushikü.
Olqüpaykurpis paykunataqa yarparaykämi.
Paykunapaq yarparaptïmi shonqüpis pasaypa nanan.
Paykunataqa imaypis kuyapäshaqmi.
Noqa TAYTA DIOSMI tsayno nï.
21 “Kuyashqä Israel runakuna, may nänipa aywashqaykitapis shumaq tantiyakäriy.
Tsay nänilapana markaykikunaman kutikamuy.
22 ¡Imayyaqraq mana cäsukuq jipashno purikärinki!
Nacionnikiman kutipäkamunaykipaqmi kay patsacho imaypis mana rikashqayki kaqta rurashaq.
Tsayqa espantaypaq kanqa runata ashinanpaq jipash yaykushqan espantaypaq kashqannömi”.
23 Israel runakunata kuyaq y lapanta mandaq TAYTA DIOS kaynömi nin: “Nacionninman Judá runakunata shuntamuptïmi markankunachöna tanqapaq. Yanapashqäpita kushikurmi kayno nipäkunqa: ‘¡Templu kashqan *sagrädu jirkanman TAYTA DIOS bendicionninta churaykulätsun! ¡Tsaychömi Tayta Dios munashqannöna pïmaypis kawaykan!’
24 “Judá runakuna nacionnincho yapay taptinmi markacho taqkunapis, chakracho aruqkunapis y uysha mitsiqkunapis tsaycho jawkana tanqapaq. 25 Qelanaykaqkunatapis kalpata qoshaqmi. Lakishqa kaykaqkunatapis shakyätsishaqmi”.
26 Tayta Dios tsayno niykämaptinmi rikcharkamurqä. Tsayta sueñuykurmi fiyupa kushikurqä.
27 TAYTA DIOSMI kayno nin: “Tiempu chayamunqami Judácho y Israelcho runakunapis y uywakunapis atskaman mirapäkunanpaq. 28 Nawpataqa qewata lukiriqno, wayita juchutsiqno y qanrata jitariqnömi paykunata qarqurqä. Kananqa wayita sharkatsiqno y plantata plantaqnömi paykunata shumaq yanapashaq. Noqa TAYTA DIOSMI tsayno nï.
29 “Tsay witsanqa runakuna mananami kayno nipäkunqanatsu: ‘Taytankuna pochquq üvata mikuptin tsurinkunapa kirunkunami shimpan’.* 30 Tsaypa trukanqa pochquq üvata mikuqpa kirun shimpashqannömi jutsa ruraqkuna kikinkuna wanupäkunqa”.*
Mushuq pactuta rurananpaq nishqan
31 TAYTA DIOSMI kayno nin:
“Junaqkuna chayaykämunnami Israel runakunawan y Judá runakunawan mushuq *pactuta ruranäpaq.*
32 Tsay pactuqa manami unay aylunkunata Egiptupita jorqamur rurashqä pactunötsu kanqa.
Warminta runa kuyashqanno kuyaykaptïmi unay aylunkunaqa tsay pactuta mana cumplishqatsu.
Noqa TAYTA DIOSMI tsayno nï.
33 “Tsay junaqkuna pasarkuptinmi Israel runakunawan pactuta rurashaq.
Tsayno rurarmi leynïkunata yarpayninkunaman churashaq.
Shonqunkunamanmi leynïkunata qelqashaq.
Paykunapa Diosninmi kashaq.
Paykunanami kuyashqä runakuna kanqa.*
Noqa TAYTA DIOSMI tsayno nï.
34 “Tsay witsanqa waktsapis rïcupis lapanmi *reqipäkamanqa.
Tsaymi runa mayinta ni wawqinta pipis mana yätsinqatsu reqimänanpaq.
Paykunapa lapan jutsankunatapis perdonashaqmi.
Ima jutsata rurashqantapis manami yarparäshaqnatsu.*
Noqa TAYTA DIOSMI tsayno nï”.
35 TAYTA DIOSMI kamarqan intita junaqpa atsikyänanpaq.
Tsaynölami killata y qoylarkunata kamarqan tsakaypa atsikyänanpaq.
Paymi kamakätsin lamarpis pulchaqyar qaparänanpaq.
Paypa jutinqa lapanta mandaq *Yahwehmi kaykan.
36 Tsaymi TAYTA DIOS kayno nin:
“Tsay lapan kamashqäkuna mana ushakashqannömi Israel runakunapis mana ushakanqatsu.*
37 Jana patsata manami pipis tupuyta kamäpakuntsu.
Patsapa cimientuntapis manami pipis rikashqatsu.
Tsaynölami mana alita rurashqa kaptinpis Israel runakunataqa mana kacharishaqtsu.
Noqa TAYTA DIOSMI tsayno nï”.
38 TAYTA DIOSMI kayno nin: “Tiempu chayamunqami Jerusalén markata Hananeel törripita qalaykur Esquïna Punku nishqanyaq noqapa jutïcho altsapäkunanpaq. 39 Tsay punkupita cordilwan tupurkurmi Gareb puytukshu jirkanyaq perqapäkunqa. Tsaypitami tumarämunqa Goa partiman. 40 Aya pampanan y uchpa jitakuna raqrapis Jerusalén markä rurinchönami kanqa. Tsaynölami Cedrón raqrapa nawpan chakrakuna hasta Cawallukuna jutiyuq punku tsimpanyaq *santu Jerusalén marka kanqa. Jerusaléntaqa manami imaypis juchutsinqanatsu ni ushakätsinqanatsu”.