Ezequiel
Israel runakuna ali kawananpaq nishqan
36 “Runapa tsurin, Israel jirkakunata kayno niy: ‘Israelcho kaykaq jirkakuna, TAYTA DIOS nishqanta mayapäkuy. 2 TAYTA DIOSMI kayno nin: Contraykikunami kayno nirkaykan: “Kananmi itsanqa Israelcho kaykaq jirkakunapis noqantsipana kaykan”.
3 “ ‘Tsaymi noqa TAYTA DIOS kayno nï: Rasunpami wakpita kaypita contraykikuna shamur pasaypa ushakätsishushqanki. Tsaynöpami jäpa runakuna duëñu tukushushqanki. Qamkunata ashlishushpaykimi manakaqman churashushqanki.
4 “ ‘Noqa TAYTA DIOSMI kayno nï: Israelcho kaykaq jirkakunapis, jirkankunapis, mayukunapis y raqrakunapis, niykashqäta mayapäkamay. Rasunpami Israelcho kaykaq markakuna pipis mana taptin raqälana kaykan. Tsaynöpis juk nación runakuna Israel runakunata vincishpanmi imaykantapis apakärishqa. Tsaymi nawpaykicho kaq nacionkunapis kushipäshushqanki. 5 Tsayno kaykaptinpis noqa TAYTA DIOSMI fiyupa rabyashpä tsay nacionkunapa contran y Edom nación runakunapa contran kaykä. Tsay runakuna fiyupa kushikushpan y manakaqman churashpanmi kuyashqä nacionnïta duëñu tukärishqa’ ”.
6 Tsaypitanami mastapis Ezequielta Tayta Dios kayno nirqan: “Israelcho kaq jirkakunata, jirkankunata, raqrakunata y pampakunata noqapa jutïcho wilapar kayno ninki: ‘TAYTA DIOSMI kayno nin: Juk lädu nación runakuna Israel runakunata manakaqta tumpashqanpitami fiyupa rabyashqa kaykä. 7 Tsaymi makïta joqarkur jurashpä kayno nï: Tsay nación runakunatapis contran runakunami manakaqman churar ashlipäkunqa.
8 “ ‘Israel jirkakuna, Israel runakuna kutimunanpaqnami karkaykan. Qamkunachöqa jatusaq copösu yörakunami winanqa. Tsay yörakunapa wayuynintami Israel runakuna kutimur mikupäkunqa. 9 Qamkunaman bendicionnïta churamuptïmi murukurna kawapäkunqa. 10 Tsaymi intëru Israel nacioncho runakuna tsaytsikaman mirapäkunqa. Ushakätsishqa chunyaq markakunachöpis yapaymi tanqa. Juchutsishqa markakunatapis yapaymi sharkatsipäkunqa. 11 Runakunapis y uywakunapis mirarmi unay kashqanno yapay tsaytsika kanqa. Puntata kawashqanpitapis mas alimi kawapäkunqa. Tsayraqmi TAYTA DIOS kashqäta musyapäkunqa.
12 “ ‘Israel jirkakuna, janaykipami kuyashqä Israel runakuna yapay puripäkunqa. Paykunapa herencianmi karkaykanki. Wamrankunatapis manami yapay mikunkipaqnatsu’.
13 “TAYTA DIOSMI kayno nin: ‘Juk lädu nación runakunami manakaqman churashushpayki kayno nirkaykan: “Israel jirkakunaqa runa mikuq y wamrakunata wanutsiqmi karkaykan”.
14 “ ‘Tsayno nipäkuptinpis kananpitaqa mananami imaypis runakunata mikupäkunkinatsu ni wamrankunatapis wanutsipäkunkinatsu. 15 Jäpa nación runakuna ashlishunaykita manami kachapäshaqnatsu. Tsaynöpis mananami wamrakunata mikupäkunkinatsu’. TAYTA DIOSMI tsayno nin”.
16 TAYTA DIOSMI kayno nimarqan: 17 “Runapa tsurin, Israel runakuna jutsata rurashpanmi tashqan nacionninta *impüruyätsishqa. Warmipa killa qeshyan impüru kashqannömi paykuna rurashqanpis pasaypa impüru kaykan. 18 Runakunata wanutsir y ïdulukunatapis adorashpanmi nacionninta impüruyätsishqa. Tsayno rurashqanpitami fiyupa rabyashpä castigarqä. 19 Tsaymi paykunata qarqur juk lädu nacionkunacho markakunamanpis mashtakätsirqä. Jutsata rurashqanman tupumi castigarqä.
20 “Qarquptï maymanpis chayashqan markakunachömi runakuna kayno nipäkuq: ‘Kay runakuna adorashqan Diosqa manami kuyashqan runakunata tsapayta kamäpakushqatsu. Tsaymi nacionninpita qarqushqa’. Tsayno nirmi *santu jutïta manakaqman churapäkushqa. 21 Israel runakuna maymanpis chayashqancho santu jutïta manakaqman churaptinmi pasaypa lakikü.
22 “Tsayno kashqanpita Israel runakunata kayno ninki: ‘TAYTA DIOSMI kayno nin: Israel runakuna, jutsata rurashqaykipitami maytsay nacionchöpis runakuna manakaqman churapäkaman. Tsayno kaykaptinpis manami qamkuna raykutsu tsay nacionkunapita shuntamushayki, sinöqa santu jutï raykumi. 23 Jutïta manakaqman churapäkunanpaq qamkunami jutsayuq karkaykanki. Tsayno kaptinpis qamkunata jorqamurmi jutï santu kashqanta tsay nación runakunata musyatsishaq. Munayniyuq TAYTA DIOS kashqäta musyapäkunanpaqmi lapan runakuna rikananpaq jorqamushayki’. TAYTA DIOSMI tsayno nin.
24 “ ‘Tsay nacionkunapita noqami jorqamushayki. Jäpa markakunapita shuntarkamurmi kikikikunapa nacionnikiman kutitsimushayki. 25 Chuya yakuwanmi maylapäshayki. Qanraykikunata chipyaqmi awipäshayki. Ïdulukunata adorar impüru kapäkushqaykitapis maylapäshaykimi.
26 “ ‘Nirkurmi mushuq shonquta y mushuq espïrituta qamkunaman churamushaq. Mana cäsukuq rumi shonquykitapis cäsukuq ali shonqumanmi tikratsishaq. 27 Yanapashunaykipaqmi Espïritüta qamkunaman kachamushaq. Tsaynöpami leynïkunata y yachatsishqäkunata cumplir kawapäkunkipaq.* 28 Unay ayluykikunata qoykushqä nacionchömi täpäkunki. Qamkunami kuyashqä runakuna kankipaq. Noqanami qamkunapa Diosniki kashaq.*
29 “ ‘Jutsata mana ruranaykipaqmi yanapashayki. Tsaynöpis trïguta ali wayutsimuptïmi muchuypis ni yarqaypis mana kanqanatsu. 30 Tsaynölami tukuy casta frütakunata y chakrakunacho mikuykunatapis ali wayutsimushaq. Tsaymi imaypis mana yarqankinatsu ni juk lädu nación runakunapis penqayman churapäkushunkinatsu. 31 Tsayraqmi mana alita rurashqaykipita, fiyu kashqaykipita y melanaypaq jutsata rurashqaykipita penqakärinkipaq.
32 “ ‘TAYTA DIOSMI kayno nin: Israel runakuna, shumaq tantiyakäriy. Manami qamkuna raykutsu juk lädu nacionkunapita shuntamushayki, sinöqa santu jutï raykumi. Tsaymi qamkunaqa jutsa rurashqaykikunapita pasaypa penqakur uysurpankipaq.
33 “ ‘TAYTA DIOSMI kayno nin: Jutsa rurashqaykikunata maylarkurmi kutitsimushayki. Tsaychömi juchushqa kaykaq markaykikunata sharkatsir yapay tankipaq. 34 Purunyashqa chakrakunata yapay murupäkuptiki pïmaypis pasaq runakuna rikar 35 kushishqa kayno nipäkunqa: “Kay chakrakunaqa purunyashqami karqan. Kananqa Edén* huertanömi kuyaylapaq kaykan. Chipyaq ushakashqa, chunyaq y raqälana markakunapis ali murallashqa markanami kaykan”.
36 “ ‘Tsaynöpami nawpan nacionkunacho kawaykar quëdaq runakuna tantiyapäkunqa chipyaq ushakashqa kaykaptinpis noqa TAYTA DIOS yapay sharkatsishqäta. Tsaynöpis tantiyapäkunqa qara chakrakunatapis ali chakraman tikratsishqäta. Noqa TAYTA DIOSMI tsayno nï. Nishqätaqa cumplishaqmi.
37 “ ‘TAYTA DIOSMI kayno nin: Israel runakuna ruwakamashqanta wiyashpämi uyshanöraq tsaytsikaman mirananpaq kamakätsishaq. 38 Fiesta kaptin Jerusaléncho sacrificiupaq tsaytsika uyshakuna unay kashqannömi tsay markakunacho tsaytsika runakuna täpäkunqa. Israel nacioncho juchutsishqa markakunachöpis tsaytsika runakunami täpäkunqa. Tsayraqmi TAYTA DIOS kashqäta musyapäkunqa’ ”.