Deuteronomio
Runakuna amparakunapaq markakunata akrananpaq tantiyatsishqan
19 “Qoykushunaykipaq kaq nacioncho taq runakunata TAYTA DIOS ushakarkatsiptin paykunapa markankunacho y wayinkunacho qamkunanami tankipaq. 2 Tsay nacioncho tashpayki kimsa markakunata akrapäkunki.* 3 Tsay markakuna kanqa runa mayinta wanutsiq runa qeshpir amparakunanpaqmi. Tsay kimsa markakunata akranaykipaqqa TAYTA DIOS qoykushunaykipaq kaykaq nacionnikita kimsaman rakinki. Nirkur cada particho juk markata akrapäkunki. Tsay markakunaman aywaq nänikunatapis shumaq altsapäkunki.
4 “Contran mana kaykar wanutsiq runa amparakuna markaman qeshpiptinmi venganzata ashirpis payta mana wanutsinqatsu. 5 Tsayno kaptinqa yantata mutuykaptin makinpita hächa yarqukar runata wanutsiptinqa amparakuna markaman qeshpir aywakunqa.
6 “Amparakuna markaqa manami aläpa karuchötsu kanman. Aläpa karu kaptinqa wanuq runapa aylunkuna rabyashqa taripaykur wanutsinqapaq. Mana yarpaypa wanutsiq runakunataqa ama wanutsipäkutsuntsu. 7 Tsayno mana wanutsipäkunanpaq kimsa markakunata akrapäkunki amparakunanpaq.
8 “Lapan tantiyatsishqä mandamientunkunata cumplir TAYTA DIOSTA *kuyar munashqanno imaypis kawaptikimi unay ayluntsikunata promitishqanno nacionnikipa lindërunta jatunyätsinqa. Tsayno jatunyätsiptinqa kimsa amparakunan markakuna kaykashqan jananman kimsa masta akrapäkunki. 9 - 10 Amparakuna marka soqta kaptinmi runa mayinta mana yarpaypa wanutsiq runa mayqan markamanpis qeshpikunanpaq cerca kanqa. Tsaynöpami TAYTA DIOS qoykushunaykipaq kaq nacioncho tsay qeshpiq runata mana wanutsipäkunqatsu. Payta wanutsirqa jutsayuqmi kanqapaq.
11 “Pipis runa mayinta chikipashpan wanurkatsir amparakuna markaman qeshpiptinqa 12 tsay runapa markanpita mayor runakuna aywaykurmi apatsimunqa. Nirkurmi wanuq runapa aylunkunaman entreganqa wanutsipäkunanpaq. 13 Tsay niraq runataqa mana kuyapaypa wanutsipäkunqa. Tsaynöpami Israel nacioncho runakuna tantiyakur runa mayinta mana wanutsipäkunqatsu. Wanutsikuq runa manana kaptinqa jawkanami kawapäkunkipaq.
14 “TAYTA DIOS qoykushunaykipaq kaykaq nacioncho tashpayki vecïnuykipa lindërunkunata respitapäkunki. Unay ayluykikuna posisionta chaskir mujunninpaq jawishqan wankakunataqa ama wititsinkitsu.*
Testïgukuna ishkay o kimsa kananpaq nishqan
15 “Ishkay o kimsa testïgukuna careaptinraqmi pipis jutsayuq kashqan musyakanqa. Runata wanutsishqanta o imatapis lutanta rurashqanta juk runala niptinqa manami välinqatsu.*
16 “Pipis chikipashpan imatapis manakaqta jitapaptinqa 17 jitapaqpis y jaqatsashqan runapis ishkanmi aywapäkunqa TAYTA DIOSPA nawpancho kaykaq cürakunaman y juezkunaman. 18 Tsaychömi juezkuna shumaq tapupakunqa* rasunpa kashqanta o mana rasunpa kashqantapis musyananpaq. Testïgu lulakushqanta tariparqa 19 jitapaq runa castigatsiyta yarpashqannölami kikintapis castigapäkunqa. Tsaynöpami mana ali ruraykuna qamkunacho mana kanqatsu.* 20 Manakaqta jitapaykaq runata castigashqanta musyarmi wakin runakunapis mantsakur manakaqta pitapis mana jitapanqanatsu.
21 “Jutsayuq kaqtaqa mana kuyapaypa castigapäkunki. Pipis runa mayinta wanutsiptinqa kikintapis wanutsipäkunki. Nawinta jorquptinqa kikinpa nawintapis jorqapäkunki. Kirunta jorquptinqa kikinpa kiruntapis jorqapäkunki.* Makinta pakiptinqa kikinpa makintapis pakipäkunki. Tsaynöla chakinta pakiptinqa kikinpa chakintapis pakipäkunki.*