Éxodo
Tayta Diosta Israel runakuna promitishqan
24 Moisésta TAYTA DIOS kayno nirqan: “Aarónta, Nadabta, Abiúta y mas qanchis chunka (70) Israel mayor runakunata pushakurkur noqa kaykashqä puntaman witsämunki. Paykunaqa manaraq chayamur karulacho qonqurpakärinqa. 2 Tsaypita mastaqa noqa kaqman ama witimunqatsu. Paykunata tsaycho kachaykamur japalayki witsämunki”.
3 Tsayno niptinmi puntapita Moisés kutiykur TAYTA DIOS nishqankunata y leyninkunatapis runakunata wilarqan. Tsaymi lapan kayno nipäkurqan: “Lapantami cumplipäkushaq TAYTA DIOS nishqankunataqa”.*
4 Awnipäkuptinmi TAYTA DIOS nishqankunata Moisés lapanta qelqarqan. Tsaypita jukaqnin tutanami tsaka tsakala jirka chakincho *altarta perqarqan. Nirkur Israel runakunapa trïbunkuna chunka ishkay kaptin chunka ishkay wankakunata ichitsirqan. 5 Tsaypitana mözukunata nirqan törukunata pishtarkur rupatsina sacrificiuta y jawka kawakuy sacrificiuta rupatsipäkunanpaq.
6 Törukunata pishtaptinmi yawarninta matikunaman Moisés chaskirkur altarman pulanta tsaqtsurqan. 7 Tsaypitanami *Pactu Libruta runakunata liyiparqan. Tsayta mayarmi kayno nipäkurqan: “TAYTA DIOS nishqankunataqa lapantami cumplipäkushaq”.
8 Tsayno awnipäkuptinmi Moisésqa matikunaman chaskishqan yawarta runakunapa jananman tsaqtsupar kayno nirqan: “Kay yawarqa noqantsiwan TAYTA DIOS *pactuta rurashqan yawarmi kaykan.* Mandamientunkunata y leyninkunata qomashpantsimi noqantsiwan pactuta ruraykan”.*
9 Tsaypitanami Sinaí jirkaman witsarqan Moisés, Aarón, Nadab, Abiú y qanchis chunka (70) Israel mayor runakuna. 10 Tsaychömi rikapäkurqan yärakushqan Tayta Diosta. Chakin jarurashqanchömi zafiro rumipita rurashqanno chipchipyaykaq kaykarqan. Colorninpis ciëlu niraqmi karqan. 11 Tayta Diosta rikarpis tsay mayor runakuna manami wanupäkurqantsu. Tsaychömi mikupäkurqan y upupäkurqan.
Sinaí jirkacho chunka mandamientukunata Moisés chaskishqan
12 Moisésta TAYTA DIOS kayno nirqan: “Jirka puntaman witsarkamur shuyämay. Tsaychömi läja rumicho qelqashqä leykunata y mandamientukunata entregashaykipaq. Tsaytami Israel runakunata yachatsinkipaq”.
13 Tsayno niptinmi Tayta Dios kaykashqan puntaman Moisés witsarqan yanapaqnin Josuéwan. 14 Manaraq aywarmi mayor runakunata kayno nirqan: “Kaylacho shuyarpaykämanki noqakuna kutimunäyaq. Qamkunawanmi Aarón y Hur quëdanqa. Imapis kaptinqa paykunaman quejakärinki arreglashunaykipaq”.
15 Tsayno nirkur jirkaman Moisés chayaykuptinmi jirkata pukutay tsapakurkurqan. 16 Soqta junaqmi Sinaí jirkata pukutay tsapararqan. Tsay pukutaypitami TAYTA DIOSPA chipchipyayninpis rikakämurqan. Qanchis kaq junaqchönami pukutay rurinpita Moisésta TAYTA DIOS qayarqan. 17 TAYTA DIOSPA chipchipyaynintami Israel runakuna rikarqan nina bunyaypa bunyar rupaykaqtano. 18 Moisésta TAYTA DIOS qayamuptinmi puntaman witsashpan pukutay rurinman yaykurqan. Tsay puntachömi chusku chunka (40) junaq y chusku chunka paqas qoyämurqan.*