Habacuc
2 Rikachakuna törricho marka täpaq runa mayaq mayaqla kashqannömi noqapis mayaq mayaqla shuyaraykä manakushqäta TAYTA DIOS contestamänanta.
Habacuc yapay manakushqanta Tayta Dios contestashqan
2 Tsaymi TAYTA DIOS kayno nimarqan:
“Pipis mana pantaypa liyinanpaq taksha tablacho revelashqäta shumaq qelqanki.
3 Tsay revelashqäqa tiempun chayamuptinraqmi cumplinqapaq.
Jukla mana cumpliptinpis mana ajayaypa shuyaray.
Imay karpis kamakanqami.
Höran chayamuptinqa lapanpis nishqänölami kanqa.*
4 “Tsay runakunaqa orgullösu karmi kalpalanman yärakärin.
Paykunaqa mana alikunatami rurapäkun.
Munashqäno kawaq runaqa noqaman yärakamarmi kawanqa”.*
Fiyu runakunata Tayta Dios ushakätsinanpaq nishqan
5 Orgullösu runakunaqa imaykayuqpis kayta munarmi* jamaytapis mana taripäkuntsu.
Imaykan kaptinpis ali kawayta manami taripäkuntsu.
Munayniyuq kayta munarmi ayata sepultüra chaskiypa chaskishqanno runakunata usharkaykan.
Tsaymi juk markata juk markata atacar asularkaykan.
6 Tsay vincishqan runakunami vinciqninkunata manakaqman churashpan kayno nipäkunqa:
“¡Wawalaw! ¡Qamkunaqa runakunapa imaykantapis qechushqaykiwanmi pasaypa rïcuyaykanki!
¡Imayyaqraq suwakuylapa rïcuyarkaykanki!
7 Nakatsishqayki runakuna wanutsipäkushunaykipaq elaqpita chayamuptinmi mantsariywan siksikyapäkunkipaq.
Lapan imaykitapis apakuptinmi qarapächula rikakunkipaq.
8 Atska markakunapa imaykantapis apakärishqaykipitami tsaytsika soldädukuna shamur qamkunapa imaykaykikunatapis apakärinqapaq.
Tsayno rurashunkipaq nacionnïman shamur may markachöpis wanutsipäkushqaykipita y mana alikunata rurapäkushqaykipitami.
9 “¡Wawalaw! Qamkunaqa runapa imaykantapis rïcuyänaykipaq suwapaykanki.
Tsayno rïcuyar yarparkaykanki imapis mana pasashunaykipaq kashqanta.
10 Tsayno rurashqaykipitami qamkuna y ayluykikuna penqapaypaq kankipaq.
Atska markakunata ushakätsishqaykipitami kikikikunatapis ushakätsishunkipaq.
11 Lutanta rurashqaykitami wayipa perqankunacho kaykaq rumikunapis y terrädukunapis careashunkipaq.
12 “¡Wawalaw! Qamkunaqa runakunata wanutsir imaykantapis apakushqalaykiwanmi markaykikunata sharkatsishqanki.*
13 Tsayno kashqaykipitami lapanta mandaq TAYTA DIOS lapan sharkatsishqaykita ninawan ushakätsinqa.
Ushakätsiptinmi lapan arupäkushqaykipis manakaqlapaq kanqa.
14 Lamarcho yaku junta kashqannömi TAYTA DIOSTA *reqiqkunapis kay patsacho junta kanqa.*
15 “¡Wawalaw! Qamkunaqa vecïnuyki markakunata vincir penqaymanmi churarkaykanki.
Qarapächu kaykaqta rikananpaq runa mayinta shinkatsiqnömi karkaykanki.
16 Tsayno rurapäkushqaykipitami respitädu kanaykipa trukanqa penqaypaq kapäkunkipaq.
TAYTA DIOSPA castïgun winaraykaq cöpapita upuptikimi kikikitapis qarapachashunkipaq.
Kanan munayniyuq karpis wara warantin kuyapaypaqmi kapäkunkipaq.*
17 Líbanuman aywaykur yörakunata ushar tsaycho taq uywakunata wanutsipäkushqaykipitami kikikikunatapis Tayta Dios mana kuyapaypa wanutsishunkipaq.
Runakunata may markachöpis wanutsishqaykipitami pasaypa nakapäkunkipaq.
18 “Qeruta laqlaykur rurashqan ïdulukuna ¿imapaqraq välin?
Runata engañanalanpaq kaptinqa ¿imapaqraq välin metalkunata fundiykur ïduluta rurashqan?
Shimin kaptinpis manami rimakuntsu.
¡Imanöpataq kikin ruraqpis tsayman yärakunman!
19 “¡Wawalaw! Qamkunaqa qerupita rurashqan ïdulutami ‘rikchay’ nirkaykanki.
Tsaynöpis rumipita rurashqan ïdulutami ‘sharkuy’ nirkaykanki.
Tsay ïdulukunaqa manami imatapis musyatsishunkitsu.
Qoriwan y qellaywan enchapashqala karpis manami kawapäkuntsu.
20 TAYTA DIOSQA *sagrädu templunchömi kaykan.
Paypa nawpancho lapan runakuna maytsaychöpis upälakäritsun”.*