Job
Job nakashqan
1 Uz partichömi juk runa tarqan Job jutiyuq.* Payqa lapan shonqunwan alita rurar Tayta Diosta *mantsakurmi kawarqan. Manami ima jutsatapis rurarqantsu. 2 Tsurinkunami karqan kimsa warmi y qanchis olqu. 3 Uyshankunami karqan qanchis waranqa (7,000), *camëllunkunami karqan kimsa waranqa (3,000), törunkunami karqan pitsqa pachak (500), bürrunkunami karqan pitsqa pachak (500) y ashmayninkunapis atskami karqan. Tashqan kaqchöqa lapanpitapis mas rïcu y respitashqami karqan.
4 Jobpa olqu tsurinkunami tumanakuypa qayatsinakur wayinkunaman juntakaykur mikupäkuq. Tsaymanmi kimsan paninkunatapis qayatsiq mikur upur qoyäpäkunanpaq. 5 Tsawraqa mikuyta usharkuptinnami Jobqa tsurinkunata qayatsirqan paykunapaq Tayta Diosta perdonta manakunanpaq. Tutala sharkurkurmi tsurinkunapa jutincho sacrificiuta rupatsirqan kayno nishpan: “Capazchari tsurïkunaqa jutsatapis rurashqa. Tsaynöpis capazchari Tayta Diospa contranpis shonquncho yarpapäkushqa”.
6 Juk kutimi TAYTA DIOSPA nawpanman *angilkuna chayapäkurqan. Tsaymanmi *Satanáspis chayarqan.* 7 Tsaymi Satanásta TAYTA DIOS kayno tapurqan: “¿Maypitataq shamushqanki?”
Tsaymi kayno nirqan: “Intëru patsata rikapakur purimushqäpitami shamushqä”.
8 Tsawraqa TAYTA DIOS kayno nirqan: “Sirvimaqnï Job noqa munashqäno kawashqanta ¿rikashqankiku? Paynöqa manami pipis kantsu ali ruraq, munashqäno kawaq, ali sirvimaq y jutsatapis mana ruraq”.
9 Tsayno niptinmi Satanás kayno nirqan: “Manami dembaldilatsu Jobqa sirvishunki. 10 Pipis yatananta mana munarmi aylunkunata y imaykankunatapis tsapaykanki. Tsaynöpis murushqankunamanmi bendicionta churaykanki. Tsaymi lapan runakunapitapis mas atska uywayuq kaykan. 11 Kanan maski imaykantapis qechuy. Qechuptikiqa contraykimi imaykatapis rimanqa”.
12 Tsawraqa Satanásta TAYTA DIOS kayno nirqan: “Lapan imaykantapis makikimanmi kachaykü. Kikinta itsanqa yataylapis ama yataykuytsu”.
Tsayno niptinmi TAYTA DIOSPA nawpanpita yarqur Satanás aywakurqan.
13 Tsaypitanami juk kuticho Jobpa lapan tsurinkuna mikur y upur karkaykarqan mayor wawqinpa wayincho. 14 Tsayno karkaykaptinmi juk ashmaynin Job kaqman chayaykur kayno nir wilarqan: “Töruykikunawan arurkaykaptïmi y bürruykikunata tsaycho mitsirkaykaptin 15 elaqpita sabeo runakuna ashmaynikikunata espädawan wanurkatsir uywaykikunata apakärishqa. Noqalami qeshpimushqä wilanäpaq”.
16 Tsayno wilapaykaptinmi juk ashmayninpis chayaykur kayno nir Jobta wilarqan: “Räyumi lapan uyshaykikunata y mitsikuqnikikunatapis chipyaq wanutsishqa. Noqalami qeshpimushqä wilanäpaq”.
17 Manaraq wilayta ushaptinmi juk ashmayninpis chayaykur Jobta kayno nir wilarqan: “Kimsa punta caldeo runakuna shamurmi lapan camëlluykikunata apakärishqa. Nirkurmi ashmaynikikunatapis espädawan wanutsipäkushqa. Noqalami qeshpimushqä wilanäpaq”.
18 Tsayno wilapaykaptinmi juk ashmaypis chayaykur kayno nirqan: “Olqu tsurikikuna y warmi tsurikikuna mayor tsurikipa wayincho mikur upur fiestata rurarkaykaptinmi 19 shukukuy wayra chunyaq jirkapita shamur wayita juchutsir lapan tsurikikunata wanutsishqa. Noqalami qeshpimushqä wilanäpaq”.
20 Tsawraqa Job pasaypa lakikushpan röpanta rachirqan y aqtsantapis rutukurqan. Nirkurmi pampaman lätakuykur Tayta Diosta adorashpan 21 kayno nirqan:
“Mamäpa pachanpita qarapächula yurishqänölami wanurpis qarapächula aywakushaq.
TAYTA DIOSMI lapantapis kamaripämashqa.
Tsaynölami lapantapis qechumashqa.
TAYTA DIOS alabashqa kaykulätsun”.
22 Tsaykuna pasaptinpis Jobqa manami jutsata rurarqantsu ni Tayta Diospa contran rimarqantsu.