1 Timoteo

Mayor wawqikuna imano kananpaq nishqan

3 *Mayor wawqi kayta munaqkunaqa alitami yarparkaykan. Tsay nishqäqa rasun kaqmi kaykan. 2 Mayor wawqikuna kanman pipitapis mana jamurpashqa, juk warmiyuqla, shumaq tantiyakuq, shumaq yarpachakurir imatapis ruraq, pïmaypitapis respitashqa, patsatsikuq y shumaq yachatsikuq. 3 Tsaynöpis kanman mana upyaq, pitapis achäquita mana ashipaq, kuyapäkuq, qellaylapaq mana wanuq 4 y warminta y tsurinkunata shumaq ashmaq. Tsaynöpis tsurinkunata yachatsinman cäsukuq y respitakuq kananpaq. 5 Wayincho taqkunata shumaq mana yachatsirqa ¿imanöparaq Tayta Diosman yärakuqkunata yachatsinman?

6 Jesucristuman tsayraq yärakuqkunaqa manami mayor wawqi kanmantsu. Yachaq tukurqa diablu maldicionashqa kashqannömi paykunapis maldicionashqa kanqa.

7 Jesucristuta mana chaskikuq runakunapis rikakärinanpaq mayor wawqikuna ali kawapäkutsun. Ali kawaptinqa paykunapaq manami pipis rimarkaykanqanatsu ni diablupis toqlanman* ishkitsinqatsu.*

Diäcunukuna imano kananpaq kashqanpis

8 Tsaynöpis *diäcunukuna kanman respitashqa, imatapis awnishqanta cumpliq, mana upyaq y rïcu kayta munar mana sakyapakuq. 9 Jesucristupa wilakuyninta yachakushqannöla jutsata mana ruraypa kawapäkunman. 10 Diäcunu kananpaq manaraq churar shumaq musyapäkunman imano kawashqantapis. Ali kawashqanta musyaykurraq diäcunu kananpaq churapäkunman.

11 Diäcunupa warminpis* kanman respitashqa, pitapis mana tumpaq, shumaq tantiyakuq y awnishqanta cumpliq.

12 Diäcunukunaqa juk warmiyuqla kanman. Warminta y tsurinkunata shumaq ashmapäkunman.

13 Diäcunu kashqanta cumplirqa pïmaypitapis ali respitashqami kanqa. Mana mantsakuypami Jesucristuman yärakushqanta wilakunqa.

Pablo imapaq cartata apatsishqanpis

14 Timoteo, shamuyta yarparpis puntataqa kay cartalataraqmi apaykätsimü. 15 Jukla mana shamuptïpis kay cartata liyirnami tantiyanki wawqi panikunata imano yachatsinaykipaqpis. Noqantsiqa imayyaqpis kawaq Diospa *iglesian karmi wilakuyninta wilakuntsi y lutan yachatsikuqkunata corrigintsi.