Hechos
Iconio markacho wilakushqan
14 Tsaypitanami Iconio markachöna Pablo y Bernabé *sinagögaman yaykapäkurqan. Tsaycho shumaq wilapaptinmi Israel runakuna y mana Israel runakunapis Jesucristuman atskaq yärakärirqan. 2 Mana yärakuq kaq Israel runakunami itsanqa wakin mana Israel runakunata shimita qorqan Jesúsman yärakuqkunapa contran sharkapäkunanpaq.
3 Contran sharkuptinpis Pablo y Bernabéqa Tayta Diosman yärakurmi atska junaq mana mantsakuypa wilakärirqan. Salvamänantsipaq kaq wilakuynin rasunpa kashqanta musyananpaqmi Tayta Dios paykunata yanaparqan milagrukunata rurananpaq.
4 Tsayno kaptinpis tsay markacho taq runakuna kikinpura apänakushpan wakinqa Israel runakunapa favornin sharkurqan y wakinnami *apostolkunapa favornin sharkurqan. 5 Tsawraqa Israel runakuna y mana Israel runakunapis autoridäkunawan wilanakurqan apostolkunata saqmaypa wanutsipäkunanpaq. 6 Tsayta musyaykurmi Pablo y Bernabé qeshpikärirqan Listraman, Derbiman y Licaoniacho kaq wakin markakunamanpis. 7 Tsay markakunachönami Tayta Diospa ali wilakuyninta wilakärirqan.
Listra markacho Pabluta saqmashqan
8 Listra markachömi yurishqanpita patsa mana puriq runa karqan. Paymi jamaraykarqan 9 Pablo parlashqankunata mayar. Payta rikärirmi Pablo tantiyarqan aliyänanpaq Tayta Diosman yärakuykashqanta. 10 Tsawraqa lapan kalpanwan kayno nirqan: “¡Sharkur shumaq ichiy!”
Tsayno niptinmi jukla ichirkushpan puriyta qalaykurqan.
11 Tsayta rikaykurmi runakuna kikinkunapa idiömancho kayno nipäkurqan: “¡Dioskunami runa tukular noqantsiman shamushqa!”
12 Tsawraqa Bernabéta nipäkurqan Zeus nishqan dios kashqanta. Y Pablutana wilakuq kaptin nipäkurqan Hermes nishqan dios kashqanta.* 13 Tsay marka yaykunachömi Zeus nishqan diosta adorakunan templu karqan. Apostolkunata adorananpaq törukunata pishtar rupatsiyta munapäkuptinmi tsay templucho sirviq cüra waytan walqashqa törukunata qatirqan marka punkuman.
14 Tsayta tantiyaykurmi *apóstol Pablo y apóstol Bernabé röpanta rachiriykushpan* runakuna kaqman cörriyla aywaykur kayno nipäkurqan: 15 “¡Taytakuna, ama tsayta rurapäkuytsu! Noqakunapis qamkunano runalami karkaykä. Shamushqä manakaq dioskunata kacharir imayyaqpis kawaq Tayta Diostana adoranaykipaq tantiyatsiqmi. Paymi jana patsata, kay patsata, lamarta y lapan imaykatapis kamashqa. 16 Nawpataqa kikinkuna munashqannöla kawakunanpaqmi runakunata Tayta Dios kacharirqan. 17 Tsayno kacharirpis pïmaytami tantiyatsin rasunpa kaq Dios kashqanta y kuyakuq kashqanta. Paymi mikuy ali wayunanpaq tamyata tamyatsimun y kushishqa kawanantsipaqpis mikuyta kamaripämantsi”.
18 Tsayno nir tantiyatsiptinpis Pabluta y Bernabéta mana adorananpaq sasataraqmi tantiyapäkurqan.
19 Tsaypitanami wakin Israel runakuna Antioquíapita y Iconiupitapis Listraman chayaykur Pablupa contran sharkapäkunanpaq runakunata shimita qorqan. Paykuna nishqanta chaskiparmi Pabluta pitiqpaq saqmapäkurqan. Nirkurmi wanushqana kashqanta yarpapäkushpan qarachaypa apaykur marka waqtanman jitarirqan. 20 Tsaycho discïpulukuna juntarpaykaptinmi kawarirkamur markaman Pablo kutirqan. Tsaypita jukaq junaqnami Derbe markaman Bernabéwan aywakurqan.
Pablo y Bernabé Siriaman kutishqan
21 Derbiman chayaykur ali wilakuyta wilakuptinmi atska runakuna Jesúsman yärakushpan discïpulunkuna karqan. Tsaypitanami kutipäkurqan Listra, Iconio y Antioquía markakunaman. 22 Tsay markakunaman chayaykurmi Jesúspa discïpulunkunata* mana ajayaypa yärakunanpaq shakyätsir kayno nipäkurqan: “Tayta Dios *mandaykashqanman yaykunantsipaq nakashunraqmi”.
23 Tsaynöpis wawqi panikunata yanapananpaqmi cada *iglesiacho *mayor wawqikunata churarqan. Nirkurnami ayunar y Tayta Diosta manakur yärakushqan Señor Jesucristupa makinman churapäkurqan.
24 Pisidia provinciapita kutirnami Panfilia provinciaman chayapäkurqan. 25 Perge markacho Tayta Diospa wilakuyninta wilakurkurmi Atalia markamanpis aywapäkurqan. 26 Tsaypitami *büquiwan Antioquíaman kutikärirqan. Antioquíapitami puntatapis wawqi panikuna paykunata kacharqan wilakur puripäkunanpaq. Kacharmi Tayta Diosta manakärirqan paykunata yanapananpaq. 27 Antioquíaman chayaykurnami wawqi panikuna juntakaptin wilaparqan Tayta Dios ali yanapashqanta. Tsaynöpis wilaparqan mana Israel runakunapis Jesucristuman yärakärinanpaq Tayta Dios kamakätsishqanta. 28 Pabluwan Bernabé juk wata maslanmi tsaycho discïpulukunawan tarqan.