Tito
Tituman apóstol Pablo cartata apatsishqan
Carta qalaykunan
1 Noqa Pablumi, Tayta Diospa sirviqnin y Jesucristupa *apostolnin kar, Tayta Dios akrashqan kaqkunata wilakuyninta yachaykätsï Jesucristuman yärakur pay munashqanno kawapäkunanpaq. 2 Tayta Dios kay patsata manaraq kamar promitishqannölami pay akrashqan kaqkuna gloriacho imayyaqpis kawapäkunqa. Tayta Diosqa manami lulakuntsu, sinöqa promitishqanta imaypis cumplinmi. 3 Tiempu chayamushqana kaptinmi wilakuyninta wilakäriptin salvamaqnintsi Tayta Dios promitishqanta cumpliykan. Tsayno cumplirmi noqatapis churamashqa wilakunäpaq.
4 Tito,* noqa yärakushqäno Jesucristuman yärakurmi kuyay tsurïno kaykanki. Papänintsi Tayta Dios y salvamaqnintsi Jesucristo kuyapäshushpayki ali kawanaykipaq yanapaykuläshunki.
Jesucristupa wilakuqninkuna imano kananpaq kashqanpis
5 Creta islapita shakamurmi qamta nirqä problëmakunata arreglanaykipaq. Tsaynöpis nirqä markan markan aywar wawqi panikuna juntakashqancho *mayor wawqikunata churanaykipaqmi. 6 Mayor wawqi kananpaqqa pïmaypitapis ali rikashqa kanman. Tsaynöpis juk warmiyuqla kanman. Tsurinkunapis Tayta Diosman yärakur alilata ruraq kanman y mamanta taytanta cäsukuq kanman. 7 Tayta Diosta sirviq kaykarqa y wawqi panikunata rikaq kaykarqa mayor wawqikuna katsun pïmaypitapis mana jamurpashqa, mana runa tukuq, imapitapis mana rabyakuq, mana upyaq, mana pelyaq y imatapis mana chaskipakuq. 8 Tsaypa trukanqa katsun patsatsikuq, alilata ruraq, ali yarpayniyuq, Tayta Dios munashqanno kawaq y yarpachakuykur imatapis ruraq. 9 Jesucristupa wilakuyninta yachakushqannöla ali yachatsiq katsun. Tsaynöpami Tayta Dios munashqanno kawananpaq wawqi panikunata shakyätsinqa y lutan yachatsikuqkunatapis lutanta mana yachatsinanpaq shumaq tantiyatsinqa.*
Lutan yachatsikuqkunata mana chaskipänanpaq yätsishqan
10 Atskaqmi lutan yachatsikuqkuna purirkaykan wawqi panikunata engañashpan. Paykunaqa mana tantiyakurmi yachaykätsin Israel runakunano *señalakärinanpaq. 11 Wakin wawqi panikunataqa wayinpami engañarkaykan. Paykunaqa lutanta yachaykätsin imatapis sakyanan kashqalami. Tsayno lutanta yachatsinanpaq ama kachapaytsu.
12 Juk Creta runapis kaynömi qelqarqan: “Creta runakunaqa imaypis lulakuqmi, fiyu uywanömi, aläpa mikuqlapaqmi y qelami karkaykan”. 13 Rasun kaqtami tsay runa qelqarqan. Tsaymi lutan yachatsikuqkunata shumaq tantiyatsinki Tayta Dios munashqanno kawapäkunanpaq.
14 Tsaynöpis tantiyatsinki Israel runakuna lutanta yacharkaykätsishqanta mana chaskipänanpaq. Lutanta yachatsikuqkunaqa Tayta Diospa palabranta mana cäsukurmi kikinkunapa yarpaynilanpita yacharkaykätsin. 15 Lutanta yarpaq y mana cäsukuq karmi imapis mana ali kashqanta yarpapäkun. Jesucristupa wilakuyninta chaskikuqkunami itsanqa tantiyakärin Tayta Dios kamashqankunaqa lapanpis ali kashqanta.
16 Tsay lutan yachatsikuqkuna kaynömi nirkaykan: “Noqakunaqa Tayta Dios munashqannömi kawarkaykä”. Tsayno niptinpis lutankunata rurar kawashqanta rikarmi runakuna tantiyapäkun Tayta Diosta mana cäsukurkaykashqanta. Paykunaqa Diosta mana cäsukurmi runa mayinta chikir imatapis alitaqa rurapäkuntsu.