Eclesiastés
Lapanpaqpis tiemputa Tayta Dios kamakätsishqan
3 Kay patsachöqa lapanpis tiempuyuqlami kaykan.
2 Tayta Diosmi tiemputa kamakätsin yurinantsipaqpis y wanunantsipaqpis.
Tiemputa kamakätsin murukunantsipaq y cosechanantsipaq.
3 Tiemputa kamakätsin wanutsinantsipaq y jampinantsipaq.
Tiemputa kamakätsin juchutsinantsipaq y sharkatsinantsipaq.
4 Tiemputa kamakätsin waqanantsipaq y kushikunantsipaq.
Tiemputa kamakätsin lütunantsipaq y fiestata ruranantsipaq.
5 Tiemputa kamakätsin rumikunata jitanantsipaq* y shuntanantsipaq.
Tiemputa kamakätsin makalanakunantsipaq y mana makalanakunantsipaq.
6 Tiemputa kamakätsin ashinantsipaq y oqranantsipaq.
Tiemputa kamakätsin pirwakunantsipaq y jitarinantsipaq.
7 Tiemputa kamakätsin rachinantsipaq y shilpanantsipaq.
Tiemputa kamakätsin upälakunantsipaq y rimanantsipaq.
8 Tiemputa kamakätsin kuyanantsipaq y chikinantsipaq.
Tiemputa kamakätsin guërrata ruranantsipaq y guërrata mana ruranantsipaqpis.
9 Mayjina arurpis ¿imatataq runa jorqun? 10 Tsayno kaptinpis tantiyakushqämi runa arunanpaq Tayta Dios kamakätsishqanta. 11 Paymi lapantapis tiempulancho kamakätsin.
Tsaynölami Tayta Dios kamakätsishqa *mana ushakaq kaway kashqanta tantiyanantsipaq. Tsayno karpis manami tantiyayta atipantsitsu qalaykunanpita ushananyaq Tayta Dios imata rurashqantapis.*
12 Imano kaptinpis tantiyakushqä alita rurar kushishqa kawashqantsi mas ali kashqantami. 13 Tsaynöpis tantiyakushqä arushqantsipita mikur y upur kushishqa kawanantsita Tayta Dios munashqanta.
14 Tsaynöpis tantiyakushqä Tayta Dios lapan kamashqankuna imaypis tsaynöla kashqanta.* Kamashqankunamanqa manami imatapis yapantsitsu ni tsaypita manami imatapis jorquntsitsu. Tayta Dios lapantapis tsayno kamashqa payta *mantsakunantsipaqmi.
15 Kanan pasashqannömi unaypis pasarqan.
Unay pasashqankunapis yapaymi pasanqa.
Puntata kashqanno yapay kananpaqmi Tayta Dios kamakätsin.
Kay patsacho mana alikuna kashqan
16 Kay patsacho rikashqämi autoridäkuna shumaq arreglananpa trukan sakyapakur jutsaynaq runapa contran sharkuykaqta. 17 Tsaymi shonqulächo kayno nirqä: “Lapanpis tiempuyuqla kaykaptinqa tiempu chayamunqami ali runatapis y fiyu runatapis Tayta Dios juzgananpaq”.*
18 Tsaynöpis shonqulächo kayno yarparqä: “Runakunataqa Tayta Dios tantiyatsin uywakunanöla kashqanta. 19 Runapapis y uywapapis tsaylami destïnun kaykan.e Lapanpis jämayniyuqkunaqa wanuqlami *kaykan. Runapis uywapis ushakaqlami kaykan”.
20 Wanurqa lapantsipis ushakäshunmi.
Lapantsitapis alpalapitami ruramashqantsi.
Wanurqa lapantsipis alpamanmi tikrashun.*
21 ¿Piraq musyan runapa alman jana patsaman aywakushqanta y uywapa alman patsa rurinman yaykushqanta? 22 ¿Piraq musyan shamuq watakunacho imano kananpaq kashqanta? Tsaymi runapaqqa mas ali kaykan arukushqanwan kushishqa kawashqan. Tsayno kushishqa kawashqanmi pägun kaykan.