Colosenses
4 Patronkuna, qamkunapapis patronniki jana patsachömi kaykan. Tsaymi ashmaynikikunata kuyar imalawanpis yanapanki.*
2 Wawqi panikuna, Tayta Diosta agradëcikushpayki imaypis manakäriy.* 3 Noqakunapaqpis Tayta Diosta manakuykulay Jesucristupa ali wilakuyninta wilakäriptï shumaq chaskikärinanpaq. Tsay wilakuyninta wilakushqäpitami carcilcho wataraykä. 4 Tsaynöpis manakuykulay ali wilakuyninta pïmaytapis shumaq tantiyatsinäpaq.
5 Jesucristuta mana chaskikuq runakunawan ali kawapäkuy.* Alilata imaypis rurapäkuy. 6 Pitapis parlaparqa ali shimilaykipa shakya shakyala parlapanki.
Carta ushanan
7 Kuyay wawqintsi Tíquico* chayamurmi imano kaykashqätapis wilapäkushunki. Paypis Señor Jesucristupa wilakuqninmi kaykan. 8 Tsaymi payta kachaykämü imano kaykashqätapis wilashunaykipaq. Paymi shakyätsishunki Tayta Diosman shumaq yärakärinaykipaq.*
9 Tíquicuwanmi Tayta Diosman yärakuq marka mayiki kuyay wawqintsi Onésimutapis kachaykämü. Paykunami wilapäkushunki kaycho ima pasashqankunatapis.
10 Noqawan prësu kaykaq wawqintsi Aristarcumi* salüdunta apatsikamun. Tsaynömi Bernabépa prïmun* Marcuspis* salüdunta apatsikamun. Marcos chayamuptin yätsishqänöla shumaq chaskikärinki. 11 Tsaynölami Justo nishqan Jesúspis salüdunta qamkunapaq apatsikamun. Aristarco, Marcos y Justumi Tayta Dios *mandaykashqancho ali yanapamar shumaq shakyätsiman. Paykunalami Israel mayïkunapitaqa yanapaykäman.
12 Jesucristupa sirviqnin marka mayiki Epafraspis* salüduntami apatsikamun. Paymi lapan shonqunwan qamkunapaq imaypis manakuykan Tayta Dios munashqanno ali kawapäkunaykipaq. 13 Payqa pasaypami qamkunapaq lakikuykan. Tsaynölami lakikuykan Laodiceacho y Hierápolischo kaykaq wawqi panikunapaqpis.
14 Kuyanakushqä doctor Lucaswan* Demaspis* salüduntami qamkunapaq apatsikamun.
15 Laodiceacho kaykaq wawqi panikunatapis salüdüta qoykulanki. Tsaynöpis salüdüta qoykulanki Ninfasta y wayincho juntakaq wawqi panikunatapis.
16 Kay cartata liyirkurna apatsipäkunki Laodiceacho* kaykaq wawqi panikunaman paykunapis liyinanpaq. Tsaynömi Laodiceaman apatsishqä cartata liyirkur paykunapis apatsimunqa qamkunapis liyinaykipaq.
17 Wawqintsi Arquiputa kayno nipäkunki: “Señor Jesucristo churashushqaykino mana qelanaypa payta sirviy”.
18 Kay salüdütaqa kikïmi qelqarkamü.* Mana qonqaylapa Tayta Diosta manakäriy prësu kaykashqäpita yarqamunäpaq.
Tayta Dios lapaykita kuyapaykuläshunki. [Amén.]