Hechos
8 Estebanta wanutsiptin Saulupis kushikurqanmi.
Jesúsman yärakuqkunata Saulo qatikachashqan
Tsay junaqpitanami Jesúsman yärakuqkunata Jerusaléncho qatikachayta qalaykärirqan. Judeapa y Samariapa qeshpir aywakäriptinmi *apostolkunalana Jerusaléncho quëdapäkurqan. 2 Estebanpa ayantami Tayta Dios munashqanno kawaqkuna fiyupa lakikärishpan waqaraykar pampapäkurqan. 3 Saulunami Jesúsman yärakuqkunata wayin wayin ashir tarishqan kaqtaqa warmitapis olqutapis carcilman wichqatsirqan.*
Samariacho Felipe wilakushqan
4 Jerusalénpita qeshpiqkunami maytsaychöpis ali wilakuyta wilakur puripäkurqan. 5 Tsaynölami Felipipis Samaria markaman chayaykushpan Jesús salvamaqnintsi Cristo kashqanta wilakurqan. 6 Tsaychömi milagrukunata rurashqanta rikar y parlashqanta wiyar lapan runakuna kushikärirqan. 7 Runakunapita qarquptinmi *supaykunapis qaparaykar yarqurqan. Tsaynölami atska weqrukunatapis y paralïticu runakunatapis aliyätsirqan. 8 Tsayno ruraptinmi tsay markacho taqkuna pasaypa kushikärirqan.
9 Tsaychömi karqan Simón jutiyuq juk brüju. Paymi *Samaria runakunata nawpapita patsa criyitsirqan “noqaqa yachaqmi kä” nishpan. 10 Simón nishqankunata mayarmi waktsakunapis y rïcukunapis kayno nipäkuq: “¡Kay runataqa Tayta Diosmi yanapaykan!”
11 Simónqa brüju karmi nawpapita patsa mägicawan runakunata engañaq.
12 Tsayno kaptinpis Tayta Dios *mandaykashqanpa ali wilakuyninta y Jesucristupita Felipe wilakuptinnami olqupis warmipis chaskikur *bautizakärirqan. 13 Tsaymi Simónpis criyishpan bautizakurir Felipe maypa aywaptinpis paywan purirqan. Señalkunata* y milagrukunata rurashqanta rikarmi Simón pasaypa espantashqa rikakurqan.
14 Samariacho Diospa wilakuyninta runakuna chaskishqanta mayaykurmi Jerusaléncho kaykaq *apostolkuna Pedruta y Juanta tsayman kacharqan. 15 Chayaykurmi Tayta Diosta manakärirqan Samaria runakunapis Espíritu Santuta chaskikärinanpaq. 16 Jesúspa jutincho bautizakushqa kaykarpis Espíritu Santuta manami mayqanpis chaskishqaraqtsu karqan. 17 Tsawraqa paykunapa umanman makinta churaykur manakuptinmi Espíritu Santuta chaskipäkurqan.
18 Tsayta rikarmi Simónqa apostolkunata pägayta munar 19 kayno nirqan: “Tsay munaynikita rantikaykalämay noqapis runakunapa umanman makïta churaykur manakuptï Espíritu Santuta chaskikärinanpaq”.
20 Tsayno niptinmi Pedro kayno nirqan: “¿Imanirtaq Tayta Dios qarashqan* Espíritu Santu rantina kashqanta yarpaykanki? ¡Tsayno yarpashqaykipitami qellaynintinta supayniki apashunki! 21 Qam yarpashqaykiqa manami Tayta Dios munashqannötsu kaykan. Tsayno kaykarqa manami noqakuna rurashqäman jatikämunkimantsu. 22 Lutan yarpashqaykikunata kacharir Tayta Diosta manakuy perdonashunaykipaq. Manakuptikiqa capazchari perdonashunkimanpis. 23 Jutsa ruraypa munaynincho kashqayki y envidiösu kashqayki reqipalami kaykan”.
24 Tsayno niptinmi Simón ruwakurqan kayno nir: “Nishqaykikuna mana pasamänanpaq Tayta Diosta manakuykulay”.
25 Tayta Diospa wilakuyninta tsaycho wilakurkurnami Pedruwan Juan Jerusalénman kutiqno Samariacho kaykaq wakin markakunachöpis wilakärirqan.
Eunucu runa Jesúsman criyishqan
26 Tsaypitami Tayta Diospa *angilnin Felipita kayno nirqan: “Sur kaq lädupa yarqur Jerusalénpita Gaza markaman aywaq nänipa ayway. Tsay näniqa chunyaq jirkapami pasaykan”.
27 Tsaymi Felipe tsay nänipa aywar Etiopía nacionpita juk *eunucu runata rikarqan. Payqa Etiopía nacioncho reina Candacipa tesorërunmi karqan. Tayta Diosta adoraq Jerusalénman aywashqanpita 28 kutirmi carrëtanman jamaykur profëta Isaías qelqashqan libruta liyiraykar aywaykarqan. 29 Tsawraqa Felipita Espíritu Santu kayno nirqan: “Tsay carrëtawan aywaykaq runapa nawpanman ayway”.
30 Nishqanno aywarmi mayarqan profëta Isaías qelqashqan libruta liyiykaqta. Tsawraqa tapurqan kayno nir: “Tsay liyiykashqaykita ¿tantiyankiku?”
31 Tsawraqa Etiopía runa kayno nirqan: “Pipis mana tantiyatsimaptinqa ¿imanöparaq tantiyashaq?”
Tsayno nirmi Felipita ruwakurqan carrëtaman witsarkur nawpanman jamakunanpaq.
32 Tayta Diospa palabranta liyiykashqanqa kaynömi nirqan:
“Uyshata pishtananpaq apaqnömi payta apapäkurqan.
Milwanta rutuptin uysha kashqannömi upälala karqan.
Tsayno upälakushpan manami imatapis rimakurqantsu.
33 Manakaqman churaptinpis manami pipis favornin sharkurqantsu.
Payta wanutsiptin tsurinpis manami karqantsu”.*
34 Tsaymi eunucuqa Felipita kayno nirqan: “Tantiyaykatsilämay, tayta. Profëta Isaías ¿pipaqtaq kayta qelqarqan? ¿Kikinpaqku o jukpaqku?”
35 Tsayno tapuptinmi tsay liyishqanta tantiyatsir Felipe wilaparqan Jesúspa ali wilakuyninta. 36 Tsaypita aywarkaykashqanchömi chayapäkurqan yaku kashqanman. Tsaychömi eunucu kayno nirqan: “Kaycho yaku kaykaptinqa ¿manatsuraq *bautizaykamankiman?”
37 [Niptinmi Felipe kayno nirqan: “Lapan shonquykiwan criyiptikiqa bautizashayki”.
Tsawraqa kayno nirqan: “Jesucristo Tayta Diospa Tsurin kashqanta rasunpami criyï”.]
38 Tsaymi carrëtanta ichiykatsir yakuman ishkan urarqan. Tsaychömi eunucuta Felipe bautizarqan. 39 Yakupita yarqupäkamuptinnami Felipita Señor Jesucristupa Espïritun elaqpita juk läducho rikakatsirqan. Payta manana rikarpis eunucuqa kushishqami aywakurqan. 40 Azoto markachöna rikakurmi Felipiqa Jesúspa ali wilakuyninta wilakur markan markan aywarqan Cesarea markaman chayananyaq.