Proverbios
17 Ali alilata mikurpis chikinakur kawananpa trukanqa mas alimi kanman yakuta upularpis kuyanakur kawashqan.
2 Tantiyakuq ashmaytaqa patronnin churan mana cäsukuq tsurinta rikananpaqmi.
Tsay ashmayqa patronninpa tsurinkunawanmi herenciata rakipänakunqa.
3 Rasunpa qori kashqanta y qellay kashqanta musyananpaq ninawanmi tsulutsin.
Tsaynölami runapa yarpaynin ali kashqanta o mana ali kashqanta musyananpaq TAYTA DIOS pruëbaman churan.*
4 Fiyu runaqa fiyu mayin yätsishqantami chaskipan.
Lula runapis lula mayin nishqantami chaskipan.
5 Waktsakunata manakaqman churarqa kamakuq Tayta Diostami manakaqman churaykan.
Runa mayinta desgracia pasaptin kushiparqa castigashqami kanqa.
6 Wilkankunaqa awkilunpa corönanmi kaykan.
Maman y taytan kawaptin wamrankuna kushikunmi.
7 Mana tantiyakuq runa yachaq tukur rimaptin penqaypaq kashqannömi autoridä lulakushqan penqaypaq kaykan.
8 Sobornu jatipayta yachaqkunaqa pïmaytapis awnitsinmi.
Tsaymi imatapis munashqanta taripäkun.
9 Perdonakuq karqa amïgutapis tarinmi.
Mana perdonakuq karmi itsanqa amïguntapis oqran.
10 Tantiyakuq karqa anyapaptin chaskikunmi.
Mana tantiyakuq karmi itsanqa mayjina astaptinpis mana chaskikuntsu.
11 Fiyu runaqa piwanpis pelyalatami ashin.
Jina kaqtami kalpasapa runa yurirkur yawarta upuratsin.
12 Mana tantiyakuq rabyashqa runaqa wawan oqrashqa ösupitapis mas mantsakuypaqmi kaykan.
13 Mal agradecïdu runataqa aylunkunatawanmi desgracia pasanqa.
14 Pelya ashiq runaqa loqla aywaqnömi kaykan.
Achäquita ashipaptinpis witikushqanmi mas ali kaykan.
15 Jutsa ruraqta castigananpa trukan jutsaynaqta castigaptin TAYTA DIOS rabyananmi.*
16 ¿Imapaqtaq välin mana tantiyakuq runa qellayniyuq kashqanpis?
Atska qellayniyuq karpis yachaytaqa manami rantiyta kamäpakuntsu.
17 Ali amïguqa amïgunta manami imaypis kacharintsu.
Ima nakaycho kaptinpis wawqintanömi yanapan.
18 Mana tantiyakuq runaqa pipapis garantianmi yaykun.
Mana pägaptinqa garantizaqmi pägapakun.
19 Runa mayinta achäquita ashipaq runaqa pelyalatami ashin.
Shimisapa runaqa shimilanpitami maqakan.
20 Lutanta rurananpaq yarpachakuq runaqa manami imaypis ali kawayta tarintsu.
Lulakuqtaqa imaypis desgraciami pasan.
21 Tsurin mana tantiyakuq kaptinqa taytan lakikunmi.
Lutan ruraq kaptinqa rabyakunmi.
22 Kushishqa kawaq runaqa manami qeshyantsu.
Lakishqa kawaq runami itsanqa qeshyalata mitsin.*
23 Fiyu runaqa pakaylapami sobornuta chaskipakun.
Nirkurmi jutsa ruraqpa favornin sharkun.*
24 Tantiyakuq runaqa yachaq kananpaqmi yarpachakun.
Mana tantiyakuq runami itsanqa yachakunanpaq mana yarpachakuntsu.
25 Mana tantiyakuq wamraqa taytanta rabyanätsin y mamanta lakikatsin.
26 Manami alitsu kaykan jutsaynaq runata castigashqan.
Tsaynöpis manami alitsu kaykan respitashqa runata astashqan.
27 Shumaq tantiyakuq runaqa manami aläpa parlakuntsu.
Yachaq runaqa ima kaptinpis upälakunmi.
28 Mana tantiyakuq runapis upälakuptin y pacienciakuptinqa tantiyakuq kashqantami yarpapäkun.