2 Corintios
Corintucho taq wawqi panikuna recomendación cartano kashqan
3 Tsayno niptï ama yarpapäkuytsu chaskikamänaykipaq kashqala parlashqäta. Tsaynöpis ama yarpapäkuytsu chaskikamänaykipaq recomendación cartataraq nistapäkushqäta. Wakin runakuna recomendación cartata puritsiptinpis qamkuna chaskikamänaykipaqqa manami nistapäkütsu. Tsaynöpis juk markaman chayaptï chaskikamänanpaq manami qamkunapita recomendación cartata nistapäkütsu. 2 Tsaypa trukanqa kikikikunami shonqücho qelqaraykaq recomendación cartä karkaykanki. Tsay cartataqa pïmaypis liyinmi.* 3 Tsaynöpami runakuna tantiyakurkaykan wilakushqäta chaskikur Jesucristo qelqashqan carta kashqaykita. Tsay cartataqa manami tintawantsu qelqashqa, sinöqa imayyaqpis kawaq Tayta Diospa Espïritunwanmi. Tsaynöpis manami läja rumimantsu* qelqashqa, sinöqa shonquykimanmi.*
4 Tsayno karkaykashqaykita musyapäkü Jesucristo salvamashqanpita Tayta Diosman yärakurmi. 5 Wilakärinäpaq manami yachaq kashqämantsu atiënikärï, sinöqa Tayta Diosmanmi. 6 Paymi noqakunata yanapaman mushuq *pactupita* wilakärinäpaq. Tsay mushuq pactuqa manami leykunapa munaynincho kawanantsipaqtsu niykämantsi, sinöqa Espíritu Santu tantiyatsimashqantsino kawanantsipaqmi. Leykunapa munaynincho kawarqa wanushqanömi kawantsi.* Espíritu Santupa munaynincho kawarmi itsanqa *mana ushakaq kawayta tarintsi.
Moisés qelqashqan leykunapita Jesucristupa wilakuynin mas ali kashqan
7 Läja rumicho qelqaraykaq leykuna runakunata salvananpaq mana kaykaptinpis tsay leykunata Israel runakunaman Moisés chayatsiptin qaqlan fiyupami chipchipyarqan.* Tsay chipchipyashqan elqaqla kaykarpis fiyupami chipchipyarqan. Tsaymi Moiséspa qaqlanta rikayta mana kamäpakurqantsu. 8 Moisés apamushqan leykunapis tsayno kushikuypaq kaykaptinqa ¿manaku Espíritu Santu apamushqan wilakuy mas kushikuypaq kaykan? 9 Mana salvakunantsipaq kaykarpis tsay leykuna ali kaykaptinqa salvamänantsipaq kaq wilakuy mas alimi kaykan. 10 Tsay leykunaqa Espíritu Santu apamushqan wilakuyman manami tinkuntsu. 11 Tsaymi ushakänanpaq kaq leykuna kushikuypaq kaptinpis Jesucristupa mana ushakaq wilakuyninqa mas kushikuypaq kaykan.
12 Tsayta musyarmi mana mantsakuypa wilakärï. 13 Manami Moisésnötsu Diospa wilakuyninta wilakärï. Payqa qaqlanta tsapakurqan chipchipyaynin elqaykashqanta Israel runakuna mana rikananpaqmi.* Tsaynöpami leykuna ushakänanpaq kashqanta mana tantiyapäkurqantsu.
14 Moiséspa qaqlan tsaparashqannömi Israel runakunapa yarpayninkunapis tsapakashqano kaykan. Tsaymi punta kaq *pactuta liyir kananyaqpis mana tantiyapäkuntsu ushakaqla kashqanta. Jesucristuta chaskikurraqmi tantiyapäkunqa. 15 *Moisés qelqashqan leykunata liyirpis manami kananyaqpis tantiyapäkuntsu. 16 Señornintsita chaskikurmi itsanqa tantiyakärinqana.
17 Señornintsiqa Espíritu Santumi kaykan. Paypa Espïritunta chaskikurmi librina kaykantsi. 18 Librina karmi Señornintsita rikaqno kaykantsi. Tsaymi runakuna rikamashpantsi kikin Señornintsita rikaqno karkaykan. Tsaynöpis Señornintsiqa Espíritu karmi waran waran yanapaykämantsi kikin kashqanno noqantsipis kanantsipaq.*