Juan
Uyshayuq runaman Jesús tinkutsikushqan
10 Mastapis Jesús kayno nirqan: “Rasunpami kayno nï: Uysha corralman punkupa mana yaykuq kaqqa suwami kaykan. 2 Punkupa yaykuq kaqmi itsanqa uyshapa ämun kaykan. 3 Paytami uysha täpaq runa punkuta kichapan yaykunanpaq. Uyshapa ämunqa jutinpa jutinpa qayarmi* corralpita jorqun. 4 Uyshakuna yarqurnami ämunpa vozninta reqishpan qepanta aywapäkun. 5 Jäpa runapa vozninta mayarmi itsanqa qepanta mana aywantsu, sinöqa qeshpirmi aywakärin”.
6 Tinkutsiypa Jesús tsayno yachatsiptinmi runakuna mana tantiyarqantsu imata nishqantapis. 7 Tsaymi Jesús kayno nirqan: “Rasunpami kayno nï: Noqami uysha corralpa punkun kaykä. 8 Manaraq shamuptï punta shamuqkunaqa lapanpis suwami* karqan. Tsaymi uyshakuna paykunata mana cäsurqantsu. 9 Noqami itsanqa corral punku kaykä. Punkupa yaykuq kaqqa salvakunqami. Paykunaqa yaykur y yarqurpis ali qewatami taripäkunqa. 10 Suwaqa shamun suwakunanpaq, wanutsinanpaq y ushakätsinanpaqmi. Noqami itsanqa shamushqä runakuna ali kawayta taripäkunanpaq.
11 “Noqami ali mitsikuq runa kaykä. Ali mitsikuqqa uyshankuna raykumi wanuytapis tarinman. 12 Pägu raykula mitsipakuq kaqmi itsanqa *löbu shamuqta rikar uyshakunata kacharir qeshpir aywakun. Tsayno aywakun ämun mana kashpanmi. Tsaymi löbu yaykur tsariptin wakin uyshakuna maytsaypapis qeshpir aywakärin. 13 Pägu kashqala mitsipakuq runaqa uyshakunata mana kuyaparmi qeshpir aywakun.
14 “Noqami itsanqa ali mitsikuq runa kaykä.* Taytäta reqishqäno y pay reqimashqannömi* noqapis uyshäkunata reqï y uyshäkunapis noqata reqipäkaman. Tsaymi uyshäkuna rayku wanushaqpis. 15 - 16 Manami kaylachötsu uyshäkuna kaykan, sinöqa juk läduchöpis kaykanmi. Paykunapis voznïta reqirmi cäsukamanqa. Tsaymi paykunatapis shuntamushaq juk corrallachöna kananpaq. Tsaynöpami juklaylana mitsikuqnin kanqa.*
17 “Uyshäkuna rayku wanunäpaq kaptï y kawarimunäpaq kaptïmi Taytä kuyaman. 18 Noqa munayniyuqmi kaykä wanunäpaq y kawarimunäpaqpis. Tsaymi kikï mana munaptïqa pipis mana wanutsimanqatsu. Wanunäpaq y kawarimunäpaqmi Taytä nimashqa”.
19 Jesús tsayno parlaptinmi Israel runakuna yapay kikinpura rabyanätsinakurqan.* 20 Tsaymi wakin kayno nipäkurqan: “Paytaqa *supaymi löcutaykätsin. ¿Imapaqtaq mayashunpis?”
21 Wakinnami kayno nipäkurqan: “Supay löcutätsiptinqa manami tsayno parlanmantsu. Tsaynöpis qapra runata manami aliyätsinmantsu karqan”.
Jesústa mana chaskikärishqan
22 Tamya killachömi Jerusaléncho templupa fiestan karqan. 23 Tsaymi templuman yaykur Salomón nishqan alarpa Jesús puriykaptin 24 Israel runakuna juntapaykur kayno nipäkurqan: “¿Imayyaqtaq shuyäshayki rasun kaqta wilamänaykipaq? Tayta Dios kachamushqan Cristo karqa jukla wilapäkamay”.
25 Tsayno niptinmi Jesús kayno nirqan: “Maynami qamkunata wilashqä. Wilaptïpis y Taytäpa jutincho milagrukunata ruraykaptïpis manami criyipäkamankitsu. 26 Tsayno mana criyipäkamankitsu uyshäkuna mana kashpaykimi.
27 “Uyshäkunami itsanqa voznïta reqir qatiräman. Noqapis paykunata reqïmi. 28 *Mana ushakaq kawaytami paykunata qoykushaq. Tsaymi imaypis mana ushakanqatsu.* Paykunata makïpita manami pipis qechumanqatsu. 29 Taytämi paykunata makïman churamushqa. Lapanpaq munayniyuq kaptinmi ni pipis Taytäpa makinpita qechunqatsu. 30 Taytäwan noqaqa juklaylami kaykä”.
31 Tsayno niptinmi tsay autoridäkuna Jesústa yapay saqmayta munapäkurqan. 32 Tsaymi Jesús kayno nirqan: “Qamkuna rikashqankimi atska milagrukunata Taytäpa munayninwan rurashqäta. ¿Mayqan milagruta rurashqäpitataq saqmamayta munarkaykanki?”
33 Tsawraqa kayno nipäkurqan: “Manami alita rurashqaykipitatsu saqmayta munarkaykä, sinöqa Diospa contran parlashqaykipitami.* Qamqa runala kaykarmi Dios tukuykanki”.
34 Jesúsnami kayno nirqan: “Leynikichöpis kaynömi niykan: ‘Noqami nirqä: “Qamkunaqa dioskunami* karkaykanki” ’.* 35 Tayta Diospa palabran nishqankunaqa rasun kaqlami kaykan. Unay runakunata tantiyatsir Tayta Dios tsayno niykaptinqa 36 ¿imanirtaq ‘Diospa Tsurinmi kaykä’ niptï manakaqkunata niykashqäta yarpapäkunki? Kikin Tayta Diosmi kay patsaman kachamashqa.
37 “Rurashqäkuna Taytä munashqanno mana kaptinqa ama criyipäkamaytsu. 38 Pay munashqanno kaptinqa criyipäkamay. Nishqäkunata mayaykarpis mana criyirqa milagru rurashqäkunapita criyipäkamay. Tsaynöpami tantiyapäkunki noqacho Taytä kashqanta y paycho noqa kashqäta”.
39 Tsayno niptinmi yapay prësu tsaritsiyta munapäkurqan. Tsaymi qeshpir 40 kutikurqan Jordán mayu tsimpanman. Tsaychömi nawpata Juan bautizarqan.* 41 Jesús tsaycho kashqanta mayarmi atska runakuna tsayman aywaykur kayno nipäkurqan: “Juanqa manami ima milagrutapis rurarqantsu. Jesúspita nishqankunami itsanqa lapanpis rasun kaq kaykan”.
42 Tsaychömi atska runakuna Jesúsman criyipäkurqan.