1 Corintios
Mana rimanakuypa kawananpaq nishqan
3 Wawqi panikuna, tsayno kaptinpis Espíritu Santu munashqanno mana kawapäkuptikimi Jesucristuta mana chaskikuq runakunatano qamkunata yachatsirqä. Qamkunaqa pishi wamranölaraqmi kapäkurqayki. 2 Mikuyta manaraq yachaq wamrata chuchulawan maman ashmashqannömi noqapis qamkunata qalaykunan kaq yachatsikuykunalataraq yachatsirqä. Kananyaqpis mana tantiyakuq karmi pishi wamranölaraq karkaykanki.* 3 Chikinakur y rimanakur kawashpayki ¿manaku Jesucristuta mana chaskikuq runakunano kawarkaykanki? 4 Wakinnikishi kayno nirkaykanki: “Noqakuna Pablutami qatiraykä”. Y wakinnikinashi kayno nirkaykanki: “Noqakunaqa Apolustami qatiraykä”. Tsayno nipäkushpayki ¿manaku Diosta mana cäsukuq runakunano karkaykanki?*
5 Tsayno nipäkunaykipaqqa ¿pitaq Apolusqa? Tsaynöpis ¿pitaq noqa kä? Noqakunaqa Tayta Diosta sirviq runakunalami karkaykä. Tayta Dios churamashqanno sirviptïmi Jesucristuta chaskikärishqanki. 6 Muruta muruq runanömi qamkunata wilapashqä Jesucristuta chaskikunaykipaq.* Apolusnami mururaykaqta parquqno Jesucristupa wilakuyninta masta tantiyatsishushqanki.* Muruta winatsimuqnömi Tayta Dios shumaq tantiyatsishushqanki Jesucristuman yärakärinaykipaq. 7 Manami muruq kaqtsu ni parquq kaqtsu muruta winatsimun, sinöqa Tayta Diosmi.
8 Muruq kaqpis parquq kaqpis chakra ali wayunanpaqmi arupäkun. Tayta Diosnami muruq kaqtapis parquq kaqtapis arushqanman tupu päganqa. 9 Noqapis Apoluspis Tayta Diospa aruqninkunalami karkaykä. Qamkunanami Tayta Dios aruykätsishqan chakrano karkaykanki.
Tsaynöpis Tayta Dios sharkaykätsishqan wayinömi karkaykanki. 10 Tayta Dios kuyamar churamashqa kaptinmi ali yachaq albañil cimientuta churashqanno arushqäkuna kaykan. Tsay cimientu janancho juk albañil perqata sharkatsishqannömi wakin runakunapis arurkaykan. Itsanqa shumaq tantiyakäritsun imano arushqantapis. 11 Manami pipis cimientu churashqana kaykaqta jitariykur juk cimientuta churanmantsu. Jesucristumi cimientuqa kaykan.
12 Wakin runakunaqa Tayta Dios munashqanno kawar tsay cimientu jananman qoriwan, qellaywan o kuyaylapaq chipchipyaykaq rumikunawan wayita sharkatsishqanömi karkaykan. Wakin runakunanami itsanqa Tayta Diosta mana cäsukur qeruwan, oqshawan o rämakunawan wayita sharkatsishqano karkaykan. 13 Mayqanwan sharkatsiptintsipis juiciu final junaqnami lapan arushqantsipita Tayta Dios juzgamäshun. Tsay junaq juzgamashpantsimi lapan rurashqantsikunata ninawan probanqa. 14 Cimientu janancho sharkatsishqantsikunata nina mana ushaptinqa premiutami chaskishun. 15 Cimientu janancho sharkatsishqantsikunata nina ushaptinmi itsanqa ima premiutapis chaskishuntsu. Tsayno kaptinmi wayita nina rupaptin runa qeshpir salvakushqanno noqantsipis salvakushun.
16 ¿Manaku musyapäkunki Tayta Diospa templun kashqaykita? ¿Manaku musyapäkunki Espíritu Santu qamkunacho taykashqanta?* 17 Tayta Diospa templunta ushakätsiq kaqtaqa* Tayta Diosmi ushakätsinqa. Qamkunaqa Tayta Diospa templun karmi *santu karkaykanki.
18 Shumaq tantiyakäriy. Wakinnikimi yarparkaykanki Diosta mana chaskikuq runakunano yachaq kashqaykita. Rasunpa yachaq kayta munarqa paykuna yarpashqanno ama yarpapäkuytsu. 19 Diosta mana chaskikuq runakuna yachaq kashqanqa Tayta Diospaq manakaqlami kaykan. Palabranchöpis kaynömi qelqaraykan:
“Yachaq kashqanta runa yarpaptinpis manami rasunpatsu yachaq kashqanta musyatsin”.*
20 Tsaynöpis kaynömi qelqaraykan:
“Tayta Dios musyaykanmi yachaqkuna imata yarpashqantapis.
Payqa musyaykanmi manakaqkunata yarpapäkushqanta”.*
21 Tsayno niykaptinqa ama alabakäriytsu kayno nir: “Noqaqa Apoluspa o Pablupa qatiraqninmi kä”. Tantiyakäriy lapanpis qamkunapana kashqanta. 22 Tsaymi noqapis, Apoluspis, Cefaspis, kay patsapis, kawaypis, wanuypis, kanan tiempupis y shamunanpaq kaq tiempupis qamkunapana lapan kaykan. 23 Qamkunanami Jesucristupa kaykanki. Jesucristunami Tayta Diospa kaykan.