Éxodo
Israel runakunata Egiptupita Tayta Dios jorqunanpaq nishqan
6 Tsawraqa Moisésta TAYTA DIOS kayno nirqan: “Kananmi rikankipaq Faraónta imano castigashqätapis. Pasaypa mantsariypaq castigaptïraqmi kikin qarqushunkipaq nacionninpita aywakärinaykipaq”.
2 Mastapis Moisésta Tayta Dios kayno nirqan: “Noqaqa *Yahwehmi kaykä. 3 Abrahamta, Isaacta y Jacobta yuriparkurmi musyatsirqä El-Shaddai* kashqäta. Paykunata manami wilarqätsu jutï Yahweh kashqantaqa.* 4 Paykunawanmi *pactuta rurarqä *Canaánta qoykunäpaq.* Tsaychömi paykuna jäpanöla tarqan. 5 Egipto runakuna nakatsiptin Israel runakuna waqarkaykashqanta mayarmi paykunawan pactu rurashqäta kanan cumplishaq.
6 “Tsayno kaptinqa aywarkur Israel mayikikunata kayno wilanki: ‘Tayta Diosmi kayno nin: Noqaqa TAYTA DIOSMI kä. Egipto runakuna fiyupa nakatsir arutsishushqaykipitami qamkunata jorqushayki. Podernïwanmi Egipto runakunata mantsakuypaq castïgukunawan castigashaq. 7 Noqami shuntashayki kuyashqä runakuna kapäkunaykipaq. Qamkunapa Diosnikimi kashaq.* Tsaynöpami musyapäkunkipaq Egipto runakuna nakatsishushqaykipita jorqamushuqniki Tayta Dios kashqäta. 8 Nirkurmi qamkunata pushashayki Abrahamta, Isaacta y Jacobta qoykunäpaq promitishqä nacionman. Noqa TAYTA DIOSMI tsayno nï’ ”.
9 Tayta Dios tsayno nishqantami Israel mayinkunata Moisés wilarqan. Wilaptinpis fiyupa nakar lakikushpan manami cäsuparqantsu.
10 Tsaymi Moisésta TAYTA DIOS kayno nirqan: 11 “Aywar Faraónta ninki Israel runakunata nacionninpita kachapäshunaykipaq”.
12 Tsayno niptinmi TAYTA DIOSTA Moisés kayno nirqan: “Israel mayïkunapis mana cäsuykämaptinqa peornachari Faraón mana cäsumanqatsu. Noqaqa parlaytapis manami shumaq yachätsu”.
13 Tsayno niptinpis Moisésta y Aarónta TAYTA DIOS kacharqan Israel runakunamanpis y Faraónmanpis kayno nir wilananpaq: “Egiptupita Israel runakuna yarqunanpaqmi TAYTA DIOS nin”.
Aarón y Moisés mayqan aylupita kashqanpis
14 Kaychömi qelqaraykan Israel runakunapa unay mandaqninkunapa jutinkuna. Israelpa qechpa tsurin Rubénpa tsurinkuna karqan Hanoc, Falú, Hezrón y Carmi. Tsay runakunapitami Rubén trïbu aylukuna karkaykan.
15 Simeónpa tsurinkunami karqan Jemuel, Jamín, Ohad, Jaquín, Zohar y Saúl. Saúlpa mamanmi karqan cananea warmi. Tsay runakunapitami Simeón trïbu aylukuna karkaykan.
16 Leví kawarqan pachak kimsa chunka qanchis (137) watayuq kashqanyaqmi. Paypa tsurinkunami qechpapita nunushyaq karqan Gersón, Coat y Merari.
17 Gersónpa tsurinkunami karqan Libni y Simei. Paykunapitami Libni y Simei aylu runakuna karkaykan.
18 Coat kawarqan pachak kimsa chunka kimsa (133) watayuq kashqanyaqmi. Paypa tsurinkunami karqan Amram, Izhar, Hebrón y Uziel.
19 Meraripa tsurinkunami karqan Mahli y Musi.
Gersón, Coat y Meraripitami *levitakuna karkaykan.*
20 Coatpa tsurin Amrammi tiyan Jocabedwan tarqan. Jocabedpa wawankunami karqan Aarón y Moisés. Amram kawarqan pachak kimsa chunka qanchis (137) watayuq kashqanyaq.
21 Izharpa tsurinkunami karqan Coré, Nefeg y Zicri.
22 Uzielpa tsurinkunami karqan Misael, Elzafán y Sitri.
23 Aarón tarqan Aminadabpa tsurin Elisabetwan. Elisabet karqan Naasónpa paninmi. Aarónpa tsurinkunami karqan Nadab, Abiú, Eleazar y Itamar.
24 Corépa tsurinkunami karqan Asir, Elcana y Abiasaf. Tsay runakunapitami Coré aylu runakuna karkaykan.
25 Aarónpa tsurin Eleazarna tarqan Futielpa tsurinwan. Eleazarpa tsurinmi karqan Finees.
Tsaynömi karqan levitakunapa unay aylunkuna. Cada mandaqpitami juk aylu kaykan. 26 Amrampa tsurin Aarónta y Moiséstami TAYTA DIOS kayno nirqan: “Israel runakunata punta punta shuntarkur Egiptupita jorqapäkamuy”.
27 TAYTA DIOS nishqannömi Aarón y Moisés Egiptupa mandaqnin Faraónwan parlarqan Israel runakunata jorqamunanpaq.
28 Moiséswan TAYTA DIOS Egiptucho parlashqan junaqmi 29 kayno nirqan: “¡Noqaqa TAYTA DIOSMI kä! Egipto nacionpa mandaqnin Faraónta lapan nishqäkunata wilanki”.
30 Tsawraqa Moisés nirqan: “TAYTA DIOS, noqaqa manami tantiyatsiytapis kamäpakütsu. Tsayno kaykaptïqa ¿imanöparaq Faraón cäsumanqapis?”