2 Pedro
Apóstol Pedrupa ishkay kaq cartan
Carta qalaykunan
1 Yärakuq mayikuna:
Noqa Simón Pedrumi, Jesucristupa sirviqnin y *apostolnin kar, kay cartata apaykätsimü. Qamkunatapis Jesucristo kuyapäshushpaykimi noqakunatano salvashushqanki. Payqa Diosnintsi y salvamaqnintsimi kaykan. 2 Tayta Diosta y Señornintsi Jesucristuta *reqipäkuptikimi kuyapäshunaykipaq y waran waran ali kawayta qoykuläshunaykipaq qamkunapaq manakü.
Tayta Dios munashqanno kawanantsipaq nishqan
3 Payta *reqiptintsimi munashqanno kawanantsipaq Tayta Dios munayninwan tukuynöpa yanapaykämantsi. Kuyapäkuq y alilata ruraq karmi tsayno kawanantsipaq qayamashqantsi. 4 Tsaynölami imaypis yanapamänantsipaq promitimashqantsi. Tsayno yanapamäshun jutsaynaq kashqanno noqantsipis jutsa rurayta kacharir jutsaynaqna kanantsipaqmi.
5 Tsayno kaykaptinqa Tayta Diosman imaypis yärakäriy. Payman yärakur alilata rurapäkuy. Alilata rurar palabranta yachakäriy. 6 Palabranta yachakur shonquykita y yarpaynikita dominakuy. Dominakur wanunaykiyaq cäsukäriy. Cäsukur Tayta Dios munashqanno imaypis kawapäkuy. 7 Tayta Dios munashqanno kawar juk aylunöla wamayänakäriy. Wamayänakur pïmaywanpis kuyanakur kawapäkuy.
8 Waran waran tsayno kawapäkuptikiqa Señornintsi Jesucristuta reqishqaykipis manami manakaqpaqtsu kanqa. 9 Tsayno mana kawarqa qapra runa rikayta mana puëdishqannömi karkaykanki. Tayta Dios perdonashushqaykitapis qonqaykärishqankimi.
10 Wawqi panikuna, Tayta Dios qayashushqaykita y akrashushqaykita shumaq tantiyapäkunaykipaq imaykanöpapis pay munashqanno kawapäkuy. Tsaynöpami jutsa rurayman imaypis mana tunipäkunkitsu. 11 Tsaymi *mandaykashqanman chayaptiki salvamaqnintsi Señor Jesucristo kushishqa chaskipäkushunki.
12 Tsayno kaptinqa mayna musyarkaykaptikipis y Diospa wilakuyninta shumaq yachakushqa karkaykaptikipis tsaykunata imaypis yarpaykätsishaykimi. 13 Kawashqäyaqqa tsaykunata imaypis yarpätsishaykimi. 14 Wanunäpaqna kaykashqäta Señor Jesucristo musyatsimashqa kaptinmi 15 qamkunata yarpaykätsï wanuptïpis yätsishqäkunata mana qonqaypa yarparänaykipaq.
Jesucristo kutimunanpaq nishqan
16 Señor Jesucristo munayniyuq kashqanta y kutimunanpaq kashqanta manami yarpayniläpitatsu yachaykätsï, sinöqa chipchipyaykaqta kikï rikashqa karmi tsayno yachaykätsï. 17 Chipchipyaykaqman tikraptinmi Tayta Dios gloriapita kayno nimurqan: “Paymi kuyay Tsurï. Paypitami kushishqa kaykä”. 18 Tsayno nimushqanta kikïmi mayashqä Jesucristuwan *sagrädu jirka puntacho kaykar.*
19 Tsaymi masraq tantiyantsi profëtakuna wilakushqankuna rasunpa kashqanta. Tsayno kaykaptinqa profëtakuna qelqashqankunata shumaq cäsukäriy. Tsaykunaqa tsakaycho atski atskipämashqantsinömi kaykan. Tsayno cäsukäriy patsa waraptin waraq lucëru shonquykikunacho atsikyashqanyaq.*
20 Shumaq tantiyakäriy. Ama yarpapäkuytsu Tayta Diospa palabranta runakuna yarpaynilanpita qelqashqanta. 21 Tayta Diospa profëtankuna manami imaypis kikinkunapa yarpaynilanpitatsu qelqarqan, sinöqa Espíritu Santu tantiyatsiptinmi Tayta Diospa yarpayninta qelqarqan.*