Salmos

65 (2) Tayta Dios, *Siónchömi alabapäkushayki.

Qamta promitishqäkunatapis lapantami cumplipäkushaq.

 2 (3) Pipis manakamushuptiki qam mayankimi.

Lapan runakunapis adorashunaykipaq qammanmi shamunqa.

 3 (4) Yaparir yaparir jutsa rurayman tunipäkuptïpis qammi perdonamanki.

 4 (5) Kushishqami kawan templuyki patiucho taq runaqa.

Paytami akrashqanki nawpaykicho tänanpaq.

*Santu templuykicho bendicionnikita chaskirmi kushishqa karkaykä.

 5 (6) Salvakuq Tayta Dios, manakamushqäta mayarmi mantsariypaq kaqkunata rurar salvamashqanki.

Tsaymi lamar tsimpancho taq runakunapis qamman yärakamun.

Maytsaycho taq runakunapis qammanmi qelikärimun.

 6 (7) Mana kuyukunanpaqmi lapan jirkakunatapis munaynikiwan shumaq takyatsishqanki.

 7 (8) Lamar yaku qaparar pulchaqyaykaqta qammi chawätsinki.

Nacionkuna contrayki sharkuptinpis qammi upälatsinki.

 8 (9) Rurashqaykita rikarmi maytsaychöpis runakuna mantsakashqa rikakärin.

Inti jeqamunan lädupita inti jeqanan läduyaqmi kushishqa adorapäkushunki.

 9 (10) Qammi kay patsata makikicho tsararaykanki.

Mikuykuna wayunanpaqpis qammi tamyatsimunki.

Trïgu ali wayunanpaqpis qammi yakuta pashtatsimunki.

Tsaynömi chakrata noqakunapaq kamaripaykämanki.

10 (11) Barbichashqan chakrakunatapis yakuwanmi parqunki.

Tamyalawanmi kurpakunatapis latutsinki.

Murushqäkunamanpis bendicionnikitami churamunki.

11 (12) Bendicionnikita churamaptikimi watatsarkärïpis.

Pukutaynikipis bendiciontami apamun.

12 (13) Chunyaq jirkakunachömi qewapis loqluypa loqluykan.

Puntakunapis kuyaylapaq y kushishqami kaykan.

13 (14) Maytsay pampakunachöpis uyshakuna y cabrakunami tsaytsika karkaykan.

Qechwa chakrakunachöpis trïgumi juntaraykan.

Lapan tsaykunami pasaypa kushikushpan alabaykäshunki.*