1 Tesalonicenses
5 Wawqi panikuna, Señor Jesucristo imay höra ni imay junaq kutimunanpaq kashqanta mana musyarmi tsaypitaqa mana qelqamütsu. 2 Itsanqa musyapäkunkimi tsakaypa elaqpita suwa shamushqanno paypis elaqpita kutimunanpaq kashqanta.* 3 Imapis mana pasananpaq runakuna niykaptinmi warmita wachay nanay elaqpita tsarishqanno Tayta Diospa castïgun elaqpita shamunqa.* Tsay castïgupita manami pipis qeshpinqapaqtsu.
4 Wawqi panikuna, qamkuna manami tsakaqchönötsu karkaykanki Jesucristo suwano elaqpita kutimur kamarikünita tsapuykushunaykipaq. Tsaypa trukanqa lapayki atskichönömi kawarkaykanki. 5 - 6 Tsayno kaykaptinqa wakin runakuna punukashqa kashqannöqa ama kashuntsu, sinöqa mayaq mayaqla Jesucristuta shuyarpaykäshun.
7 Tsakäpakushqano kaqkunaqa punukashqano y shinkashqano karmi Jesucristo kutimunanpaq kashqanta mana tantiyapäkuntsu. 8 Noqantsiqa atsikyaqchöna kashpantsi shumaq tantiyakushun, Tayta Diosman yärakushun y piwanpis kuyanakushun. Tsayno kawarqa chalëcuntsi jatishqanömi kaykantsi. Tayta Dios salvamashqantsita shumaq tantiyarqa cascuntsi jatishqanömi kaykantsi.*
9 Manami castigashqa kanantsipaqtsu Tayta Dios akramashqantsi, sinöqa Jesucristuman yärakur salvashqa kanantsipaqmi. 10 Jesucristumi noqantsi rayku wanurqan kawaykarpis o wanurpis paywan juntu kawanantsipaq. 11 Tsayno kaykaptinqa imaypis shakyätsinakushqaykinöla jukniki juknikipis tantiyatsinakur shakyätsinakäriy.
Wawqi panikuna imanöpis kawananpaq yätsishqan
12 Wawqi panikuna, Señor Jesucristupa ali wilakuyninta yachatsishuqnikikunata ali rikapäkuy. Paykunami ali yachatsishunki y shakyätsishunki Tayta Dios munashqanno kawapäkunaykipaq. 13 Tsayno yachatsishushqaykipita paykunata respitar shumaq kuyapäkuy. Tsaynöpis mana chikinakuypa ali kawapäkuy.
14 Wawqi panikuna, arukuyta mana munaqkunata yätsiy arukärinanpaq. Lakishqa kaykaqkunata shakyätsiy kushishqa kawapäkunanpaq. Yanapaypaq kaqkunata imalawanpis yanapay. Pïmaypaqpis pacienciayki katsun. 15 Runa mayiki contrayki kaptinpis qamkunaqa paykunapa contran ama kaytsu. Tsaypa trukanqa yärakuq mayikiwan y pïmaywanpis ali kawapäkuy.
16 Imaypis kushi kushila kawapäkuy.* 17 Imay hörapis Tayta Diosta manakäriy. 18 Imapitapis Tayta Diosta agradëcikäriy. Jesucristupa makincho kaptikimi tsayno kawapäkunaykita Tayta Dios munan.*
19 Espíritu Santuta cäsukärinki. 20 Espíritu Santu tantiyatsishqanta pipis wilakuptin manakaqman ama churapäkunkitsu. 21 Itsanqa shumaq tantiyakärinki Espíritu Santupita kashqanta o mana kashqantapis.* Paypita kaptinqa chaskikärinki. 22 Ima jutsatapis ama rurapäkunkitsu.
23 Ali kawayta qomaqnintsi Tayta Dios yanapaykuläshunki munashqanno imaypis kawapäkunaykipaq. Tsaynöpis cuerpuykita, almaykita y espïrituykitapis ali rikaykulätsun Jesucristo kutimur jutsaynaqta taripäkushunaykipaq. 24 Qayashuqniki Tayta Diosqa promitishqanta imaypis cumplinmi. Tsaymi jutsaynaqta tarishunaykipaq imaypis yanapashunki.
Carta ushanan
25 Wawqi panikuna, noqakunapaqpis Tayta Diosta manakuykulanki. 26 Wawqi panikunata qaqlancho mutsashpayki winchikuykulay. 27 Señor Jesucristupa jutinchömi qamkunata ruwakü wawqi panikunata kay cartata liyipänaykipaq.
28 Señornintsi Jesucristo kuyapäshushpayki imaypis yanapaykuläshunki. [Amén.]