Mateo
Pitapis mana juzganantsipaq Jesús yachatsishqan
7 “Tayta Dios mana juzgashunaykipaq runa mayikita ama juzgaytsu. 2 Runa mayikita juzgaptikiqa Tayta Dios qamkunatapis juzgashunkipaqmi. Runa mayikita imanöpis yanapashqaykiman tupumi qamkunatapis Tayta Dios yanapashunkipaq. 3 Nawikicho jatunkaray qeru jatiraykaptinqa ¿imanirtaq runa mayikipa nawincho taksha oqsha jatiraykaqta rikaparkaykanki? 4 Nawikicho jatunkaray qeru jatiraykaptinqa ¿imanöparaq kayno ninkiman: ‘Nawikipita oqshata jorqapäshayki’? 5 ¡Ishkay cära runakuna! Puntataqa nawikicho kaykaq qerutaraq jorquy. Tsayraqmi shumaq rikankipaq runa mayikipa nawinpita oqshata jorqupänaykipaq.*
6 “*Sagrädu kaqtaqa alqukunata ama jitapaytsu. Perlasnikitaqa kuchikunata ama jitapaytsu. Jitapaptikiqa kuchikuna jarukunqami y alqukuna kanir ushashunkimi.*
Mana ajayaypa Tayta Diosta manakunantsipaq Jesús yachatsishqan
7 “Manakuptikiqa Tayta Dios kamaripäshunkimi. Ashirqa tarinkimi. Punkuta takakuptikiqa kichapäshunkimi. 8 Manakuq kaqqa chaskinmi. Ashiq kaqqa tarinmi.* Punkuta takakuq kaqtaqa kichapanmi.
9 “Mayqaykitapis wamrayki tantata manakushuptiki ¿rumita aptaparkunkimantsuraq? 10 Pescäduta manakushuptiki ¿culebrata qarankimantsuraq? 11 Qamkuna mayjina fiyu kaykarpis wamraykikunata ali kaqlata qaraykaptikiqa ¿manatsuraq jana patsacho kaykaq Taytaykipis manakuq kaqta ali kaqkunata kamaripanqa?*
Runa mayintsita ali rikanantsipaq Jesús yachatsishqan
12 “Imanömi runa mayiki ali rikashunaykita munanki, tsaynöla qamkunapis runa mayikita ali rikapäkunki.* Tsayno kawanantsipaqmi Moisés qelqashqancho y profëtakuna qelqashqanchöpis niykan.
Kichki punkuman Jesús tinkutsishqan
13 “Kichki punkupa yaykapäkuy. Anchu punkupa yaykuqkunaqa jatun nänipami infiernuman aywarkaykan. Atskaqmi tsay punkupa yaykurkaykan. 14 Kichki kaq punkupa yaykuqkunami itsanqa llanu nänipa gloriaman aywarkaykan. Walkaqlami tsay punkupa yaykurkaykan.
Lutan yachatsikuqkuna pï kashqanpis
15 “Profëta tukuqkunata paqta chaskipankiman. Paykunaqa uyshano shamurpis wanutsikuq *löbunömi karkaykan. 16 Yörata wayuyninpa reqishqantsinömi runakunatapis imano kawashqanta rikar reqintsi. Manami kashakunapitatsu üvata palantsi ni cardonkunapitatsu hïgustapis shuntantsi. 17 Ali yöraqa alitami wayun. Mana ali yörami itsanqa mana alita wayun. 18 Tsaynölami ali wayuq yöraqa mana alitaqa wayuntsu. Mana ali wayuq yörapis manami alitaqa wayuntsu. 19 Tsay yörataqa muturir ninamanmi qaykuntsi.* 20 Yörata wayuyninpa reqishqantsinömi runakunatapis imano kawashqanta rikar reqintsi.*
Tayta Diosta cäsukuqkunala paypa nawpanman chayananpaq Jesús yachatsishqan
21 “Manami jutïta joqarishqalanpitatsu jana patsacho kaykaq Taytä *mandaykashqanman yaykunqa. Tsaymanqa yaykunqa pay munashqanno kawaqkunalami. 22 Juiciu final junaqcho atskaqmi kayno nimanqa: ‘Tayta, Tayta, qampa wilakuynikitami wilakurqä. Tsaynöpis qampa jutikichömi *supaykunatapis qarqurqä. Tsaynölami qampa jutikicho milagrukunatapis rurarqä’. 23 Tsayno nimaptinmi kayno nishaqpaq: ‘Qamkunataqa manami reqïtsu. ¡Jutsasapa runakuna, nawpäpita witikäriy!’*
Cäsukuq runa y mana cäsukuq runa imano kashqanpis
24 “Nishqäkunata cäsukamaq runaqa qaqa janancho wayita sharkatsiq runanömi kaykan. 25 Tsay wayiqa fiyupa tamyaptinpis, mayu chayaptinpis y fiyupa wayraptinpis manami juchunqatsu.
26 “Nishqäkunata mana cäsukamaq runami itsanqa aquysha janalancho wayita sharkatsiq runano kaykan. 27 Tsay wayiqa fiyupa tamyaptin, mayu chayaptin y fiyupa wayraptin juchukäkunqami. Tsaynölami mana cäsukamaq runa pasaypa kuyapaypaq kanqa”.
28 Jesús tsayno yachatsiptinmi runakuna fiyupa espantashqa rikakurqan. 29 Manami leyta yachatsiq runakunanötsu yachatsirqan, sinöqa munayniyuq karmi shumaq yachatsirqan.*