Mateo
Milagrutaraq rikayta munapäkushqan
Marcos 8.11-13; Lucas 12.54-56
16 Jesústa manakaqman churayta munarmi *fariseukuna y *saduceukuna aywaykur kayno nipäkurqan: “Tayta Dios rasunpa kachamushushqaykita musyapäkunäpaq ima milagrutapis ruray, tayta”.*
2 Tsaymi Jesús kayno nirqan: “Inti jeqashqan höra pukutay qarwashtaptin kaynömi nipäkunki: ‘Wara usyanqami’. 3 Pukutaraykar warämuptinnami kayno nipäkunki: ‘Kanan junaqqa tamyanqami’. [¡Ishkay cära runakuna!] Tsaykunata tantiyaykarqa ¿imanirtaq rurashqäkunata rikaykar Tayta Dios kachamashqanta mana tantiyapäkunkitsu? 4 ¡Mana cäsukuq jutsasapa runakuna! Milagruta ruranäta munaptikipis* manami ima milagrutapis rurashaqtsu. Tsaypa trukanqa profëta Jonásta salvar milagruta rurashqannömi Tayta Dios juk milagruta ruranqa”.
Tsayno nirkurmi Jesús aywakurqan.
Fariseukunapa yachatsikuyninta levadüraman Jesús tinkutsishqan
5 Qochata tsimparkurmi Jesúspa discïpulunkuna yarparkurqan tantata qonqapäkamushqanta. 6 Tsaymi Jesús kayno nirqan: “*Fariseukunapa y *saduceukunapa levadüranta cuidädu chaskipäkunkiman”.*
7 Tsayno niptinmi discïpulunkuna kikinpura kayno ninakurqan: “Tantata mana mirkapakamushqantsipitami tsayno niykämantsi”.
8 Tsayno parlaykashqanta tantiyarmi Jesús kayno nirqan: “¡Janan shonqula yärakuq runakuna! ¿Imanirtaq parlarkaykanki tantata mana apamushqaykipita? 9 ¿Imanirtaq mana tantiyapäkunkitsu imapita parlaykashqätapis? ¿Manaku yarpapäkunki pitsqa tantalapita pitsqa waranqa (5,000) runakuna mikunanpaq milagruta rurashqäta? ¿Manaku yarpapäkunki putsuq tantata ayka canastata shuntashqaykitapis?* 10 Tsaynöpis ¿manaku yarpapäkunki qanchis tantalapita chusku waranqa (4,000) runakuna mikunanpaq milagruta rurashqäta y putsuq tantata ayka canastata shuntashqaykitapis?* 11 ¿Imanirtaq mana tantiyapäkunkitsu tantapaq mana parlashqäta? Qamkunata tsayno niykä fariseukunapa y saduceukunapa levadüranta mana chaskipänaykipaqmi”.
12 Tsayno niptinmi tantiyapäkurqan levadürapita mana parlaykashqanta, sinöqa fariseukunapa y saduceukunapa yachatsikuyninta mana chaskipänanpaq niykashqanta.
Jesúsqa Cristo kashqanta Pedro nishqan
13 Cesarea de Filipos kinrayman chayaykurmi discïpulunkunata Jesús tapurqan kayno nir: “*Runapa Tsurin ¿pï kashqantataq runakuna nirkaykan?”
14 Tsawraqa discïpulunkuna nipäkurqan: “Wakin nipäkun Bautizaq Juan kashqaykita. Wakinnami nipäkun profëta Elías kashqaykita. Wakinnami nipäkun profëta Jeremías o mayqan profëtapis kashqaykita”.*
15 Nipäkuptinmi yapay tapurqan: “Qamkunaqa ¿pï kashqätataq yarpapäkunki?”
16 Tsawraqa Simón Pedro kayno nirqan: “Qamqa imayyaqpis kawaq Tayta Diospa Tsurinmi kaykanki. Pay kachamushqan Cristumi kaykanki”.*
17 Tsaymi Jesús kayno nirqan: “Jonáspa tsurin Simón, alitami nishqanki. Tsayno ninaykipaq manami runatsu tantiyatsishushqanki, sinöqa jana patsacho kaykaq Taytämi. 18 Qamta nï Pedro* kashqaykitami. Kay rumi jananchömi *iglesiäta sharkatsishaq. Tsay iglesiataqa *Satanáspis manami vincinqatsu. 19 Qamtami qoykushayki Tayta Dios *mandaykashqanman yaykuna llävinpa wawankunata. Tsaymi kay patsacho watashqaykiqa jana patsachöpis watashqa kanqa. Kay patsacho paskashqaykiqa jana patsachöpis paskashqami kanqa”.* *
20 Tsayno nirkushpanmi discïpulunkunata kayno nirqan: “Tayta Dios kachamushqan Cristo kashqäta pitapis ama wilapäkunkitsu”.*
Wanunanpaq kashqanta Jesús wilakushqan
Marcos 8.31—9.1; Lucas 9.22-27
21 Tsaypitanami discïpulunkunata Jesús wilaparqan kayno nir: “Imano kaptinpis Jerusalénman aywashaqraqmi. Tsaychömi Israel mayor runakuna, mandaq cürakuna y ley yachatsiqkuna fiyupa nakatsimar wanutsimanqa. Wanutsimashqanpita kimsa junaqtami kawarimushaqpaq”.
22 Tsayno niptinmi juk läduman qayaykur Pedro olqüparqan kayno nir: “Tayta, tsaytaqa Tayta Dios ama munaykulätsuntsu. ¡Tsaynöqa ama kaykulätsuntsu!”
23 Tsayno niptin Pedro kaqpa tikraykur Jesús kayno nirqan: “¡Nawpäpita witikuy, *Satanás! ¡Ama tsapata churapämaytsu! Qam manami munankitsu Tayta Dios munashqanta ruranäta, sinöqa runa munashqanta ruranätami munaykanki”.
24 Nirkurmi discïpulunkunata Jesús kayno nirqan: “Pipis discïpulü kayta munarqa kikin munashqanno ama kawatsuntsu, sinöqa cruzninta apaqno noqata qatirämätsun.* * 25 Kawayninta salvayta munaqkunaqa kawayninta oqranqami. Kawayninta noqa rayku oqraqkunami itsanqa kawayninta salvanqa.* * 26 Infiernuman qaykushqa kananpaq kaptinqa ¿imapaqtaq välin intëru munduta munaynincho tsararashqanpis? Mayjina rïcu karpis manami rïcu kashqanwanqa salvacionta rantinqatsu.
27 “*Runapa Tsurin *angilninkunawan y Taytanpa munayninwan shamurmi* imanöpis kawashqanman tupu pitapis juzganqa.* 28 Rasunpami kayno nï: Manaraqpis wanurmi wakinniki rikapäkunki Runapa Tsurin lapantapis mandananpaq aywaykämuqta”.