Juan
Jesús näni kashqan
14 “Ama lakikäriytsu. Tayta Diosmanpis y noqamanpis yärakärimuy. 2 Taytäpa wayinchöqa atskami cuartukuna kaykan. Tsayno mana kaptinqa manami ‘qamkunapaq cuartu kamarikuq aywashaq’ nïmantsu karqan. 3 Kamarirkamurnami qamkunata pushanäpaq kutimushaq. Tsaynöpami noqa kashqä kaqcho qamkunapis kankipaq. 4 Musyankimi mayqan nänipa tsayman chayanaykipaq kashqantapis”.
5 Tsayno niptinmi Tomás kayno nirqan: “Tayta, mayman aywanaykipaq kashqantapis mana musyaykarqa ¿imanöpataq nänita reqïman?”
6 Tsaymi Jesús kayno nirqan: “Noqami näni kaykä, rasun kaqmi kaykä y runakunata kawayta qoqmi kaykä. Noqata mana chaskikamarqa Taytä kaqman manami pipis chayanqatsu.* 7 Noqata *reqimarqa Taytätapis reqipäkunkimi. Tsaymi kananpitaqa payta rikashqankina y reqinkina”.
8 Felipinami kayno nirqan: “Tayta Diosta reqiykatsilämay, Tayta. Reqitsimaptikiqa manami tapukushaykinatsu”.
9 Tsaymi Jesús kayno nirqan: “Felipe, nawpapitana qamkunawan kaykaptï ¿manaku reqimankiraq? Noqata reqimaq kaqqa Taytätapis reqinmi. Reqiykämarqa ¿imanirtaq: ‘Taytaykita reqitsimay’ nimanki? 10 ¿Manaku criyinki Taytäwan juklayla kaykashqäta y Taytäpis noqawan juklayla kaykashqanta? Tsaymi qamkunata nishqäkunaqa kikïpa yarpayniläpitatsu kaykan, sinöqa noqacho kaykaq Taytäpitami. Paymi munashqanta noqawan ruran. 11 Taytäwan juklayla kaykashqäta y paypis noqawan juklayla kaykashqanta niykaptïqa criyipäkuy. Nishqäkunata mana criyimashpaykipis milagru rurashqäkunata rikaykarqa criyipäkuy.
12 “Rasunpami kayno nï: Taytä kaqman aywakuptï noqaman yärakamaqkunaqa noqa rurashqänömi rurapäkunqa. Mas espantaypaq kaqkunatapis rurapäkunqami. 13 Noqapa jutïcho imatapis Taytäta manakäriptikiqa rurashaqmi. Tsurin karmi tsayno rurashaq Taytä alabashqa kananpaq. 14 Jutïcho imatapis manakuptikiqa manakamashqaykita rurashaqmi.*
Espíritu Santuta kachamunanpaq Jesús nishqan
15 “Noqata kuyamarqa lapan mandamientükunata cumplipäkuy.* 16 Tayta Diosta ruwakuptïmi juk Yanapakuqta kachamunqapaq. Paymi imayyaqpis qamkunawan kaykanqa. 17 Payqa rasun kaqta tantiyatsikuq Espíritu Santumi kaykan. Tayta Diosta mana cäsukuqkunaqa Espíritu Santutapis manami chaskikunqatsu. Tsayno mana chaskikunqatsu payta mana ashir y payta mana reqirmi. Qamkunami itsanqa reqipäkunki qamkunawan kaykaptin y qamkunacho kananpaq kaptin.
18 “Qamkunata manami waktsataqa kachashaykitsu, sinöqa kutimushaqmi. 19 Walka junaqlanami pishiykan runakuna mana rikamänanpaq. Qamkunami itsanqa rikamankipaq. Noqa kawashqäpitami qamkunapis kawapäkunkipaq. 20 Tsay junaqmi tantiyapäkunki Taytächo noqa kaykashqäta, noqacho qamkuna kaykashqaykita y qamkunacho noqa kaykashqätapis. 21 Mandamientükunata cumpliq kaqmi rasunpaqa kuyaman. Kuyamaq kaqtaqa Taytäpis kuyanmi. Noqapis kuyarmi paywan kaykäshaq”.
22 Mana Iscariote kaq Judasnami tapurqan kayno nir: “Noqakunawan kaykarqa ¿imanirtaq wakin runakunawanpis mana kankipaqtsu, Tayta?”
23 Tsaymi Jesús kayno nirqan: “Pipis kuyamarqa nishqäkunata cäsukunmi. Kuyamaq kaqtaqa Taytäpis kuyanmi. Tsaymi Taytäwan shamur imayyaqpis paywan kaykäshaq. 24 Mana kuyamaqkunaqa nishqäkunata manami cäsukärintsu. Noqa nishqäkunaqa manami kikïpa yarpaynïpitatsu kaykan, sinöqa kachamaqnï Taytäpitami.
25 “Lapan kaykunata niykä qamkunawan kaykashqäyaqmi. 26 Aywakuptïnami noqapa trukä Yanapakuq Espíritu Santuta qamkunaman Taytä kachamunqa. Paymi lapanta yachatsishunki y lapan yachatsishqäkunata yarpätsishunki.
27 “Jawka kawaytami qamkunata kachapaykü. Ali kawaynïtami qamkunata qoykü. Noqa yanapashqäno manami pipis yanapashunkitsu. Ama lakikäriytsu ni mantsakäriytsu. 28 Qamkunata maynami nishqä aywakurpis kutimunäpaq kashqanta. Taytä kaqman aywakuptï ama lakikärinkitsu. Payqa noqapita mas munayniyuqmi kaykan. Rasunpa kuyamarqa lakikunaykipa trukan kushikärinkimanmi. 29 Qamkunata tsayno wilapaykä manaraq aywakurmi. Aywakuptïnami musyapäkunkipaq nishqäkuna rasunpa kashqanta.
30 “Kay patsapa mandaqnin aywaykämunnami.* Tsaymi qamkunawan aläpaqa mana parlashaqnatsu. Wanutsimänanpaq manami paypa munaynin kantsu. 31 Tsayno kaptinpis Taytä nimashqanta rurarmi wanutsimänanpaq kachapäshaq. Tsaynöpami runakuna musyanqa Taytäta kuyashqäta. ¡Sharkuy, kaypita jukla aywakushun!”