Lucas
Jesústa Satanás tentayta munashqan
4 Bautizakurir Espíritu Santupa munaynincho Jesús kaykaptinmi Jordán mayupita chunyaq jirkaman Espíritu Santu pusharqan. 2 Tsaycho chusku chunka (40) junaq kaykaptinmi diablu tentarqan. Tsay junaqkuna imatapis mana mikurmi Jesús pasaypa mikanarqan.
3 Tsaymi diablu kayno nirqan: “Diospa Tsurin kaykarqa mä kay rumita tantaman tikratsiy”.
4 Tsayno niptinmi Jesús kayno nirqan: “Tayta Diospa palabrancho kaynömi qelqaraykan: ‘Manami tantata mikulartsu runa kawan, [sinöqa Tayta Dios nishqankunata cäsukurmi kawan]’ ”.*
5 Tsaypitanami altunnin puntaman diablu pushaykur maytsay nacionkunata rätula rikarkatsir 6 kayno nirqan: “Lapan rikashqayki nacionkunata y tsaycho kaq riquëzakunatami qoykushayki. Tsaykuna noqapa kaptinmi munashqä kaqta pitapis qoykushaq. 7 Qonqurpaykur adoramaptikiqa lapan rikashqaykikunatami qoykushayki”.
8 Tsaymi Jesús kayno nirqan: “[¡Witikuy, *Satanás!] Tayta Diospa palabrancho kaynömi qelqaraykan: ‘Tayta Dioslata adorapäkunki. Pay japalanta sirvipäkunki’ ”.*
9 Tsaypitanami Jerusalénman Jesústa diablu pusharqan. Tsaychönami templupa altunnin kaq puntanman ichiykatsir kayno nirqan: “Diospa Tsurin karqa mä kaypita jeqay. 10 Diospa palabrancho kaynömi qelqaraykan: ‘*Angilninkunatami Tayta Dios kachamunqa imapitapis tsapäshunaykipaq. 11 Paykunami tsarishunki chakilaykitapis rumikunaman mana takakunaykipaq’ ”.*
12 Niptinmi Jesús kayno nirqan: “Tsaynöpis Tayta Diospa palabrancho kaynömi niykan: ‘Tayta Diosta ama tentankitsu’ ”.*
13 Jesústa tentayta mana kamäpakurnami diablu aywakurqan yapay kutimunanyaq.
Galileacho Jesús wilakuyta qalaykushqan
14 Tsaypitanami Espíritu Santupa munayninwan Galileaman Jesús kutirqan. Tsay markakunachömi Jesús ali yachatsikuq kashqanta runakuna parlapäkuq. 15 *Sinagögakunacho yachatsiptinmi payta kayno nir alabapäkurqan: “¡Payqa alimi yachatsin!”
Nazaret markacho Jesús wilakushqan
16 Tsaypitanami markan Nazaretman Jesús kutiykur costumbrin kashqanno jamay junaqcho *sinagögaman aywarqan. Tsaychömi Tayta Diospa palabranta liyimunanpaq runakunapa nawpanman ichirqan. 17 Profëta Isaías qelqashqan rölluta makyaptinmi liyiyta munashqanta kicharkur liyimurqan kayno nir:
18 “Tayta Diosmi Espïritunta noqaman kachamushqa.
Paymi akramashqa waktsakunata ali wilakuyninta wilanäpaq.
Tsaynöpis kachamashqa [lakishqa kawaqkunata shakyätsinäpaq,]
juk lädu nacionman prësu apashqankuna librina kashqanta wilanäpaq,
qaprakunapa nawinta aliyätsinäpaq,
contrankunapa makincho nakaykaq runakunata jorqunäpaq
19 y Tayta Dios salvananpaq kaq tiempu chayamushqanta wilakunäpaq”.*
20 Tsayno liyirkurnami rölluta wankurkur kutiykatsirqan sinagögacho yanapaq runata. Jamaykuptinnami tsaycho kaykaq runakuna payta rikarpaykarqan. 21 Tsaymi Jesús kayno nirqan: “Liyipämushqächo nishqannömi kanan cumplishqa kaykan”.
22 Tsayno niptinmi runakuna kushikushpan nipäkurqan: “¡Payqa shumaqmi parlan! ¿Manaku Josépa tsurilan kaykan?”
23 Tsawraqa Jesús kayno nirqan: “ ‘Jampikuq karqa kikikiraq jampikuy’ nishqannöchari qamkunaqa munarkaykanki Capernaúmcho milagruta rurashqäno kay markantsichöpis milagruta ruranäta”.
24 Nirkurmi kayno nirqan: “Rasunpami kayno nï: Manami mayqan profëtatapis markanchöqa chaskikärintsu. 25 Rasunpami kayno nï: Profëta Elías kawanan witsan kimsa wata soqta killan mana tamyaptin maytsay Israel markakunacho fiyupa muchuy karqan. Tsay witsan Israel nacioncho atska viüdakunami karqan. 26 Tsayno kaykaptinpis Tayta Dios Israelcho mayqan viüdata yanapananpaqpis manami Elíasta kacharqantsu, sinöqa Sidóncho kaq Sarepta markacho taq viüdalata yanapananpaqmi kacharqan.
27 “Profëta Eliseo kawanan witsanpis Israelcho *leprawan qeshyaykaqkuna atskami karqan. Tsayno kaykaptinpis manami mayqantapis Eliseo aliyätsirqantsu, sinöqa Siria nacionpita kaq Naamánlatami aliyätsirqan”.
28 Jesús tsayno niptinmi sinagögacho kaykaq runakuna fiyupa rabyakärirqan. 29 Tsaymi Jesústa markapita jorqur marka kuchun tunaman apapäkurqan tsaypita tanqarinanpaq. 30 Tsayno aparkaykaptinmi chawpinpita Jesús aywakurqan.
Supay löcuyätsishqan runata Jesús aliyätsishqan
31 Tsaypitami Galileacho Capernaúm markaman Jesús aywarqan. Tsaychömi cada jamay junaq runakunata yachatsirqan. 32 Ali yachatsishqanta mayashpanmi kushikur kayno nipäkurqan: “¡Payqa munayniyuq karmi shumaq yachatsimantsi!”
33 Tsay *sinagögachömi kaykarqan *supay löcuyätsishqan runa. Paymi qaparar kayno nirqan: 34 “¡Nazaretpita kaq Jesús, [kaypita aywakuy]! ¿Imatataq noqakunawan munanki? ¿Ushakätsimänaykipaqku shamushqanki? ¡Noqa musyämi Tayta Dios kachamushqan *santu runa kashqaykita!”
35 Tsawraqa supayta olqüpar Jesús kayno nirqan: “¡Upälala kay runapita yarquy!”
Tsayno niptinmi lapan runakunapa nawpancho tsay runata saqtariykur aywakurqan. Saqtarpis manami däñarqantsu. 36 Tsayta rikaykurmi kushikärishpan juknin jukninpis kayno nipäkurqan: “¡Imatanataq rikantsi! ¡Munayninwan niptin supaykunapis cäsukurmi aywakärin!”
37 Supayta qarqushqanta mayaykurmi intëru Galileacho Jesús munayniyuq kashqanta parlapäkuq.
Pedrupa suedranta Jesús aliyätsishqan
38 *Sinagögapita yarqurirnami Simónpa wayinman Jesús aywarqan. Chayananpaq Simónpa suedran shanapäkuy qeshyawan antsa jitaraptinmi Jesústa ruwakärirqan aliyätsinanpaq. 39 Tsawraqa qeshyaq kaqman witiykur shanapäkuy qeshyata olqüpaptin jinan höra aliyarqan. Aliyarkurnami mikuyta paykunata qararqan.
Atska qeshyaqkunata Jesús aliyätsishqan
40 Inti jeqaykaptinnami tukuy niraq qeshyawan qeshyaykaqkunata Jesúsman apapäkamurqan. Makinta jananman churaykularmi paykunata aliyätsirqan. 41 Wakin qeshyaqkunapitanami *supaykunapis yarqupäkurqan kayno qaparpashpan: “¡Qamqa Diospa Tsurinmi kanki!”
Tayta Dios kachamushqan Cristo kashqanta supaykuna niptinmi Jesús olqüparqan mana rimakunanpaq.
Jesús wilakur purishqan
42 Patsa wararkuptinnami chunyaqninman Jesús aywakurqan. Tsawraqa runakuna ashishpan pay kaykashqan kaqman chayaykur manakärirqan paykunapita mana aywakunanpaq. 43 Tsaymi Jesús kayno nirqan: “Tayta Dios *mandaykashqanpa ali wilakuyninta wakin markakunachöpis wilakunämi kaykan. Tsaypaqmi Tayta Dios kachamashqa”.
44 Nirkurnami intëru Israel markakunapa purir* *sinagögakunacho Tayta Diospa wilakuyninta Jesús wilakurqan.