Isaías
Jutsa ruraqkunata castigananpaq nishqan
65 Tayta Dios kaynömi nin:
“Mana manakamaqkunatami yanapashqä.
Mana *ashimaqkunatami parlapashqä.*
Mana ruwakamaq runakunatami kayno nishqä: ‘¡Yanapanäpaq kaychömi kaykä!’
2 Mana cäsukamaq runakunaman waran waranmi rikräta makyarashqä.
Yanapayta munaykaptïpis kikinkuna munashqannömi lutankunata rurar kawarkaykan.*
3 Nawpächo lutankunata mana kachaypa rurashpanmi pasaypa rabyanätsiman.
Ïdulukunapaq sacrificiutapis huertakunachömi rupatsipäkun.
Adöbiwan perqashqa *altarkunachöpis ïdulukunapaqmi inciensuwan qoshtatsipäkun.
4 Wanushkunapa almankunata tapukurmi panteonkunacho waräkärin.
Kuchi aytsatami mikupäkunpis.*
Mana mikuna uywakunapa aytsantami caldurkaykan.
5 “Tsayno ruraykarmi runa mayinta kayno nipäkun:
‘¡Noqakuna qamkunapita mas *santumi karkaykä!
¡Nawpäman ama witipäkamuytsu!
¡Ama yatapäkamaytsu!’
“Utsuta rupatsiptin qoshquynin senqäta rawrätsiqnömi tsay runakuna jutsata rurar rabyanätsiman.
Nina mana upiypa rataqnömi lutankunata mana kachaypa rurarkaykan.
6 Paykuna jutsata rurashqan lapanmi librücho qelqaraykan.
Mana castigaypaqa manami kachaykushaqtsu.
Lutankunata rurashqanman tupumi castigashaq.
7 Unay aylunkunanölami jirkakunacho inciensuwan ïdulukunata qoshtarkaykätsin.
Jirkankunacho ïdulukunata adorarmi rabyaykätsiman.
Tsaymi kikinkunapa jutsanpita y unay aylunkunapa jutsanpita castigashaq.
Lutankunata rurashqanman tupumi castigashaq”.
TAYTA DIOSMI tsayno nin.
Sirviqninkunata salvananpaq nishqan
8 TAYTA DIOSMI kayno nin:
“Juk sartalatapis ali üvata tariykurqa kushishqami kayno nipäkun:
‘Kay üvaqa wayuykanmi. Ama mutushuntsu’.
Runakuna nishqannölami noqapis jutsa ruraqkunata ushakätsirpis sirvimaqnïkunataqa salvashaq.
9 Tsaymi nacionnïcho tänanpaq Israel runakunapita y Judá runakunapita akrashaq.
Tsay akrashqä runakunapa herencianmi kay nación kanqa.
Sirvimaqnïkuna kashpanmi kaycho tanqa.
10 Sarón pampapis noqaman yärakamuq runakunapa uysha mitsikunanmi kanqa.
Acor Pampachöpis wäkankunatami mitsikärinqa.*
11 “Wakinnikikunami itsanqa kachariykamashqanki.
*Sagrädu jirkätapis manami cäsupankinatsu.
‘Suertita taritsikuq diospaq’ nirmi ïdulukunapaq mikuykunata aparkaykanki.
‘Ali destïnuta taritsikuq diospaq’ nirmi vïnutapis jichaparkaykanki.
12 Tsayno rurashqaykipitami espädawan wanutsishunaykipaq destinashayki.
Qayakuptïpis manami mayamashqankitsu.
Parlapaptïpis manami cäsumashqankitsu.
Qamkunaqa mana munashqä kaqta y mana gustämashqan kaqtami rurarkaykanki”.*
13 Tsaymi TAYTA DIOS kayno nin:
“Sirvimaqnïkunaqa saksashqanyaqmi mikupäkunqa.
Qamkunami itsanqa yarqanankipaq.
Sirvimaqnïkuna upunanpaqpis yaku kanqami.
Qamkunami itsanqa pasaypa yakunankipaq.
Sirvimaqnïkunaqa kushishqami kawapäkunqapaq.
Qamkunami itsanqa penqaycho kankipaq.
14 Sirvimaqnïkunaqa lapan shonqunwan kushikurmi cantapäkunqa.
Qamkunami itsanqa shonqu nanaywan ataypa atar waqankipaq.
15 “Kikïmi qamkunata wanutsishayki.
Tsaymi pipis rabyanätsiq runata maldicionar kayno ninqa:
‘Israel runakunatanömi qamtapis wanutsishunkipaq’.
Sirvimaqnïkunatami itsanqa mushuq jutita churapäshaq.
16 Tsay witsan pipis bendicionta qoq kaqqa noqapa jutïchömi bendicionta qonqa.
Tsaynölami pipis juraq kaqqa noqapa jutïcho juranqa.
Unay nakashqankunatapis qonqaykärinqami.
Jutsata rurapäkushqanpita castigashqätapis manami yarparanqanatsu”.
Ciëlupis y kay patsapis mushuq kananpaq nishqan
17 “Mushuq ciëlutapis y mushuq patsatapis noqami kamashaq.*
Lapanpis mushuqna kaptin unay pasashqan kaqkunataqa pipis manami yarpanqanatsu.
18 Tsayno kananpaq kaykaptinqa ¡kushikäriy!
Kushikuypaq kananpaqmi mushuq Jerusalénta kamashaq.
Tsaycho taqkunaqa kushishqami imayyaqpis kawapäkunqa.
19 Mushuq Jerusalénta rikar kikïpis kushikushaqmi.
Kuyashqä runakuna tsaycho taykaqta rikar shumaqmi kushikushaq.
Tsaychöqa manami waqaypis ni lakikuypis kanqanatsu.*
20 “Wamrakunapis yurirkularqa manami wanunqanatsu.
Awkinkunapis pasaypa awkinyashqanyaqmi kawanqa.
Pachak (100) watayuq wanuqkunapis mözularaq kaykar wanuqnömi kanqa.
Pachak watamanpis manaraq chayar wanuqtaqa maldicionädu kashqantami nipäkunqa.
21 “Wayinkunata ruraykurmi kuyashqä runakuna tsaycho tanqa.
Üvata plantarmi wayuyninta mikupäkushpan kawanqa.*
22 Wayita sharkatsishqanchöpis manami juk runakunatsu tanqa, sinöqa kikinkunami tsaycho tanqa.
Üvata plantashqantapis manami juk runakunatsu palar apakärinqa, sinöqa kikinkunami palapäkunqa.
Yörakuna atska wata kashqannömi kuyashqä runakunapis atska wata kawapäkunqa.
Ali arukurmi akrashqä runakuna kushishqa kawapäkunqa.
23 Manakaqlapaqqa manami arukärinqatsu.
Wamrankunapis manami wanunqanatsu.
Tsayno kanqa bendicionnïta chaskiq runakunapita miraq kashpanmi.
Paykunapita miraqkunapis tsaynölami bendicionnïta chaskipäkunqa.
24 “Manaraqpis manakamaptinmi yanapashaq.
Ruwakamayta manaraq ushaptinmi paykunata awnishaq.
25 Uyshawan atuqpis talukashqami qewata mikunqa.
Leonpis wäkanömi qewata mikunqa.
Culebrami itsanqa maldicionädu kar alpalata mikur kawanqa.*
*Sagrädu jirkannïchöqa manami pipis mana alikunata ruranqanatsu”.*
TAYTA DIOSMI tsayno nin.