Eclesiastés
Lapantsipis ushakaqla kashqantsi
9 Kay patsacho imanir lapan pasashqankunatapis musyanäpaq lapan shonqüwanmi shumaq yarpachakushqä. Tsayno yarpachakurmi kayno nishqä: Ali runa karpis ni tantiyakuq runa karpis manami musyantsitsu arushqantsi tupu Tayta Dios bendicionninta churamunanpaq kashqanta o mana churamunanpaq kashqantapis.* Tsaynöpis manami musyantsitsu wara warantinkuna imano kanantsipaq kashqantapis.
2 Itsanqa musyantsimi lapantsipis ushakänantsipaq kashqanta. Tsayno ushakäshun ali runa karpis o fiyu runa karpis, Dios munashqanno kawarpis o pay munashqanno mana kawarpis, Diospaq sacrificiuta rupatsirpis o mana rupatsirpis, jutsaynaq karpis o jutsayuq karpis, alita ruranantsipaq Diosta promitirpis o payta mana promitirpis. 3 Kay patsacho lapan runa wanukuqla kashqanqa lakikuypaqmi kaykan. “Wanurqa ushakäshaq” nirmi runakuna shonqun munashqanno mana alikunata rurapäkun. 4 Tsayno kaptinpis wanushqantsipitaqa kawaykashqantsimi mas ali kaykan. Rimaypis kaynömi nin: “Wanushqa leonpitaqa awkis alqulapis mas alimi kaykan”.
5 Lapantsipis musyantsimi wanunantsipaq kashqanta. Wanukurnaqa manami imatapis musyashunnatsu ni imatapis munashunnatsu. Wanukuptintsiqa manami pipis yarpämäshunnatsu. 6 Tsaynölami kuyakuq kashqantsipis, chiki kashqantsipis y imata munashqantsipis ushakanqa. Ushakarnaqa kay patsacho manami imatapis rurashunnatsu.
7 Tsayno kaykaptinqa kawashqaykiyaq mikuyta kushishqa mikunki y vïnuta kushishqa upunki. Tsayno rurashqaykiqa Tayta Diospaq alimi kaykan. 8 Lakikunaykipa trukanqa ali röpata jatikushpayki perfümita umaykiman winakunki.
9 Kay patsacho Tayta Dios qomashqantsi kaway pasaqla kaykaptinqa warmikiwan kuyanakur waran waran kushishqa kawanki.* Tsayno kawashqaykimi päguyki kaykan kay patsacho fiyupa nakar arushqaykipita. 10 Tsawraqa lapanta kushishqa ruranki. Wanurnaqa manami imatapis rurankinatsu, yachankinatsu ni musyankinatsu.
11 Kay patsacho mas imata rikashqätapis kanan wilashayki.
Mas cörriq karpis yalinakuycho manami cadalatsu gänan.
Mas kalpayuq karpis pelyacho manami cadalatsu vincin.
Mas tantiyakuq karpis manami cadalatsu imaykayuqpis kaykan.
Mas ali yarpayniyuq karpis manami cadalatsu mas qellayta gänan.
Mas yachaq karpis manami cadalatsu kuyashqa kaykan.
Lapantsipaqmi alipis mana alipis suertintsi kaykan.
12 Tsaynöpis manami musyantsitsu imay höra desgracia pasamänantsipaq kashqanta. Redwan pescäduta elaqpita tsarishqanno y toqlawan* pishquta elaqpita tsarishqannömi runatapis desgracia elaqpita pasan.
13 Kay patsacho mas juktapis rikashqämi. Kanan tantiyatsishayki imata rikashqäta y imata tantiyakushqätapis. 14 Rikashqä juk taksha markacho walkala runakuna kaykaqta. Tsaymanmi munayniyuq rey atacananpaq chayaykur jiruruq churanakurqan. Nirkurmi markaman soldädunkunawan yaykunanpaq kamarikurqan. 15 Tsay markachömi tantiyakuq waktsa runa tarqan. Tsay runami tantiyakuq kashpan marka mayinkunata yätsirqan imanöpapis salvakärinanpaq. Yätsishqanno salvakärirpis paytaqa waktsa kaptinmi mana pipis cäsuparqantsu.
16 Tsayta rikarmi kayno nï: Tantiyakuq kashqantsimi mas ali kaykan kalpasapa kashqantsipitapis.* Itsanqa tantiyakuq kaptinpis waktsa runataqa manakaqmanmi churan y shumaq yätsiptinpis manami chaskipantsu.
17 Mana tantiyakuq mandaq runa fuertipa rimashqanpitaqa mas alimi kaykan tantiyakuq runa shapshapyaylapa rimashqan.
18 Alinnin kaq armapitapis tantiyakuq kashqantsimi mas ali kaykan.
Itsanqa imalatapis pantaptintsiqa lapanmi mana aliman tikran.