Salmos
Tayta Dios kamashqankunapita alabashqan
104 TAYTA DIOSTAMI lapan shonqüwan alabashaq.
TAYTA DIOS, lapanpaq munayniyuqmi kaykanki.
Qamqa atsikyaypa atsikyaykaq röpashqanömi kaykanki.
2 Chipchipyaynikiwanmi röpawan tsapakuqno tsapakunki.
Jatun säbanastanömi jana patsatapis mashtamushqanki.*
3 Jana patsacho kaykaq yaku jananchömi wayikitapis sharkatsishqanki.
Pukutaytapis guërra carrëtaykimanmi tikratsinki.
Wayra jananchömi maypapis aywanki.*
4 Wayrapis wilakuqnikimi kaykan.
Bunyaypa bunyar rataykaq ninapis sirvishuqnikimi kaykan.*
5 Cimientuta ruraykurmi patsatapis jamatsishqanki.
Jamatsishqaykipitaqa manami imaypis kuyukuntsu.
6 Röpawannömi lamarwan tsaparkushqanki.
Altunnin puntakunatapis yakuwanmi tsaparkushqanki.
7 Olqüpaptikimi tsaparaq yaku jukla aywakurqan.
Räyunöraq parlaptikimi witikurqan.
8 Tsaymi puntakunapis raqrakunapis yurirqan.
Qam nishqaykichömi rikakurqan.
9 Patsaman yaku yapay mana juntananpaqmi señalapashqanki.
Tsay señalashqaykitaqa manami pasantsu.*
10 Qam mandaptikimi jirkakunapita yakupis pashtamur raqrakunapa aywan.
11 Tsay yakutami munti uywakunapis upupäkun.
Munti bürrukunapis yakunar tsaypitami upupäkun.
12 Raqrakuna kuchunchömi pishqukunapis qeshwankunata rurapäkun.
Yörakunapa rämankunachömi rezakärin.
13 Qammi jana patsacho kaykaq wayikipita jirkakunata parqumunki.
Tamyawanmi alpatapis ushmatsinki.
14 Uywakunapaq qewatapis winatsimunki.
Mikuyta shuntananpaq runa murushqantapis winatsimunki.
15 Tsaynölami vïnuta kamaripanki upur kushikunanpaq,
aceitita kamaripanki qaqlanman lushikuptin chipchipyänanpaq
y mikuyta kamaripanki kalpan kananpaq.
16 Líbanucho kaq cedru yörakunapis qampami kaykan.
Yaku kuchuncho kashpanmi copösu winan.*
17 Rämankunachömi pishqukunapis qeshwankunata rurapäkun.
*Cigüeñakunapis tsay yörakunachömi tan.
18 Jirkakunachöpis munti cabrakunami kaykan.
Qaqakunachöpis *tejonkunami pakarpan.
19 Killatapis kamashqanki junaqkunata yupananpaq.
Intipis musyanmi imay höra jeqarpunanpaq kashqantapis.*
20 Patsa tardiyaptinqa tsakarpatsinkimi.
Tsakaypanami munti uywakuna pununanpita yarqapäkamun.
21 Leonkunapis mikunanpaq uywata ashirmi qaparpan.
Qamtami manakushunki uywata taritsinaykipaq.
22 Patsa waraptinqa pununanmanmi kutikärin.
Junaqpaqa machayninchömi punukärin.
23 Runakunanami aruyninman aywapäkun.
Tsaychömi tardiyaq qoyayta arupäkun.
24 TAYTA DIOS, imaykatapis qammi kamashqanki.
Lapantapis shumaq tantiyaykurmi kamashqanki.
Kay patsacho kamashqaykikuna maytsaychöpis kaykanmi.
25 Lamarpis jatunkaraymi y anchumi kaykan.
Tsaychömi jatusaqpis y takshapis tsaytsika uywakuna karkaykan.
26 Lamar jananpami *büquikunapis aywapäkun.
Lamarchömi jatunkaray Leviatán waräkuypis kaykan.
Tsaytaqa puklanaykipaqmi kamashqanki.*
27 Lapan uywakunami qamta shuyaraykäshunki höralancho mikuyta kamaripänaykipaq.
28 Kamaripaptikimi mikunanpaq shuntapäkun.
Bendicionnikiwanmi saksashqanyaq mikupäkun.
29 Manana kamaripaptikiqa pasaypami lakikärin.
Jämayninta tsaparkuptikiqa wanurmi alpaman tikran.
30 Mirananta munaptikiqa pasaypami mirapäkun.
Tsaynöpami kay patsaman yapay juntaqpaq mirapäkun.*
31 ¡TAYTA DIOS imayyaqpis alabashqa kaykulätsun!
¡Kamashqankunata rikar TAYTA DIOS kushikutsun!
32 Pay rikäriptinqa patsapis mantsakur siksikyanmi.
Yataykuptinqa jirkakunapis qoshtatanmi.
33 Kawashqäyaqqa imaypis TAYTA DIOSTAMI alabashaq.*
34 Yarpashqäkunapis TAYTA DIOS munashqanno kaykulätsun.
Paypa makincho karmi imaypis kushikü.
35 Jutsa ruraqkuna kay patsacho ushakätsun.
Fiyu runakuna lapanpis elqätsun.
Lapan shonqüwanmi TAYTA DIOSTA alabashaq.
¡Aleluya!