Salmos
Tayta Diosta alabashqan
146 ¡Aleluya!
Lapan shonqüwanmi TAYTA DIOSTA alabashaq.
2 Kawashqäyaqqa TAYTA DIOSTAMI imaypis alabashaq.
Shuntakamänanyaqmi salmukunata cantar alabashaq.*
3 Ama yärakushuntsu munayniyuq runakunamanqa.
Paykunaqa runala kar manami salvamäshunpaqtsu.
4 Wanushpan alpamanmi tikranqa.
Yarpashqankunata manaraq rurarmi wanupäkunqa.
5 Tayta Dios yanapashqan runami itsanqa kushishqa kawanqa.
Payqa TAYTA DIOSLAMANMI imay hörapis yärakun.
6 Tayta Diosmi jana patsata, kay patsata, lamarta y lapan tsaycho kaqkunatapis kamashqa.
Nishqantaqa imaypis cumplinmi.*
7 Nakaycho kawaq runakunata yanapanmi.
Yarqanaqkunatapis mikuyta kamaripanmi.
Prësu kaykaqkunatapis TAYTA DIOS jorqamunmi.
8 Qaprakunapa nawintapis TAYTA DIOS aliyätsinmi.
Desanimashqa kaykaq runakunatapis TAYTA DIOS shakyätsinmi.
Pay munashqanno kawaqkunataqa TAYTA DIOS kuyanmi.
9 Jäpa runakunatapis TAYTA DIOS tsapanmi.
Waktsakunatapis y viüdakunatapis yanapanmi.
Fiyu runakunatami itsanqa yarpashqanta mana rurananpaq tsapata churapan.