Isaías
Jerusalénta atacananpaq nishqan
29 “¡Wawalaw, Ariel marka, Ariel marka!*
¡Wawalaw! ¡Imanöraq kanki, *Davidpa Markan Jerusalén!
Cada wata noqapaq fiestata 2 ruraptikipis desgraciata chätsimushaqmi.
Fiyupami waqankipaq y lakikunkipaq.
*Altarcho uywakuna rupashqannömi chipyaq rupanki.
3 Qammanmi soldädukunata kachamushaq jiruruypa tsapaykur atacashunaykipaq.
Murällayki jananpa yaykamunanpaqmi törrikunatapis sharkatsinqa.
4 Vincipäkushuptikimi pampacho jitarankipaq.
Parlashqaykipis patsa rurinpitanölami mayakanqa.
Alma ataykaqnölami rimashqaykipis mayakanqa.
5 “Atacashuqnikikunataqa tsaytsika kaptinpis ñutqu alpata wayra elqätsishqannömi elqätsishaq.
Ali chölu kaptinpis tsaki punshata löcu wayra ushakätsishqannömi ushakätsishaq.
6 Lapanta mandaq TAYTA DIOS karmi castiganäpaq shamushaq.
Räyuwan, temblorwan, bunruruywan, löcu wayrawan, löcu tamyawan y bunyaypa bunyar rupaykaq ninawanmi chikishuqnikikunata ushakätsishaq.
7 “Ariel markata atacaq runakuna atska nacionpita shamurpis pukutaynölami elqanqa.
Atacananpaq marka murällata juchutsiqkunapis qoshtaynölami elqanqa.
8 Mikanaykar punuq runa sueñuynincho ali alilata mikuykarpis rikcharkamurqa jinala yarqanaykaqnömi kapäkunqa.
Yakunaykaq runa sueñuynincho yakuta upurpis jinala utikashqa y shiminpis kankakashqa rikchamushqannömi kanqa.
Tsaynömi kanqa *Sión jirkanta atacananpaq maytsay nacionpita shamuq runakuna”.
Jerusalén runakuna tsakäpakushqano kashqan
9 Chikishuqnikikunata Tayta Dios tsayno ushakätsinanpaq kashqanta ¿manaku criyipäkunki?
Mana criyirqa qaprayashqanömi karkaykanki.
Ima shinkatsikuqtapis mana upuykarmi shinkashqano lutankunalata yarpachakurkaykanki.
10 Pasaypa mana tantiyakuq kanaykipaqmi TAYTA DIOS kamakätsishqa.
Lula profëtakunatapis lutanta wilakunanpaqmi pantakätsishqa.*
11 Tayta Dios revelashushqayki wilakuykuna sigurashqa libruno kaptinmi imatapis tantiyapäkunkitsu. Liyiy yachaq runata liyipäshunaykipaq niptikipis tsay runa kaynömi nishunkipaq: “Kay libru shumaq sigurashqami kaykan. Liyinäpaq manami kichayta puëdïtsu”.
12 Tsaynölami liyiyta mana yachaq runata liyipäshunaykipaq niptikipis kayno nishunkipaq: “Manami liyiyta yachätsu”.
13 Tayta Dios kaynömi nin:
“Kay runakunaqa janan shonqulami alabapäkaman.
Shimilanwanmi respitapäkaman.
Shonqunchöqa manami yarpaylapis yarpämantsu.*
‘Diosta *mantsakuykämi’ nirpis yarpaynilanpita runakuna yachatsishqantami rurarkaykan.
14 Tsay runakuna tantiyakärinanpaqmi espantaypaq kaq milagrukunata yapay rurashaq.
Tsaynöpami yachaq runakunapa yarpayninkunata upatakätsishaq.
Tantiyakuqkunatapis manana tantiyakärinanpaqmi pantakätsishaq”.*
15 ¡Wawalaw!
¡Imanöraq kanki TAYTA DIOSPITA pakaylapa mana alita ruranaykipaq yarpachakuqkuna!
Qamkunaqa yarpapäkunki tsakaylapa wilanakuptiki TAYTA DIOS mana musyananpaq kashqantami.
Tsaynöpis kaynömi nirkaykanki: “Tayta Dios manami rikamantsitsu ni ima rurashqantsitapis manami musyantsu”.
16 ¡Tsayno yarpar pasaypa lutantami yarparkaykanki!
Noqantsiqa Tayta Dios rurashqan mankanölami kaykantsi.
Manka ruraqno karmi Tayta Dios noqantsipita mas musyan.
¿Ruraqninta mankaqa “qam manami ruramashqankitsu” ninmantsuraq?
¿Ruraqninta tsay mitu manka “manami rurayta yachankitsu” ninmantsuraq?*
Israel runakunata salvananpaq nishqan
17 Kananpita manaraqpis aykälatami Líbano muntipis muruna chakramanna tikranqa.
Muruna chakrakunanami jatusaq yörayuq muntiman tikranqa.* *
18 Tsay junaqmi Diospa wilakuyninta mana wiyaq runakuna wiyanqana.
Qaprano kaqkunapis tsakäpakushqano kashqanpitami rikanqana.
19 TAYTA DIOS yanapaptinmi humildikuna kushikärinqa.
Israel runakunapa *santu Diosnin yanapaptinmi waktsakunapis kushishqa kawapäkunqa.
20 Respëtuynaq runakuna lapanmi ushakanqa.
Fiyu runakuna mananami kanqanatsu.
Lutan ruraykunalaman churakashqa kawaqkunapis lapanmi ushakanqa.
21 Tsaynölami runa mayinta tumpaqkunata,
juezkunata lulapaqkunata
y jutsaynaq runakunata manakaqta jitapaqkunatapis Tayta Dios ushakätsinqa.
22 Tsaymi Abrahamta jorqamuq TAYTA DIOS Jacobpita miraq runakunata kayno nin:
“Jacobpita miraq runakuna, manami penqaycho kankipaqnatsu.
Manami almatakashqa puripäkunkinatsu.
23 Tsurikikunata yanapaykashqäta rikarmi jutïta joqarir agradëcikamankipaq.
Santu Diosniki kashqäta tantiyakurmi noqalatana respitapäkamankipaq.
24 Mana cäsukamaqkunapis cäsukärimanqami.
Conträ sharkuqkunapis yachatsishqäta chaskikärinqami”.