Marcos
Runakuna lutankunata yarpar impüru rikakushqan
7 Juk kutimi *fariseukuna y ley yachatsiqkuna Jerusalénpita aywapäkurqan Jesús kaqman. 2 Tsaychömi rikarqan Jesúspa discïpulunkuna makinta mana maylakuylapa mikurkaykaqta. 3 Fariseukuna y Israel mayinkunaqa unay aylunkunapa costumbrinkunata cumplirmi mikunanpaq makintaraq imaypis maylakärin. Mana maylakurqa manami mikupäkuntsu.* 4 Tsay costumbrikunata cumplirmi pucillukunatapis, wichikunatapis, mankakunatapis [y catrikunatapis] maylapäkun. Tsaynömi rantipakushqanpita kutirpis mikunanpaqqa armakärin. Tsaynölami mas wakin costumbrinkunatapis cumplipäkun. 5 Tsaymi fariseukuna y ley yachatsiq runakuna Jesústa tapupäkurqan kayno nir: “¿Imanirtaq discïpuluykikuna unay ayluntsikunapa costumbrinkunata mana cäsuypa *impüru makiwan mikupäkun?”
6 Tsayno niptinmi Jesús kayno nirqan: “¡Ishkay cära runakuna! Rasuntachari Isaías qamkunapaq kayno qelqarqan:
“ ‘Kay runakunaqa shimilanwanmi respitapäkaman.
Shonqunchöqa manami yarpaylapis yarpämantsu.
7 Nishqäta yachatsinanpa trukanqa runakuna nishqalantami yachatsipäkun.
Tsaymi manakaqlapaq adorapäkamanpis’.*
8 “Isaías nishqannölami qamkunapis Tayta Diospa mandamientunkunata cäsukärinaykipa trukanqa kikikikunapa costumbrikikunalata rurarkaykanki. [Tsaymi wichikunatapis pucillukunatapis püru kananpaq maylapäkunkiraq. Tsaynölami wakin costumbrikunatapis rurarkaykanki]”.
9 Mastapis Jesús kayno nirqan: “¡Achyä pï, costumbrikikunata cumplir Tayta Diospa mandamientunkunata alichari cumplirkaykanki! 10 Moisés kaynömi nirqan: ‘Mamaykita y taytaykita respitanki’.* Tsaynöpis kayno nirqan: ‘Pipis mamanta o taytanta mana respitaq kaqqa wanutsishqa katsun’.*
11 “Tsayno niykaptinmi qamkunaqa yachaykätsinki kayno nir: ‘Mamaykita y taytaykita yanapayta mana munarqa kayno ninki: “Qamkunata yanapanäpaq kaqkunata Tayta Diosta qoykunäpaqmi promitishqä” ’. 12 Tsayno nirmi runakunata yachaykätsinki mamanta y taytanta mana yanapananpaq. 13 Costumbrikikunata tsayno yachatsirqa Tayta Diospa palabranta manakaqmanmi churarkaykanki. Tsaynölami wakin costumbrikikunatapis yacharkaykätsinki”.
14 Tsayno nirkushpanmi runakunata qayaykur Jesús kayno nirqan: “Kay nishqäkunata lapayki shumaq tantiyakäriy. 15 Manami imatapis mikushqanpitatsu pipis impüru rikakun, sinöqa shonquncho mana alita yarpashqanpitami. 16 [Rinriyuq kaqkunaqa nishqäkunata wiyakäritsun]”.
17 Tsaypitanami runakunata kacharir juk wayiman Jesús yaykurqan. Tsaychönami discïpulunkuna ruwakurqan yachatsishqanta tantiyatsinanpaq. 18 Tsaymi Jesús kayno nirqan: “¿Qamkunapis manaku tantiyapäkunki runa imata mikurpis impüru mana rikakushqanta? 19 Mikushqantsikunaqa manami shonquntsimantsu yaykun, sinöqa pachantsimanmi. Tsaypitanami pasakun”.
Tsayno nirmi Jesús tantiyatsirqan lapan mikuykunapis mikunantsipaq ali kashqanta.
20 Mastapis kayno nirqan: “Shonquncho mana ali yarpashqankunami runata impüruyätsin. 21 Runakunaqa shonquncho mana alikunata yarparmi *fornicación jutsata rurapäkun, suwakärin, wanutsinakärin, 22 majanta jarukärin, codiciösu kapäkun, lulakärin, shanaripakur jutsata rurapäkun, envidiösu kapäkun, manakaqta tumpanakun, yachaq tukärin y lutankunata rurapäkun. 23 Tsay lapan mana ali ruraykunami shonqunpita yarqamur runakunata impüruyätsin”.
Mana Israel warmi Jesúsman yärakushqan
24 Tsaypitanami Jesús aywarqan Tiro [y Sidón] markakuna lädupa. Tsayman chayashqanta runakuna musyananta mana munarmi pakaylapa juk wayiman patsakurqan. Tsayno pakakuptinpis runakuna musyarqanmi tsaycho kaykashqanta.
25 Tsay markachömi juk warmipa warmi wawanta *supay fiyupa nakaykätsirqan. Jesús tsayman chayashqanta musyarmi tsay warmiqa nawpanman qonqurpakuykur 26 ruwakurqan wawanpita supayta qarqunanpaq. Tsay warmi manami Israel warmitsu karqan, sinöqa jinan Sirofeniciapitami karqan. 27 Tsayno ruwakuptinmi Jesús kayno nirqan: “Puntataqa yanapashaq Israel mayïkunataraqmi. Qamta yanaparqa wamrakunapa tantanta qechurir alqukunata jitapaykuqnöchari kashaq”.
28 Tsaymi warmi kayno nirqan: “Aw, tayta. Tsayno kaptinpis wamrakuna shikwapakushqantami alqukunapis mikupäkun”.
29 Tsayno niptinmi Jesús kayno nirqan: “Alitami nishqanki. Wawaykita nakatsiq supay yarqushqanami kaykan. Kananqa wayikipa kutikuy”.
30 Tsayno niptin wayinman kutirmi wawanta tarirqan aliyashqana cämancho kaykaqta. Tsayno aliyarqan supay yarqukushqana kaptinmi.
Upa runata Jesús aliyätsishqan
31 Tiro markapita aywakurnami Sidón marka kaq lädupa tumamur Jesús chayarqan Decápolis provinciaman. Tsaypitanami chayarqan Galilea qocha kuchunman. 32 Tsaycho kaykaptinmi payman pusharqan upa runata. Chayaykatsirmi Jesústa ruwakurqan jananman makinta churaykur aliyätsinanpaq. 33 Tsaymi kikilanta juk läduman pushaykur upapa rinrinman dëdunta Jesús jatirqan. Toqayninwan dëdunta ushmarkatsirmi upapa qalluntapis yatarqan. 34 Tsayno rurarkurmi jämayninta kachaykur jana patsata rikärishpan: “¡Efata!” nirqan. (Efata ninanqa kichakay ninanmi.) 35 Tsayno niptinmi jinan höra rinrin kichakarqan y shiminpis pashtarqanna.
36 Tsayno aliyarkatsirmi tsaycho kaykaq runakunata Jesús nirqan aliyätsishqanta pitapis mana wilananpaq. Yaparir yaparir tsayno niykaptinpis mana upälakuypami pïmaytapis wilaparqan. 37 Aliyätsishqanta rikarmi runakuna pasaypa kushikur kayno nipäkurqan: “¡Lapantapis alitami ruran! ¡Aliyätsiptinmi upakunapis mayapäkun y mana parlaqkunapis parlapäkun!”