Isaías

35 Tsay witsanmi chunyaq jirkapis y tsaki pampakunapis kushikunqa.

Qara pampakunachöpis qewa loqluypa loqlur winarmi tuktunqa.

 2 Waytakunapis chinyaraypami tuktunqa.

Pampakunapis kushishqami cantanqa.

Muntikunapis Líbano muntikunanömi kuyaylapaq kanqa.

Chakrakunapis Carmelucho y Saróncho kuyaylapaq kashqannömi kanqa.

Tsawraqa pïmaypis tantiyanqa TAYTA DIOSNINTSI munayniyuq kashqanta.

3 Makiki warkakaqno mananiraykarpis

y qonqurniki watakaqno qasakarpis valurapäkuy.*

 4 Mantsakuqkunata kayno nishun:

“¡Ama mantsakäriytsu!

¡Valurapäkuy!

¡Tayta Diosnintsi yanapashunkimi!

Nakatsishuqnikikunatami castiganqa.

Kikin shamurmi salvashunki”.

5 Tsaymi qaprakunapis rikanqana.

Mana mayaqkunapis mayanqana.

 6 Weqrukunapis luychunöraqmi pañanqa.

Shimin mana pashtaqkunapis kushikurmi cantanqa.*

Chunyaq jirkakunachöpis atskami yaku pashtanqa.

Tsaki jirkakunapapis mayunöraqmi yaku aywanqa.

 7 Pasaypa qochami tsaycho rikakunqa.

Pukyukunapis pashtamunqami.

*Chacalkuna tashqankunachöpis shoqushkuna y ututukunami winamunqa.

8 Tsaypami nänipis aywaranqa.

Tsay nänipa jutinmi kanqa Diosman Chayana *Sagrädu Näni.

Jutsata ruraq runaqa manami tsay nänipa purinqatsu.

Mana tantiyakuq runakunaqa tsay näniman manami jaruylapis jarunqatsu.

Tayta Dios munashqanno kawaq runakunalami tsay nänipaqa purinqa.*

 9 Tsaypaqa leonkunapis manami purinqatsu.

Jatusaq chucaru uywakunapis manami yaykunqatsu.

Tsay nänipaqa salvashqa kaq runakunalami purinqa.

10 TAYTA DIOS salvashqan runakunami tsay nänipa Jerusalénman kutipäkamunqa.

Kushishqa cantaraykarmi *Siónman yaykapäkamunqa.

Tsaychömi imaypis kushishqa kawapäkunqa.

Kushishqa ali kawaptinmi lakikuypis ni waqaypis mana kanqanatsu.*