Efesios
Tayta Diospa wamrankuna imano kawananpaqpis kashqan
5 Tayta Dios kuyashqan wamrankuna kaykarqa pay jutsaynaq kashqanno qamkunapis jutsaynaq kapäkuy. 2 Jesucristo kuyakuq kashqanno qamkunapis kuyakuq kapäkuy. Kuyakuq karmi noqantsi rayku wanur Tayta Diospaq ali asyaq* sacrificiuno kashqa.*
3 Tayta Dios kuyashqan *santu runakuna kaykarqa *fornicación jutsata ama rurapäkuytsu, codiciösu ama kapäkuytsu ni ima jutsatapis ama rurapäkuytsu. Tsaykunapaqqa rimaylapis ama rimapäkuytsu. 4 Lutankunata, manakaqkunata ni lutan yarpayman apaq bujunädakunatapis ama rimapäkuytsu. Tsaypa trukanqa Tayta Diosta lapanpita agradëcikäriy.
5 Shumaq tantiyakäriy: fornicación jutsata ruraqkuna y codiciösu kaqkunaqa manami Tayta Dios y Jesucristo mandashqanman yaykunqatsu. (Codiciösu kaqkunaqa ïduluta adoraqnömi karkaykan.) 6 Mana cäsukuypa jutsata ruraqkunataqa Tayta Diosmi rabyashpan castiganqa. Tsayno kaykaptinqa jutsata ruranaykipaq pipis shakyätsishuptiki ama chaskipäkunkitsu. 7 Wakin runakuna jutsata ruraptinpis qamkunaqa ama rurapäkunkitsu.
8 Nawpataqa qamkunapis jutsata rurashpayki tsakaqcho kaykaqnömi kawapäkurqayki. Kananmi itsanqa Jesucristuta chaskikur atsikyaqchöna kawarkaykanki. Tsayno kaykarnaqa Tayta Dios munashqanno waran waran kawapäkuy. 9 Atsikyaqchöna kawarqa* kuyapäkuq kanki, alilata ruranki y rasun kaqlata rimanki. 10 Tayta Dios munashqanno kawanaykipaq imaypis yarpachakäriy.
11 Tayta Diosta mana cäsukuq runakuna lutankunata ruraptinpis qamkunaqa ama rurapäkuytsu. Tsaypa trukanqa lutan ruraykunata kacharinanpaq tantiyatsipäkunki. 12 Paykuna pakaylapa jutsa rurashqanqa pasaypa penqakuypaqmi kaykan. Tsaykunataqa ama parlapäkuytsu. 13 Atsikyaptin imapis rikakashqannömi paykuna jutsata rurashqanpis musyakanqa.
14 Jutsa ruraqkuna tantiyakärinanpaq rimaypis kaynömi nin:
“Punuy siki, rikchay.
Wanushqa kaykashqaykipita kawarimuy.
Jesucristumi atsikyapäshunki”.
15 Tsayno kaykaptinqa imano kawaykashqaykitapis shumaq tantiyakäriy. Mana tantiyakuq runano kawapäkunaykipa trukanqa tantiyakuq runano kawapäkuy. 16 Runakuna mana alita rurar kawaptinpis qamkunaqa alilata imaypis rurapäkuy. 17 Mana tantiyakuq runanöqa ama kawapäkuytsu. Tsaypa trukanqa Señornintsi munashqanno kawanaykipaq shumaq tantiyakäriy.
18 Ama shinkapäkuytsu. Shinkaq runaqa lutankunatami ruran. Tsaypa trukanqa Espíritu Santupa munaynincho kawapäkuy. 19 Salmukunata, himnukunata y cörukunata cantar lapan shonquykiwan Tayta Diosta alabapäkuy. 20 Ima kaptinpis Señornintsi Jesucristupa jutincho Tayta Diosta agradëcikäriy.*
Majayuqkuna imano kawananpaqpis nishqan
21 Jesucristuta *mantsakurqa juknintsi juknintsipis respitanakur kawashun.
22 Warmikuna, Señor Jesucristuta cäsukushqaykinöla runaykitapis cäsukäriy.* 23 Warmiqa runanpa munayninchömi kaykan. Tsaynölami *iglesiapis Jesucristupa munaynincho kaykan. Iglesianami paypa cuerpun y paymi iglesiapa salvaqnin.* 24 Tsayno kaykaptinqa Jesucristuta iglesian cäsukushqanno warmipis runanta cäsukutsun.
25 Runakuna, iglesiata Jesucristo kuyashqanno warmikita kuyapäkuy.* Iglesiata kuyarmi wanuymanpis Jesucristo chayarqan. 26 Tsayno wanurqan payman yärakuqkuna Tayta Diospa palabranwan maylashqa kar *santu kapäkunanpaq. 27 Tsaymi kikinpa nawpanman pushanqa atsikyaypa atsikyaykaqta, jutsaynaqta, santuta y pay munashqanno kaykaqta.*
28 Pipis warminta kuyaq kaqqa kikinpa cuerpuntapis kuyanmi. Tsaymi cuerpunta kuyashqanno warmintapis kuyanman. 29 Manami pipis cuerpunta maltratantsu, sinöqa ali mikurmi cuidan. Tsaynölami Jesucristupis iglesianta cuidan. 30 Noqantsimi Jesucristupa cuerpun, [aytsan y tulun] kaykantsi.*
31 Tayta Diospa palabranchöpis kaynömi niykan: “Runaqa mamanpa y taytanpa makinpita yarqukun warminwan mana rakikaypa tänanpaqmi. Ishkaq karpis juklaylanömi kanqa”.*
32 Tsay qelqaraykaqqa Jesucristuwan juklaylano kashqantsitami tantiyatsimantsi. Tsayno tantiyatsimashqantsi pasaypa espantaypaqmi kaykan. 33 Tsaymi yapaypis kayno nï: Cuerpuykita kuyapäkushqaykinöla warmikita kuyapäkuy. Warmikunapis runanta respitapäkutsun.