1 Corintios
Espíritu Santu habilidäta qomashqantsi
12 Wawqi panikuna, Espíritu Santu habilidäta qomashqantsipitami musyatsiyta munaykä. 2 Musyashqaykinöpis Jesucristuta manaraq chaskikur mana tantiyakushpaykimi ïdulukunata adorar kawapäkurqayki. 3 Tsaymi shumaq tantiyakärinaykita munä. Espíritu Santuta chaskikushqa kaykarnaqa manami pipis kayno ninmantsu: “Jesucristo maldicionädu katsun”. Tsaynölami Espíritu Santuta manaraq chaskikurqa “Jesucristo Señornïmi” niyta mana kamäpakuntsu.
4 Espíritu Santupita jukno jukno habilidäta chaskikuptintsipis payqa juklaylami kaykan. 5 Tsaynölami Señor Jesucristuta jukno jukno sirviptintsipis* payqa juklayla kaykan. 6 Yanapamaqnintsi Tayta Diosta sirvishqantsi jukno jukno kaptinpis payqa juklaylami kaykan.
7 Cada ünuntsimi Espíritu Santupita habilidäta chaskintsi juknintsi juknintsipis yanapanakunantsipaq. 8 Wakinnintsimi habilidäta chaskintsi shumaq tantiyakurkur wakinta tantiyatsinantsipaq. Wakinnintsimi habilidäta chaskintsi yachakuykur wakin kaqtapis yachatsinantsipaq. 9 Wakinnintsimi habilidäta chaskintsi Tayta Diosman shumaq yärakunantsipaq. Wakinnintsimi habilidäta chaskintsi qeshyaqkunata aliyätsinantsipaq. 10 Wakinnintsimi habilidäta chaskintsi milagrukunata ruranantsipaq. Wakinnintsimi habilidäta chaskintsi Tayta Diospa wilakuyninta wilakunantsipaq. Wakinnintsimi habilidäta chaskintsi pipis lutanta o rasun kaqta yachaykätsishqanta tantiyakunantsipaq. Wakinnintsimi habilidäta chaskintsi mana yachashqantsi idiömakunacho parlanantsipaq. Wakinnintsinami habilidäta chaskintsi tsay parlashqanta wawqi panikunata tantiyatsinantsipaq. 11 Jukno jukno habilidäta chaskiptintsipis Espíritu Santu juklaylami kaykan. Paymi kikin munashqanno cada ünuntsita habilidäta qomantsi.*
Jesucristupa cuerpun kashqantsi
12 Cuerpuntsicho umantsi, rikrantsi y chankantsi kaptinpis juk cuerpulami kaykantsi. Tsaynölami noqantsipis Jesucristuwan juk cuerpula kaykantsi.* 13 Tsaymi Israel runa kaptintsipis y mana Israel runa kaptintsipis, ashmay kaptintsipis y mana ashmay kaptintsipis bautizakuptintsi lapantsita Espíritu Santu churamashqantsi paypa cuerpun kanantsipaq. Tsay cuerpula kaptintsimi lapantsita Tayta Dios Espíritu Santuta qomashqantsi.
14 Cuerpuqa manami umalatsu ni rikralatsu ni chankalatsu kaykan, sinöqa atska partiraqmi tananakushqa kaykan. 15 Chakipis “mana maki karqa manami cuerpupatsu kä” nirpis manami cuerpupitaqa yarqukuntsu. 16 Tsaynölami rinripis “mana nawi karqa manami cuerpupatsu kä” nirpis manami cuerpupitaqa yarqukuntsu. 17 Cuerpuntsi nawila kaptinqa ¿imawanraq mayashwan? Tsaynöpis cuerpuntsi rinrila kaptinqa ¿imawanraq ali asyaytapis mayashwan? 18 Itsanqa Tayta Diosmi cuerpuntsikunacho cada partikunata kamakätsishqa pay munashqanno kananpaq. 19 Intëru cuerpucho juk partila kaptinqa manami cuerputsu kanman. 20 Tsaymi atska parti karpis rasunpaqa juk cuerpula kaykan.
21 Manami nawintsipis makintsita kayno ninmantsu: “Manami qamta nistätsu”.
Umantsipis chakintsita manami kayno ninmantsu: “Manami qamta nistätsu”.
22 Tsaypa trukanqa cuerpuntsicho mas pishi töpay kaq partikunatami mas nistantsi. 23 Cuerpuntsicho mana rikatsikushqantsi partikunatapis ¿manaku röpawan shumaq tsapantsi? 24 Alayri rikakaq partikunataqa manami tsapantsitsu. Cuerpuntsicho mana rikatsikunantsipaq kaq partikunata tsayno mas cuidanantsipaqmi Tayta Dios kamakätsishqa. 25 Tsayno kamakätsiptinmi cuerpuntsicho kaq partikuna mana chikinakuntsu, sinöqa jukninpis jukninpis yanapanakunmi. 26 Cuerpuntsicho juk parti nanaptinqa lapan cuerpuntsimi lakikun. Cuerpuntsicho juk parti ali rikashqa kaptinqa lapan partimi kushikärin.
27 Qamkunaqa Jesucristupa cuerpunmi kaykanki. Cada ünuykikunami tsaycho juk parti kaykanki. 28 Tsaymi *iglesiacho Tayta Dios puntata churashqa *apostolkuna kananpaq, tsaypita profëtakuna kananpaq y tsaypita yachatsiqkuna kananpaq. Tsaynöpis wakinta churashqa milagrukunata rurananpaq, wakinta churashqa qeshyaqkunata aliyätsinanpaq, wakinta churashqa waktsakunata yanapananpaq, wakinta churashqa imatapis ali kamakätsiq kananpaq y wakintanami churashqa mana tantiyashqan idiömakunacho parlananpaq.*
29 Manami lapantsu apóstol, ni profëta ni yachatsikuq kaykan. Manami lapantsu milagrukunata rurapäkun, 30 ni qeshyaqkunata aliyätsipäkun ni mana yachashqan idiömakunacho parlapäkun. Tsay idiömakunacho parlashqantapis manami lapantsu tantiyatsipäkun. 31 Tsayno kaykaptinqa Tayta Diospita mas alinnin habilidäta chaskinaykipaq yarpachakäriy.
Kananmi mas alinnin kaqta tantiyatsishayki.