Proverbios
21 Mayu maypa aywananpaq TAYTA DIOS kamakätsishqannömi reypa yarpayninkunatapis kamakätsin.
2 Runaqa yarpan lapan rurashqankuna ali kashqantami.
Tsayno kaptinpis TAYTA DIOSMI musyaykan rasunpa ali yarpaywan o mana ali yarpaywan rurashqantapis.*
3 Sacrificiuta rupatsishqaykipa trukanqa mas ali kaykan TAYTA DIOS munashqanno runa mayikiwan ali kawashqaykimi.*
4 Jutsami kaykan runa mayinta nanaq nawinpa rikapashqan, yachaq tukushqan y lutankunata yarpachakushqan.
5 Imatapis shumaq yarpachakurkur ruraptinqa alimi kanqa.
Mana yarpachakuypa imatapis lutala ruraptinmi itsanqa mana ali kanqa.
6 Runa mayinta engañaypa rïcuyashqanqa qoshtaynömi elqanqa.
Tsayno rurashqanpita ushakanqami.
7 Mana kuyapäkuq kashqanpitami fiyu runaqa ushakanqa.
Runa mayinta nakatsishqanpitami kikinpis nakanqa.
8 Fiyu runa kawashqanqa wiksu qerunömi kaykan.
Ali runa kawashqanmi itsanqa jututu* qeruno kaykan.
9 Achäquita ashiq warmiwan kuyaylapaq wayicho tänanpa trukanqa mas alimi kaykan tsuklalachöpis jawka täkushqan.*
10 Fiyu runaqa imaypis mana alita ruranalanpaqmi yarpachakun.
Tsay runapaqa manami kuyapäkuyninpis kantsu.
11 Mana tantiyakuq runaqa shimisapa runata castigashqanta rikakurraqmi tantiyakun.
Tantiyakuq runami itsanqa yätsiptilan tantiyakun.*
12 Tayta Dios rikaykanmi lutan ruraq runa wayincho imano kawashqantapis.
Tsaymi ima desgracia pasananpaqpis kacharin.
13 Waktsakuna manakuptin mana cäsupaq kaqtaqa manami Tayta Diospis cäsupanqatsu.
14 Fiyupa rabyashqa kaykaqta pakaylapa imalatapis qararqa* rabyayninta pasatsinmi.
15 Ali runaqa autoridäkuna shumaq arreglaptin kushikunmi.
Fiyu runami itsanqa pasaypa mantsakan.
16 Tantiyakuq kananpa trukan lutankunata ruraq runaqa manaraqpis aykätami ushakanqa.
17 Fiestalacho, upyalacho y perfümilacho imaykantapis ushaq runaqa manami imaypis rïcuyanqatsu.
18 Lulakuq y shimi jatipäkuq runataqa ali runapa contran sharkushqanpita kikintami ima desgraciapis pasanqa.
19 Malgeniu y fiyu warmiwan tänanpa trukanqa mas alimi kaykan japala täkuptin.
20 Tantiyakuq runapa wayinchöqa imayka riquëzapis y perfümikunapis kaykanmi.
Mana tantiyakuq runami itsanqa tarishqalantapis lapanta ushakurkun.
21 Shumaq tantiyakuq y kuyakuq runaqa ali kawaytami tarinqa.
Tsaymi pïmaypis payta respitan.
22 Ali tantiyakuq runaqa atska soldäduyuq markatapis munayninmanmi churan.
Tsayno churan pipis mana vincinanpaq kashqanta yarpaykaptinpis.
23 Lutala mana parlakuq runataqa manami imapis pasantsu.
24 Runa mayinta manakaqman churaq runataqa yachaq tukuq, orgullösu y respëtuynaq kashqantami nipäkun.
25 Qela runaqa arukuyta mana munarmi yarqaylapita wanun.
Tulu ushma karmi arukuyta munantsu.
26 Tsay runaqa kikilanpaq yarpachakuykarmi qoyarkun.
Ali runami itsanqa runa mayinta imalatapis kushishqa qaraykun.
27 Fiyu runakunapa ofrendantaqa TAYTA DIOS manami chaskintsu.
Paykunaqa ofrendata apan Tayta Dios yanapanan kashqalami.*
28 Rantiy testïgu rimashqantaqa manami pipis chaskintsu.
Ali testïgu rimashqantami itsanqa pïmaypis chaskin.
29 Fiyu runaqa runakuna rikanalanpaqmi ali tukun.
Ali runami itsanqa rasunpa alilata ruran.
30 TAYTA DIOSTA mana cäsukuptinqa yachaq kashqanpis, tantiyaq kashqanpis ni yätsikuq kashqanpis manami välintsu.
31 Guërraman aywaq runaqa cawalluntapis shumaqmi kamarikun.
Kamarikuptinpis TAYTA DIOS yanapaptinraqmi contrankunata vincin.*