1 Corintios
Ïdulukunata mana adorananpaq yachatsishqan
10 Wawqi panikuna, musyapäkunkimi unay yärakuq mayintsikunata ima pasashqantapis. Paykunaqa pukutay rurinpa aywapäkurqan* y Puka Lamartapis pasapäkurqan.* 2 Moisésta qatirar pukutay rurinpa aywashqa karmi y lamarpa pasashqa karmi lapan *bautizakärishqano karqan. 3 Tayta Dios kamaripashqan mikuytapis lapanmi mikupäkurqan.* 4 Tayta Dios qaqapita pashtatsimushqan yakutapis lapanmi upupäkurqan.* Tsay qaqaqa Jesucristumi karqan. Israel runakuna aywashqanpami Jesucristupis aywarqan. 5 Tsayno kaptinpis Tayta Diosta atskaqmi mana cäsukurqantsu. Tsaymi paykunaqa chunyaq jirkacho wanushqa jitarpaykarqan.* 6 Lapan tsaykuna pasarqan noqantsi tantiyakur paykunano jutsata mana ruranantsipaqmi.
7 Tsayno kaykaptinqa ïdulukunata ama adorashuntsu. Israel runakuna ïdulukunata adorashqanpita Tayta Diospa palabrancho kaynömi qelqaraykan:
“Lapanmi jamaykur mikupäkurqan y upyapäkurqan.
Kushikurmi juknin jukninpis jutsata rurapäkurqan”.*
8 Tsaynöpis *fornicación jutsata ama rurashuntsu. Israel runakuna tsayno kawashqanpitami Tayta Dios juk junaqlacho ishkay chunka kimsa waranqa (23,000) runakunata ushakätsirqan.*
9 Tsaynöpis Señor Jesucristuta kikintsi munashqantsita ruratsiyta ama kamashuntsu. Wakin Israel runakuna Diosta tsayno ruratsiyta munaptinmi culebrawan picatsiypa Tayta Dios wanutsirqan.*
10 Tsaynöpis descontentu ama kashuntsu. Israel runakuna descontentu kaptinmi wanutsikuq *ángel paykunata ushakätsirqan.*
11 Unay Israel runakunata tsayno pasashqankuna Tayta Diospa palabrancho qelqaraykan noqantsi ultimu tiempucho kawaqkuna tantiyakunantsipaqmi. 12 Tsayno kaykaptinqa jutsata mana ruraq kashqaykita yarparkaykashqaykicho paqta jutsata rurapäkunkiman. 13 Lapan pruëba pasashushqayki wakin runakunatapis pasanmi. Probashushpaykipis Tayta Diosqa manami kachaykushunkipaqtsu. Tsaymi pruëbata awantar jutsaman mana ishkinaykipaq imaypis yanapashunki.*
14 Kuyay wawqi panikuna, tsayno kaykaptinqa ïdulukunata ama adorapäkuytsu. 15 Tantiyakuq runakuna karqa tantiyakäriy niykashqä rasunpa kashqanta. 16 Noqantsi Santa Cënapaq juntakar bendición cöpapita* upushpantsi ¿manaku yarpantsi Jesucristo noqantsi rayku yawarninta jichashqanta? Tsaynöpis tantata pakipänakur mikushpantsi ¿manaku yarpantsi Tayta Dios salvamänantsipaq Jesucristo cruzcho wanushqanta?* 17 Santa Cënacho juk tantalata maytsikaq mikuykarpis juk cuerpulami kaykantsi. 18 Israel runapa cürankunapis Tayta Diosta adorakunan *altarcho pishtashqan aytsata mikur ¿manaku Tayta Dioswan juklaylano karkaykan?
19 Shumaq tantiyakushun. Ïdulukunaqa manami kawantsu. Ïdulukunapaq altarman churashqan aytsapis kashqan aytsalami. 20 Tsayno kaptinpis ïdulukunapaq churashqan aytsaqa manami Tayta Diospaqtsu kaykan, sinöqa *supaykunapaqmi. Noqaqa manami munätsu supaykunapaq kaqkunata mikupäkunaykita.* 21 Santa Cënacho vïnuta upuykarqa supaykunapaq jichapashqan vïnutapis manami upupäkunkimantsu. Tsaynöpis Santa Cënacho tantata mikuykar supaykunapaq churashqan mikuytapis manami mikupäkunkimantsu.* 22 ¿Tayta Diosta rabyanätsiytaku munarkaykanki? ¿Noqantsi paypita mas munayniyuqku kantsi?*
Tayta Dios alabashqa kananpaq imatapis ruranantsipaq nishqan
23 Munashqaykita rurapäkunaykipaq librina kaykashqaykita nirpis manami lapantatsu rurapäkunkiman. Tsaynöpis manami lapan rurashqaykikunatsu wawqi panikuna ali kawananpaq yanapan.* 24 Kikilantsi ali kawanantsipaqqa ama yarpachakushuntsu. Tsaypa trukanqa wakinkunapis ali kawananpaq yarpachakushun.
25 Mercäducho aytsata rantirqa ïdulukunapaq pishtashqanta o mana pishtashqantapis mana tapupaylapa rantipäkuy. Rantirpis ama yarpachakäriytsu. 26 Tayta Diospa palabranchöpis kaynömi niykan: “Tayta Diospami kay patsapis y kay patsacho kaqkunapis kaykan”.*
27 Tsaynöpis Tayta Diosman mana yärakuq runa mikunaykipaq qayatsishuptiki mana tapupaylapa lapan qarashushqaykita mikupäkuy. 28 Itsanqa pipis “tsay aytsataqa ïdulupaqmi churashqa” nishuptiki tsay wilashuqniki runata respitar ama mikuytsu. 29 Manami kikikikuna raykutsu mana mikunaykipaq niykä, sinöqa wilashuqniki runa lutanta mana yarpänanpaqmi.*
Tsayno niptï capaz wakinniki kayno nipäkunkiman: “Runakuna lutanta yarpaptilanqa ¿imanirtaq aytsata mana mikümantsu? 30 Tayta Diosta agradëcikurkur mikuptïqa manami pipis jamurpämanmantsu”.
31 Tsayno niptikipis noqa kaynömi nï: Mikurpis, upurpis y imata rurarpis Tayta Dios alabashqa kananpaq rurapäkunki. 32 Tsayno kaykaptinqa Israel runa kaptinpis, mana Israel runa kaptinpis, Diosman yärakuq mayiki kaptinpis rurashqaykita rikar qepaman kutikunan kaptinqa tsay rurashqaykita amana rurapäkunkitsu. 33 Noqapis manami kikiläpaqtsu ali kawayta munaykä, sinöqa lapanchöpis runa mayï ali kawananpaq y tsaynöpa atskaq salvakärinantami munaykä.