Proverbios
22 Qellayyuq y qoriyuq kashqanpitapis mas alimi kaykan pïmaypitapis ali rikashqa kashqantsi.
2 Rïcutapis y waktsatapis TAYTA DIOSMI kamashqa.*
3 Shumaq yarpachakuq runaqa mana alipitapis cuidakunmi.
Mana yarpachakuq runami itsanqa desgraciaman chayan.*
4 TAYTA DIOSTA mantsakuq humildi runaqa rïcuyanqami, pïmaypitapis ali rikashqami kanqa y ali kawaytami tarinqa.
5 Fiyu runataqa ima desgraciapis pasanmi.
Ali runaqa tsaykunapita qeshpinmi.
6 Wamrataqa wamra kashqanyaqla ali kawananpaq shumaq yachatsiy.
Awkisyarpis yachakushqantaqa manami qonqanqatsu.
7 Waktsakunataqa rïcumi munaynincho tsararan.
Jaqa yaykuqtaqa prestaqninmi munaynincho tsararan.
8 Fiyu runaqa jutsata rurashqanpitami nakanqapaq.
Tsay niraq runataqa TAYTA DIOSMI rabyashpan ushakätsinqapaq.
9 Waktsakunata kuyapar imalatapis melqapaqkunaqa bendiciontami chaskinqa.
10 Achäquita ashiq runata qarquptinqa manami chikinakuy, rimanakuy ni ashlinakuypis kanqanatsu.
11 Rasun kaqlata rimaq runataqa rey kuyanmi.
Shakya shakya parlaq runaqa reypa amïgunmi kaykan.
12 Tantiyakuq runataqa TAYTA DIOS imapitapis tsapanmi.
Lulakuqtami itsanqa pasaypa penqayman churan.
13 Qela runaqa aruyta mana munarmi kayno nin:
“Leonchari nänicho mikamanqa”.*
14 Runanta jarukuq warmipa kuyakuyninqa patsapa shiminnömi mantsariypaq kaykan.
Tsay warmiwan punuq runaqa TAYTA DIOSTAMI rabyanätsin.
15 Wamraqa mana cäsukuq karmi lutan ruraykunata imatapis ruran.
Tsayno kaqkunaqa astaptinraqmi wanakun*.
16 Rïcuyänan kashqa waktsata engañar o rïcuman regälukunata aparqa muchuymanmi chayanqa.
Tantiyakuq runakunapa kimsa chunka (30) yachatsikuyninkuna
17 Tantiyakuq runakuna yätsishushqaykita chaskikuy.
Paykuna tantiyatsishushqaykino imatapis ruray.
18 Yachatsishushqaykita imaypis yarparanki.
Tsaymi pitapis wilapänaykipaq imay hörapis listu kaykanki.
19 TAYTA DIOSMAN imaypis yärakunaykipaq yätsishayki.
20 Tsaymi kimsa chunka (30) yachatsikuykunata qampaq qelqaykä.
Tsaychömi kaykan yätsikuykuna y tantiyatsikuykuna.
21 Tsaykunata yachakurkurmi ali tantiyakuq kankipaq.
Tsaymi pipis tapukushuptiki shumaq yätsinkipaq.
1
22 Waktsa kashqanta rikaykur pitapis ama suwapankitsu.
Pïninpis mana kaqkunata juezpa nawpancho ama jitapaytsu.
23 TAYTA DIOSMI waktsakunapa favornin sharkunqa.
Waktsakunata qechuqkunataqa kikintami waktsayätsinqa.
2
24 Fiyu runawan y rabyaq runawanqa ama juntakankitsu ni amïgutapis rurankitsu.
25 Paykunawan juntakarqa mana ali costumbrinkunatami yachakunkipaq.
Paykunano kawarqa kunkaykiman cuchilluta churaqnömi kaykanki.
3
26 Pipapis garantian ama yaykunkitsu.
27 Tsay jaqata päganaykipaq mana kaptinqa cämaykitapis qechushunkipaqmi.
4
28 Unay ayluykikuna lindëru churashqanta ama wititsinkitsu.*
5
29 Ali arukuq runaqa mandaqkunapa yanapaqninmi kanqapaq.
Manami pampa runakunapa munayninchötsu kanqapaq.