Hebreos
Mana ajayaypa Jesucristuman yärakunantsipaq yätsishqan
12 Tsay unay runakunami yupaytapis mana atipaypaq jiruruparaykämantsi. Tsayno kaykaptinqa cörriq runa qepinta kachaykuqno lapan jutsantsita kacharishun. Yalinakuqkuna chayananpaq kaqman cörrishqanno noqantsipis Tayta Dios munashqanno wanunantsiyaq kawashun. 2 Salvamaqnintsi y tantiyatsimaqnintsi Jesucristo imano kawashqantapis tantiyakushun. Paymi runakunata salvar kushikunanpaq kashqanta musyashpan penqayta jitaykur cruzcho wanurqan. Tsaymi kananqa Tayta Diospa trönun alawqa kaq nawpancho jamaraykan.*
3 Tayta Diosman yärakärishqaykipita qepaman mana kutikärinaykipaq Jesucristo imano nakashqantapis tantiyakäriy. Payqa jutsasapa runakuna contran sharkuptinpis Tayta Dios munashqannömi imaypis kawarqan. 4 Qamkunapa contrayki sharkurpis manami mayqanikitapis wanutsishunkiraqtsu. 5 ¿Qonqaykärishqankiku Tayta Dios wamrankunapaq palabrancho kayno niykashqanta?
“Tayta Dios corrigishuptiki ama jaqayaytsu, hïju.
Jaqayänaykipa trukanqa chaskikuy.
6 Kuyashqan kaqtaqa Tayta Dios corriginmi.
Wamran kananpaq shuntashqan kaqtaqa yachakunanpaq astanmi”.*
7 Pï runapis wamrantaqa corriginmi. Tsaynölami wamran kaptiki Tayta Diospis corrigishunki. Tsayno kaykaptinqa Tayta Dios corrigishuptiki chaskikäriy. 8 Wamran kaqtaqa Tayta Dios lapantami corrigin. Mana corrigishuptikiqa manami wamrankunatsu karkaykanki.
9 Papänintsipis mana cäsukuq kaptintsiqa corrigimashqantsimi. Corrigimaptintsipis jaqayänantsipa trukan cäsukushqantsimi. Tsayno kaykaptinqa Tayta Dios corrigimaptintsi masraq cäsukushun. Cäsukurqa *mana ushakaq kawaytami tarishunpaq.
10 Papänintsipis makincho kashqantsiyaqlami munashqanno kawanantsipaq corrigimantsi. Tayta Diosmi itsanqa corrigimantsi pay jutsaynaq kashqanno jutsaynaq kanantsipaq. 11 Corrigimashqantsi höra fiyupa lakikurpis cäsukurqa Tayta Dios munashqannömi kawashunpaq.*
12 Tsayno kaykaptinqa makiki warkakaqno mananiraykarpis y qonqurniki matwakaqno qasakarpis valurapäkuy.* 13 Nänipita mana yeqaypa aywaqno imaypis alilata rurapäkuy.* Tsaynöpami weqru runa ishkiqno mana kankinatsu, sinöqa aliyashqa runanöna kapäkunki.
Tayta Diosta mana wasqipänantsipaq yätsishqan
14 Pïmaywanpis kuyanakur ali kawapäkuy. Tsaynöpis jutsata mana ruraypa Tayta Dios munashqanno kawapäkuy. Jutsata rurar kawaqkunaqa manami pipis Tayta Diospa nawpanman chayanqatsu. 15 Shumaq tantiyakäriy. Mayqanikipis jutsa rurayta mana kacharirqa manami salvakärinkipaqtsu. Jaqayashqa ama puripäkuytsu. Jaqayashqa purirqa venënuyuq asqaq jachano karmi wakinkunatapis jaqayätsinki.*
16 *Fornicación jutsata ama mayqanikipis rurapäkuytsu. Tsaynöpis Esaúno Tayta Diosta mana cäsukuq ama kapäkunkitsu. Esaúqa pachan raykulami qechpa kay derëchunta juk plätu mikuylapaq wawqinta rantikurqan.* 17 Musyashqaykinömi tsay bendicionta taytanpita chaskiyta munar mayjina waqarpis mana chaskirqannatsu.* *
18 Qamkunaqa manami Sinaí jirkaman* chayaqnötsu karkaykanki. Tsay jirkachöqa ninapis, tsakaypis y fiyupa wayrapis karqanmi. 19 *Cornëta waqamushqanta y Tayta Dios mantsakuypaq parlamushqanta mayarmi fiyupa mantsakärishpan ruwakärirqan manana parlapänanpaq.* 20 Tsaynöpis fiyupami mantsakärirqan Tayta Dios kayno niptin: “Runatapis uywatapis jirkaman witsaq kaqtaqa saqmaypa [o flëchaypa] wanutsipäkunki”.*
21 Fiyupa mantsakuypaq kaptinmi Moiséspis kayno nirqan: “Pasaypa mantsakurmi siksikyaykä”.*
22 Qamkunaqa *Sión jirkanman* y jana patsacho kaykaq Jerusalénman chayashqanönami karkaykanki. Tsay markaqa imayyaqpis kawaq Tayta Diospa markanmi kaykan. Tsaychömi yupaytapis mana atipaypaq tsaytsika *angilkuna Tayta Diosta kushishqa alabarkaykan. 23 Tayta Diosman lapan yärakuqkunawan juntakashqanömi karkaykanki. Qechpa wamra herenciata chaskiqno kaptikimi jutikikunapis jana patsacho qelqaraykan. Tsaynöpis pïmayta juzgaq Tayta Diospa nawpanman y jana patsacho kaykaq lapan salvashkunapa nawpanman chayashqanönami karkaykanki.
24 Tsaynölami Jesucristupa nawpancho kaykaqnöna karkaykanki. Paymi wanurqan Tayta Dios mushuq *pactuta rurar salvamänantsipaq. Jesucristo yawarninta jichashqanqa manami Abel yawarninta jichashqannötsu kaykan.* Abel yawarninta jichar wanushqanqa wanutsiq runa castigashqa kananpaqmi karqan. Jesucristo yawarninta jichar wanushqanmi itsanqa perdonashqa kanantsipaq kaykan.
25 Tsayno kaykaptinqa Tayta Dios nishushqaykita ama yupaytupaytsu. Chunyaq jirkacho Moisés nishqanta mana cäsukuqkunata Tayta Dios castigaykarqa jana patsapita nimashqantsita mana cäsukuptintsi peormi castigamäshun.
26 Sinaí jirkacho Tayta Dios parlamuptin tsay jirkapis pasaypami siksikyarqan. Kananpis Tayta Dios palabrancho kaynömi niykan: “Yapaymi kay patsata siksikyätsishaq. Manami kay patsalatatsu siksikyätsishaq, sinöqa jana patsatapis siksikyätsishaqmi”.*
27 “Yapaymi kay patsata siksikyätsishaq” nirqa lapan kamashqankunata siksikyätsir elqätsinanpaq kashqantami musyatsimantsi. Tsayno ruraptinmi mana ushakaqkunalana quëdanqa.
28 Tayta Dios *mandaykashqanqa imaypis manami ushakanqatsu. Tsay mandaykashqantaqa chaskiykantsinami. Tsaymi agradëcikushpantsi lapan shonquntsiwan payta alabashun. Payta mantsakur munashqanno imaypis kawashun. 29 Imatapis nina rupar ushashqannömi mana cäsukuqkunata Tayta Diosnintsi ushakätsinqa.*