Hechos
Corintucho Pablo wilakushqan
18 Tsaypitanami Atenaspita aywakur Corinto markamanna Pablo chayarqan. 2 Tsaychömi Aquila jutiyuq Israel runata tarirqan. Aquilaqa Ponto provinciacho yuriq runami karqan. Warminpa jutinmi karqan Priscila. Paykuna tsayraqmi Italiapita Corintuman chayashqa karqan. Corintuman aywakurqan Claudio *César lapan Israel runakunata Romapita qarquptinmi. Reqinakushpanmi 3 paykunawan Pablo tarqan toldërata rurashpan. Pablunömi Priscila y Aquilapis toldëra rurayta yacharqan.
4 Cada jamay junaq *sinagögaman aywarmi Israel runakunata y mana Israel runakunatapis Jesucristupita Pablo yachatsirqan. 5 Macedonia provinciapita Silas y Timoteo chayaptinnami Pabluqa aruyninta kachaykur waran waran Tayta Diospa wilakuyninta wilakurqan. Wilakurmi Israel mayinkunata tantiyatsirqan Jesúsqa salvamaqnintsi Cristo kashqanta. 6 Tsayno wilakuptinpis Israel runakunaqa Pablupa contran sharkapäkushpanmi tukuyta ashlipäkurqan. Tsaymi röpanta tapsiriykur Pablo kayno nirqan: “Tayta Dios castigashunaykipaq kikikikunami jutsayuq karkaykanki. Noqaqa Tayta Diospa wilakuyninta maynami wilapashqä. Kananpitaqa mana Israel runakunatanami wilapäshaq”.
7 Tsayno nirmi tsay sinagögacho yachatsinanpa trukanqa Ticio Justupa wayinchöna yachatsirqan. Justuqa mana Israel runa kaykarpis Tayta Dios munashqannömi karqan. Paypa wayin karqan sinagöga nawpalanchömi. 8 Tsaycho yachatsiptinmi sinagögacho mandaq runa y tsay runapa wayincho taqkunapis Señor Jesucristuman yärakärirqan. Tsay runapa jutinmi karqan Crispo. Tsaynölami Corintucho taq wakin runakunapis Pablo wilakushqanta mayar Jesúsman yärakushpan *bautizakärirqan.
9 Juk tsakaymi Pabluta revelacioncho yuriparkur Jesucristo kayno nirqan: “Mana mantsakuypa y mana upälakuypa wilakuynïta wilakuy. 10 Kay markacho salvanäpaq kaq runakuna atskaqmi karkaykan. Tsaymi wilakuptiki pipis mana yatashunaykipaq qamwan kaykäshaq”.
11 Tsayno niptinmi Tayta Diospa wilakuyninta yachatsishpan juk wata soqta killa Corinto markacho Pablo tarqan.
12 Galión jutiyuq runa Acaya provinciapa* mandaqnin kashqan witsanmi Pablupa contran Israel runakuna sharkapäkurqan. Tsaymi Pabluta Galiónpa despächunman apaykur 13 kayno nipäkurqan: “Kay runaqa Tayta Diospa leyninkunata mana cäsukurmi lutankunata yachaykätsin”.
14 Pablo parlayta qalaykunanpaq kaykaptinmi Galión kayno nirqan: “Israel runakuna, kay runa suwakushqa o pitapis wanutsishqa kaptinqa qamkunata atiendïmanmi. 15 Leynikikunapita rimanakushqaykimanqa manami jatikämümantsu. Kikikikuna tsaytaqa arreglapäkuy”.
16 Tsayno nirmi despächunpita qarqurqan. 17 Tsaypitami sinagögacho mandaq Sóstenesta despächu punkucho tsariykur runakuna pasaypa maqapäkurqan. Maqaptinpis Galiónta manami imapis qokurqantsu.
Antioquíaman Pablo kutishqan
18 Tsaypita atska killaraqmi Corinto markacho Pablo tarqan. Tsaypitanami wawqi panikunapita despidikurir Cencrea markaman aywarqan. Tsaychönami Tayta Diosta promitishqanta cumplir aqtsanta rutukurqan.* Nirkurnami Priscilawan y Aquilawan *büquiman witsarkur Siria provinciaman aywakurqan.
19 Éfeso markaman chayaykurmi Priscila y Aquila tsaycho quëdapäkurqan. Pablunami Éfesupita manaraq pasar *sinagögaman aywaykur Israel runakunata Jesúspita wilaparqan. 20 Sinagögacho kaq runakuna qoyäpänanpaq ruwakäriptinpis Pablo manami munarqantsu. 21 Tsaypa trukanqa paykunapita despidikurmi kayno nirqan: “[*Pascuapaqmi Jerusalénman imaykanöpapis chayayta munaykä.] Tayta Dios munaptinqa yapaymi kutimushaq”.
Tsayno nishpanmi büquiman witsarkur Éfesupita aywakurqan.
22 Cesarea markaman chayaykurnami büquipita yarqurir Jerusalénman aywarqan wawqi panikunata watukunanpaq. Tsaypitanami Antioquíaman kutikurqan. 23 Tsaycho taykashqanpitami Galacia y Frigia provinciakunapa yapay kutir markan markan aywarqan discïpulukunata* shakyätsir.
Éfesucho Apolos wilakushqan
24 Tsay witsanmi shumaq parlayta yachaq Apolos jutiyuq Israel runa Éfeso markaman chayarqan. Pay karqan Alejandría markapitami. Tsaynöpis Tayta Diospa palabranta shumaqmi yacharqan. 25 Tayta Diospa wilakuyninta ali yacharpis bautismupitaqa Juan yachatsishqalantami yacharqan. Tsayno karpis Señor Jesucristupita lapan shonqunwanmi kushishqa yachatsirqan. 26 *Sinagögacho pitapis mana mantsakuypa wilakuykaqta mayarmi Priscila y Aquila juk läduman pushaykur Tayta Diospa wilakuyninta masta tantiyatsipäkurqan.
27 Acaya provinciaman Apolos aywayta munaptinmi wawqi panikuna shakyätsirqan. Tsaymi Acayacho kaq wawqi panikunaman cartata apatsirqan chayaptin chaskikärinanpaq. Tsay wawqi panikuna yärakärinanpaqmi Tayta Dios kuyapar tantiyatsirqan. Acayaman Apolos chayashqanmi Jesucristuman yärakuqkunapaq pasaypa ali karqan. 28 Paymi Israel runakunata Tayta Diospa palabranta shumaq yachatsir Jesús salvamaqnintsi Cristo kashqanta tantiyatsirqan.