Romanos
Tayta Diosta sirvinantsipaq churamashqantsi
12 Wawqi panikuna, qamkunatami ruwakü Tayta Diospa makinman kawaynikita kachaykunaykipaq. Pay kuyapaykäshuptikiqa kawaykaq *santu sacrificiu kaykulay. Tsayno karmi Tayta Dios munashqanno rasunpa sirvipäkunki. 2 Wakin runakuna jutsata ruraptinpis qamkunaqa jutsata ama rurapäkuytsu. Yarpaynikikunapis nawpata kashqannöqa ama katsuntsu, sinöqa Tayta Dios munashqannöna katsun. Tsayno kawarmi tantiyapäkunki pay munashqanno kawayqa kushikuypaq kashqanta.
3 Kuyapämarmi Tayta Dios wilakuqnin kanäpaq churamashqa. Tsaymi lapaykita kayno nï: Ama yarpapäkuytsu wakin runakunapita mas väliq kashqaykita. Payman yärakunantsipaq Tayta Dios yanapaykämaptintsiqa tantiyakushun lapantsi välishqantsita. 4 Cuerpuntsicho atska partintsikuna karpis juk cuerpulami kaykan. Tsayno karpis manami tsay ruraylatatsu ruran. 5 Tsaynölami Jesucristuta chaskikuqkuna atskaq karpis juknintsi juknintsipis juk cuerpunöla kaykantsi.*
6 Tsayno kaptintsimi Tayta Dios juknintsi juknintsita churamantsi pay munashqanno sirvinantsipaq. Profëta kanantsipaq churamaptintsiqa payman yärakur wilakuyninta wilakushun. 7 Yanapanantsipaq churamaptintsiqa yanapashun. Yachatsinantsipaq churamaptintsiqa yachatsishun. 8 Shakyätsinantsipaq churamaptintsiqa shakyätsishun. Imatapis qaranantsipaq* churamaptintsiqa lapan shonquntsiwan qarashun. Mandanantsipaq churamaptintsiqa shumaq yarpachakuykur mandashun. Kuyapäkuq kanantsipaq churamaptintsiqa kushishqala pitapis yanapashun.*
Imano kawanantsipaqpis yätsishqan
9 Janan shonqula kuyanakunaykipa trukanqa lapan shonquykiwan kuyanakäriy.
Lutankunata ruranaykipaqqa ama yarpaylapis yarpaytsu. Tsaypa trukanqa alilata rurar kawapäkuy.
10 Ayluykiwan kuyanakushqaykino kuyanakäriy. Tsaynöpis jukniki jukniki respitanakäriy. Kikilaykikuna ali kawanaykipaq yarpachakärinaykipa trukanqa wakinkunapis ali kawananpaq yarpachakäriy.
11 Ama qela kapäkuytsu, sinöqa kushi kushila Tayta Diosta sirvipäkuy.
12 Tayta Diosta shuyäkur kushi kushila kawakäriy.
Imano nakarpis payman yärakäriy.
Imaypis payta manakäriy.
13 Jesucristuman yärakuq mayiki nisidächo kaptinqa yanapay. Wayikiman chayamuptinpis patsatsiy.*
14 Chikishuqnikipa wasanta ama rimapäkuytsu. Tsaypa trukanqa Tayta Diosta manakäriy yanapananpaq.*
15 Kushishqa kaqkunawan kushikäriy. Waqaqkunawan waqapäkuy.
16 Jukniki juknikipis ali kawapäkuy. Runa tukunaykipa trukanqa humildi kaqkunawanpis kuyanakur kawapäkuy. Ama yachaq tukäriytsu.*
17 Chikipäkushuptikipis ama chikipäkuytsu. Tsaypa trukanqa pïmaypis rikakunanpaq alilata rurar kawapäkuy. 18 Imaykanöpapis lapan runakunawan ali kawapäkuy.
19 Kuyay wawqi panikuna, runakuna chikishuptikipis ama vengakäriytsu. Tsaypa trukanqa Tayta Dios juzgananpaq paypa makinman kachaykuy. Tayta Diospa palabranchöpis kaynömi qelqaraykan: “Lutanta rurashqanpita kikïmi juzgashaq”.*
20 Mastapis kaynömi niykan:
“Chikishuqniki yarqanaptinqa mikuyta qaraykuy.
Yakunaptinqa yakuta makyaykuy.
Tsayno ruraptikimi pasaypa penqakunqapaq”.*
21 Runakuna lutanta ruraptinpis qamkunaqa alilata rurapäkuy.