Eclesiastés
11 Tantaykita yakuman jitay.
Wara warantinqa tsay jitashqaykita tarinkipaqmi.*
2 Tsay nishqannöla kashqalanpita pïmaytapis yanapay.
Wara warantinkuna imapis pasashuptiki kikikitapis yanapashunkimi.
3 Pukutay yanawyayparaq juntaptinqa musyantsimi tamyamunanpaq kashqanta.
Yöraqa witsaypa tuniptin o uraypa tuniptinpis musyantsimi tunishqalancho ushakänanpaq kashqanta.
4 Tsaki jirka lädupita wayra shamuptinqa musyantsimi manaraq murunantsipaq kashqanta.
Lamar lädupita pukutay juntämuptinqa musyantsi manaraq cosechanantsipaq kashqanta.
5 Itsanqa manami musyantsitsu wayra maypa aywashqanta*,
mamanpa pachancho wamra imano rurakashqanta*
y imaykatapis kamaq Tayta Dios imata rurashqantapis.
6 Tsaynöpis manami musyantsitsu punta muruy o qepa muruy mas ali wayunanpaq kashqanta.
Capazchari ishkanpis ali wayunqa.
Tsayno kaptinqa puntatapis y qepatapis murukushun.
Mözukunata yätsishqan
7 Atsikyay patsacho kawayqa pasaypa kushikuypaqmi kaykan. 8 Atska wata kushishqa kawarpis wanurqa atsikyay patsata manami imaypis rikankipaqnatsu. Manami musyankitsu wanukur imano kanaykipaq kashqantapis.
9 Mözukuna, mözu kashqaykiyaq shonquyki munashqanno kushishqa kawapäkuy. Itsanqa tantiyakäriy lapan rurashqaykipita Tayta Dios juzgashunaykipaq kashqanta. 10 Mözu kashqaykipis pasaqla kaykaptinqa mana rabyanaypa y jutsata mana ruraypa kawapäkuy.