Hebreos
Jesucristupa wilakuyninta cäsukunantsipaq nishqan
2 *Angilkunapitapis Jesucristo mas munayniyuq kaykaptinqa wilakuyninta mayashqantsikunata shumaq cäsukushun. Mana cäsukurqa lutankunatapis ruraykushwanchari. 2 *Angilkuna apamushqan leykunata* mana cäsukuq runakunatapis Tayta Dios castigaykaptinqa 3 ¡imajinanparaq castigamäshun salvamänantsipaq kaq wilakuyta mana cäsukuptintsiqa!
Tsay wilakuytami Señor Jesucristo puntata wilakurqan. Tsaypitanami wilakushqanta mayaqkuna noqantsita wilamashqantsi. 4 Wilakuynin rasunpa kashqanta Tayta Dios musyatsimashqantsi señalkunata y mantsariypaq milagrukunata rurashpanmi. Tsaynöpis musyatsimashqantsi Espíritu Santuwan habilidäkunata kikin munashqanno qomashpantsimi.*
Jesucristo yanapamashqantsi
5 Mushuq patsata manami *angilkunapa makinmantsu Tayta Dios churashqa, sinöqa Jesucristupa makinmanmi. 6 Tsaymi palabrancho kayno niykan:
¿Imanataq runa kaykan tsayjinanpa paypaq yarpachakunaykipaq?
¿Imanataq runa kaykan shumaq kuyaykunaykipaq?
7 Runata kamashqanki cäsi angilno munayniyuq kananpaqmi.*
Reytanöpis churashqanki munayniyuq y respitashqa kananpaqmi.
[Lapan kamashqaykikunatapis munayninmanmi churashqanki.]
8 Kay patsacho kaqkunataqa lapantami makinman churashqanki.*
Makinman lapanta churashqanta niptinpis manaraqmi rikantsiraqtsu runapa munaynincho lapan kashqanta. 9 Tsayta manaraq rikarpis y Jesucristo kay patsacho kashqanyaq angilkunapita mënus munayniyuq kaykaptinpis musyantsimi munayniyuq y respitashqana kananpaq Tayta Dios payta churashqanta. Tayta Dios kuyapäkuq karmi payta tsayno churarqan lapan runakunata salvananpaq wanushqa kaptin.* 10 Jesucristo salvamaqnintsi kananta munarmi lapantapis kamaq y lapanpaq munayniyuq Tayta Dios payta kachamurqan noqantsi rayku nakar wanunanpaq. Tsaynöpami wamrankunata salvar gloriaman pushanqa.
11 Tsaymi runakunata salvaq Jesúspis y salvashqan kaqkunapis tsay Taytalana kaykantsi. Tsay Taytala karmi salvashqan kaqkunata Jesucristo mana penqakuypa nimantsi wawqinkuna y paninkuna kashqantsita. 12 Tayta Diospa palabranchöpis Jesucristo kaynömi niykan:
“Salvakuq kashqaykipitami wawqïkunata wilapäshaq.
Paykunawan juntakaykurmi alabashayki”.*
13 Mastapis kaynömi niykan: “Noqaqa paylamanmi yärakushaq”.*
Tsaynöpis kayno nin: “Tayta Dios qomashqan wamräkunawanmi kaycho kaykä”.*
14 Diospa wamrankuna ushakaqla kaptinmi Jesucristupis noqantsino yurirqan y noqantsino wanurqan. Tsayno wanurmi wanuypaq munayniyuq diabluta vincirqan. 15 Tsaynöpami wanuyta mantsakur kawashqantsipita jorqamashqantsi. Kananqa wanuytapis manami mantsakuntsinatsu.
16 Jesucristuqa manami angilkunata yanapananpaqtsu shamurqan, sinöqa Abraham aylu kaqkunata yanapananpaqmi. 17 Yanapamänantsipaqmi noqantsino kay patsacho runa karqan. Tsaynöpami Tayta Diospa nawpancho kuyapäkuq y lapantapis cumpliq mandaq cüra rikakurqan. Paymi sacrificiu kashqa jutsantsikunapita Tayta Dios perdonamänantsipaq. 18 Jesucristutapis *Satanás tentar nakatsishqa kaptinmi noqantsitapis tentamaptintsi Jesucristo yanapamäshun.