1 Pedro

2 Jesucristupa wilakuyninta chaskikushqana kaykarqa jutsa ruraykunata kachariyna. Ama lulakäriytsu, ama ali tukäriytsu, ama chikinakäriytsu ni pipa wasanta rimapäkuytsu. 2 Iti wamra chuchunashqanno qamkunapis Tayta Diospa palabranta imaypis yachakäriy. Tsaynöpami wamra winar tantiyakushqanno Tayta Dios munashqanno kawapäkunaykipaq tantiyakärinki. Tsaypaqmi Tayta Dios salvashushqanki. 3 Tsayno yachakärinaykipaqmi Tayta Dios kuyakuq kashqanta tantiyapäkushqankina.*

Cimientucho alinnin rumino Jesucristo kashqan

4 Jesucristuta manakaqman churapäkuptinpis cimientucho alinnin rumino kananpaqmi Tayta Dios churashqa. Tsayno kaykaptinqa Jesucristuman yärakäriy. 5 Qamkunapis rumino kaptikimi Tayta Dios churaykäshunki templun kapäkunaykipaq y payta sirviq *santu cürakuna kapäkunaykipaq. Tsaymi *altarman churashqa sacrificiuno kashpantsi lapan shonquykiwan payta sirvipäkuy. Jesucristupa yanapayninwan sirvirmi Tayta Dios munashqanno kapäkunkipaq.

7 Yärakuqkunapaqqa Jesucristo kushikuypaqmi kaykan. Mana yärakuqkunapaqmi itsanqa Tayta Diospa palabrancho kayno qelqaraykan: “Wayi sharkatsiqkuna ‘kay rumiqa manami alitsu’ nir jitarishqanmi wayi esquïnan cimientuchöna churaraykan”.*

8 Mastapis kaynömi niykan: “Takakätsikuq y tunitsikuq ruminömi kashaq”.*

Jesucristuman mana yärakuqkunaqa Tayta Diospa palabranta mana cäsukurmi tsay rumiman takakaqno karkaykan. Tsayno kananpaqmi destinashqa karqan.

9 Qamkunami itsanqa kaykanki Tayta Dios akrashqan runakuna, payta sirviq cürakuna, kuyashqan santa nación runakuna* y paypa makincho kaykaq runakuna.* Paymi tsakäpakushqano kawarkaykaptiki atsikyaqman jorqushushqanki* kuyakuq kashqanta pïmaytapis wilapänaykipaq. 10 Nawpataqa manami Diospa wamrantsu kapäkurqayki. Kananmi itsanqa wamrankunana karkaykanki. Nawpataqa manami kuyapäshurqaykitsu. Kananmi itsanqa kuyapäshushqankina.*

Tayta Dios munashqanno kawanantsipaq nishqan

11 Kuyay wawqi panikuna, kay patsacho qorpanöla kapäkuptikimi* qamkunata ruwakü lutan yarpaykunata mana rurapäkunaykipaq. Tsay yarpaykunaqa contraykimi kaykan. 12 Jesucristuta mana chaskikuqkunawanpis ali kawapäkuy. Ali kawapäkushqaykita rikarmi manakaqkunata kanan jitapäshushpaykipis Jesucristo kutimunan junaq Tayta Diosta alabapäkunqa.

Autoridäkunata cäsukunantsipaq tantiyatsishqan

13 Señor Jesucristuta pipis manakaqman mana churananpaq lapan mandashuqnikikunata cäsukäriy. Tsayno cäsukäriy nación mandaq rey kaptinpis 14 y autoridäkuna kaptinpis. Autoridäkunatami rey churashqa fiyu ruraqkunata castigananpaq y ali ruraqkunapa favornin sharkunanpaq. 15 Tayta Diosqa munan alilata rurar kawapäkunaykitami. Tsayno kawapäkuptikiqa Diosta mana cäsukuq runakuna manami wasaykita rimanqanatsu.

16 Munashqaykino kawapäkunaykipaq librimi karkaykanki. Librina karpis jutsata ama rurapäkunkitsu, sinöqa Tayta Diosta sirvir pay munashqannöla kawapäkunki. 17 Lapan runakunatapis respitapäkunki. Yärakuq mayikikunawan kuyanakärinki. Tayta Diosta *mantsakur kawapäkunki. Reyta respitapäkunki.

Patronninta cäsukunanpaq yätsishqan

18 Ashmaykuna, patronniki ali runa kaptinpis o fiyu kaptinpis respitar cäsukärinki. 19 Tayta Dios munashqanno kawapäkuptiki jutsayuqtano nakatsishuptikipis ama jaqayankitsu. Mana jaqayaypa kawarqa alitami rurarkaykanki. 20 Lutanta rurashqaykipita nakarqa ¿ima alitataq rurarkaykanki? Alikunata rurashqaykipita nakarmi itsanqa Tayta Dios munashqanno kawarkaykanki.

21 Tsayno nakapäkunaykipaqmi Tayta Dios qayashushqanki. Jesucristo noqantsi rayku nakashqa kaptinmi tantiyakuntsi pay nakashqanno noqantsipis nakanantsipaq kashqanta. 22 Payqa manami ima jutsatapis rurarqantsu ni pitapis lulaparqantsu.* 23 Runakuna ashliptinpis upälakurqanmi. Nakatsiptinpis manami juraparqantsu. Tsaypa trukanqa pitapis mana jananpaypa juzgaq Tayta Diospa makinmanmi kachaykurqan.*

24 Jesucristo cruzcho nakarmi noqantsipa jutsantsipita wanurqan. Tsayno wanurqan noqantsipis jutsa ruraypaq wanur Tayta Dios munashqanno kawanantsipaqmi. Yawarninta jicharmi aliyätsimashqantsi.* * 25 Nawpataqa oqrakashqa uyshanömi karqantsi.* Kananmi itsanqa Jesucristupa makinchöna kaykantsi. Paymi mitsimaqnintsi y ali rikamaqnintsi.