Proverbios
12 Tantiyakuq runaqa pipis corrigiptin chaskikunmi.
Mana tantiyakuq runami itsanqa corrigiptinpis mana chaskikuntsu.
2 Ali runataqa TAYTA DIOS yanapanmi.
Fiyu runatami itsanqa mana yanapantsu.
3 Fiyu runataqa pïmaypis chikinmi.
Ali runatami itsanqa pïmaypis kuyan.
4 Ali warmiqa runanta kushikatsinmi.
Mana ali warmiqa runanpaq kiru nanaymi kaykan.
5 Ali runaqa alita rurananpaqmi yarpachakun.
Fiyu runami itsanqa pitapis lulapänanpaq yarpachakun.
6 Fiyu runa shimita jatipashqanqa pitapis wanutsinanpaq trampanömi kaykan.
Ali runa yätsishqanmi itsanqa ali kawananpaq kaykan.
7 Fiyu runakunaqa manaraqpis aykälatami ushakan.
Ali runakunami itsanqa kikinpis y aylunkunapis atska wata kawapäkunqa.
8 Tantiyakuq runataqa pïmaypis alimi rikan.
Mana tantiyakuq runatami itsanqa pïmaypis manakaqman churan.
9 Pishipakuycho kaykar runa tukushqanpitaqa mas ali kaykan waktsala karpis amïguyuq kaymi.
10 Ali runaqa uywantapis kuyapanmi.
Fiyu runapaqa kuyapäkuyninpis manami kantsu.
11 Arukuq runapaqa mikuyninpis putsuy putsuymi kanqa.
Qela runakunawan talukaq runaqa yarpayniynaqmi kaykan.
12 Fiyu runaqa jukpa kaqtami munapan.
Ali runami itsanqa kikin arukushqalanwan kushishqa kawan.
13 Fiyu runaqa shimilanpitami ima nakaymanpis chayan.
Ali runami itsanqa ima nakaypitapis ali yarqun.
14 Pï runapis rimashqanman tupumi ali rikashqa o mana ali rikashqapis kanqa.
Tsaynölami rurashqanman tupu ali rikashqa o mana ali rikashqapis kanqa.*
15 Mana tantiyakuq runaqa lutanta rurarpis ali kashqantami yarpan.
Tantiyakuq runami itsanqa yätsishqanta chaskikun.
16 Mana tantiyakuq runaqa imalapitapis juklami rabyakun.
Tantiyakuq runami itsanqa ashliptinpis upälakun.
17 Ali testïguqa rasun kaqlatami riman.
Rantiy testïgumi itsanqa imatapis rasuntanöraq parlan.
18 Mana tantiyakuq runakuna rimashqanqa cuchilluwan tuksishqanömi shonqunman chayaykun.
Tantiyakuq runa rimashqanmi itsanqa jampino kaykan.
19 Rasun kaqta rimaq runaqa atska watami kawanqa.
Lulakuq runami itsanqa manaraqpis aykäta ushakanqa.
20 Fiyu runaqa pitapis lulapänalanpaqmi yarpachakun.
Piwanpis ali kawaq runa yätsiptinqa pïmaypis kushikunmi.
21 Ali runataqa manami imapis pasantsu.
Fiyu runatami itsanqa imaykapis pasan.
22 Lulakuq runataqa TAYTA DIOS manami rikaytapis munantsu.
Mana lulakuq runatami itsanqa kuyan.
23 Tantiyakuq runaqa yachaq kashqanpita manami sumätsikuntsu.
Mana tantiyakuq runami itsanqa lutanta rurarpis sumätsikun.
24 Arukuq runaqa mandaqmi rikakun.
Qela runami itsanqa ashmay rikakun.
25 Fiyupa lakikurqa jukniraqyashqami purin.
Pilapis ali shiminpa parlapaptinqa kushirkunmi.
26 Ali runaqa runa mayinta shumaqmi tantiyatsin.
Fiyu runami itsanqa lutan ruraykunaman jitarpun.
27 Qela runaqa manami imatapis tarintsu.
Arukuq runami itsanqa imaykayuqpis rikakun.
28 Ali runaqa imaypis alimi kawan.
Toqshun tsakishqa runami itsanqa kikin wanuyta ashin.