Efesios
Taytanwan tsurinkuna imano kawananpaq yätsishqan
6 Wamrakuna, Señor Jesucristuta chaskikushqa kaykarqa mamaykita y taytaykita imaypis cäsukäriy. Tsayno cäsukärinaykitami Tayta Dios munan.* 2 Promësayuq punta kaq mandamientupis kaynömi nin: “Mamaykita y taytaykita respitanki. 3 Tsaynöpami kay patsacho atska wata kawankipaq”.*
4 Wamrayuqkuna, wamraykikunata ama rabyanätsiytsu.* Tsaypa trukanqa shumaq tantiyatsipäkuy Señor Jesucristo munashqanno kawapäkunanpaq.
Ashmaywan patrón ali rikanakunanpaq yätsishqan
5 Ashmaykuna, kay patsacho kaq patronnikita cäsukur mandashushqaykita lapan voluntäwan rurapäkuy. Jesucristuta cäsukushqaykinöla patronnikitapis cäsukäriy. 6 Patronniki rikashunalaykipaqqa ama aruq tukäriytsu, tsaypa trukanqa Jesucristupa sirviqnin kar lapan voluntänikiwan arupäkuy. Tsaynöpami Tayta Dios munashqanta rurapäkunki.
7 Patronniki mandashushqaykita lapan voluntänikiwan rurapäkuy. Ama runakunapaq aruqnölaqa arupäkuytsu, sinöqa Señor Jesucristupaqno arupäkuy. 8 Ashmay kaptintsipis mana ashmay kaptintsipis alita rurashqantsipitami Jesucristo gloriacho premiuta qomäshunpaq.*
9 Patronkuna, qamkunapis ashmaynikikunata ali rikapäkuy. Qayapänaykipa trukanqa ali shimilaykipa shakyätsipäkuy. Tantiyakäriy ashmay karpis patrón karpis jana patsacho kaykaq patronnintsipa makincho kaykashqantsita.* Payqa lapantsitapis iwalmi rikamantsi.*
Supaykunata ichipänantsipaq yätsikuy
10 Wawqi panikuna, Señor Jesucristo munayninwan yanapaykäshushqaykiman tupu kawapäkuy. 11 Diabluta ichipänaykipaq Tayta Dios kamaripäshushqaykikunata jatikäriy.* 12 Noqantsi manami runa mayintsiwantsu guërracho kaykantsi, sinöqa munayniyuq *supaykunawanmi. Paykunaqa mana rikakaq karpis intëru kay patsachömi imaykatapis mana alikunata rurarkaykan. 13 Tsayno kaykaptinqa Tayta Dios kamaripäshushqaykikunata jatikäriy. Tsayno kaykaptikiqa supaykuna shamurpis manami vincishunkitsu.
14 Wachkuykiqa rasun kaqlata parlashqaykimi kaykan.*
Chalëcuykiqa runa mayikita ali rikashqaykimi kaykan.*
15 Bötasnikiqa Jesucristupa wilakuyninta wilakärishqaykimi kaykan.*
16 Escüduykiqa Tayta Diosman lapan shonquykiwan yärakushqaykimi kaykan. Tsay escüduwanmi nina rataykaq flëchawanno *Satanás atacashuptikipis tsapakärinki.*
17 Cascuykiqa Tayta Dios salvashushqaykimi kaykan.*
Espädaykiqa Tayta Diospa palabranmi kaykan. Tsaywanmi Espíritu Santu imaypis yanapashunki.*
18 Imay hörapis Espíritu Santu tantiyatsishushqaykino Tayta Diosta manakäriy. Mana ajayaypa imaypis ruwakäriy. Yärakuq mayikikunapaqpis mana qonqaypa manakäriy.
19 Noqapaqpis Tayta Diosta manakuykulay wilakur shumaq parlanäpaq y pitapis mana mantsakuypa Jesucristupa ali wilakuyninta wilapänäpaq. 20 Tayta Diospa wilakuqnin kar wilakuyninta wilakushqäpitami prësu kaycho wichqaraykä. Tsayno kaptinpis Tayta Diosta manakäriy mana mantsakuypa pitapis wilapänäpaq.*
Carta ushanan
21 Kuyay wawqintsi Tíquico* chayamurmi wilapäkushunki imano kaykashqäta y imata rurashqätapis. Paypis Señor Jesucristupa wilakuqninmi kaykan. 22 Tsaymi payta kachaykämü imano kaykashqätapis wilashunaykipaq. Paymi shakyätsishunki Tayta Diosman shumaq yärakärinaykipaq.*
23 Tayta Dios y Señor Jesucristo yanapaykuläshunki payman yärakur kuyanakunaykipaq y jawka kawapäkunaykipaq. 24 Señor Jesucristuta lapan shonqunwan kuyaqkunata Tayta Dios kuyapar imaypis yanapaykulätsun. [Amén.]