Lucas
Jakapäkuykaq runata Jesús aliyätsishqan
14 Tsaypitana juk jamay junaqcho Jesús aywarqan mandaq *fariseupa wayinman mikuq. Tsaycho kaykaq runakunami Jesústa rikaparkaykarqan “mä imatashi ruranqa” nipäkushpan. 2 Intëru cuerpun jakapäkuykaq runata Jesús rikarmi 3 ley yachatsiqkunata y fariseukunata tapurqan kayno nir: “Qeshyaq runata jamay junaqcho ¿aliyätsishwanku o manaku?”
4 Tsayno niptin paykunaqa manami imatapis rimakärirqantsu. Tsaymi qeshyaykaq runata Jesús yataykur aliyätsishpan kayno nirqan: “Kananqa wayikipana aywakuy”.
5 Nirkur tsay runakunata kayno nirqan: “Mayqaykipapis tsuriki o töruyki pözuman jeqaptin jamay junaq kaykaptinpis ¿manaku jinan höra jorquq aywanki?”*
6 Tsayno niptin manami imatapis rimakärirqantsu.
Punta puntaman mana jamakunantsipaq Jesús yachatsishqan
7 Qayatsishqan runakuna jamakärinanpaq punta puntamanraq aywaykashqanta rikaykurmi Jesús kayno nirqan: 8 “Casaray fiestaman qayatsishuptiki punta puntamanqa ama jamakärinkitsu. Capazmi qamkunapita mas respitädu runata qayatsishqa kanman. 9 Tsaycho jamaptikiqa qayatsishuqnikimi kayno nishunki: ‘Pay jamakunanpaq witikuy’. Tsayno nishuptiki penqaytukushqami qepaman aywar jamakärinkipaq. 10 Tsaypa trukanqa fiestaman qayatsishuptiki qepalaman jamakärinki. Tsaymi qayatsishuqniki shamur kayno nishunki: ‘Amïgu, mas puntaman pasakalämuy’. Tsayno jamatsishuptikiqa qamwan jamakuqkuna respitashunkipaqmi. 11 Orgullösu kaqkunaqa penqayman churashqami kanqa. Humildi kaqkunami itsanqa aliman churashqa kanqa”.
Mikunanpaq pïkunata qayatsinantsipaq Jesús nishqan
12 Nirkur wayinman pushaq *fariseutapis Jesús kayno nirqan: “Mikupäkunaykipaq pitapis qayatsirqa ama qayatsinkitsu kuyanakushqalaykitaqa, wawqilaykitaqa, aylulaykitaqa ni rïcu kaq vecïnulaykitaqa. Paykunalata qayatsiptikiqa tumaykita kutitsishunkipaqmi. 13 Tsaypa trukanqa qayatsinki waktsakunata, ushukunata, weqrukunata y qaprakunata. 14 Paykuna mana kutitsishuptikipis ali ruraq runakuna kawarimushqan junaqmi Tayta Dios kutitsishunkipaq”.
Mikunanpaq qayatsishqan runakunaman Jesús tinkutsishqan
15 Tsaymi mësacho Jesúswan jamaraykashqanpita juk runa kayno nirqan: “¡Ima kushishqaraq kanqa Tayta Dios *mandaykashqancho mikuqkuna!”
16 Tsayno niptin Jesús kayno nirqan: “Juk runashi atska runakunata qayatsirqan wayincho mikunanpaq. 17 Mikuy listuna kaptinshi ashmayninta kacharqan invitashqan runakunata kayno ninanpaq: ‘Lapanpis listunami. Juklashi aywakuläshun’.
18 “Tsay ashmay chayaptinshi lapanpis aywayta mana munapäkurqantsu. Tsayshi juknin kayno nirqan: ‘Rantishqä chakrata rikaqraqmi aywashaq. Noqapita ama jaqayaykulätsuntsu’.
19 “Jukaqnashi kayno nirqan: ‘Pitsqa yuntami rantishqä. Tsaymi yachatsiq aywaykä. Noqapita ama jaqayaykulätsuntsu’.
20 “Jukaqnashi kayno nirqan: ‘Tsayraqmi warmita ashishqä. Tsaymi mana aywashaqtsu’.
21 “Tsawraqa kachashqan ashmay kutiykur patronninta wilarqan runakuna imano nishqantapis. Wilaptinshi patronnin fiyupa rabyakur ashmayninta kayno nirqan: ‘Pläzakunapa y cällikunapa jukla aywar waktsakunata, ushukunata, weqrukunata y qaprakunata pushamuy’.
22 “Nishqanno pushaykurshi patronninta kayno nirqan: ‘Nimashqaykinölami pushamushqä, tayta. Tsayno kaptinpis wayikiman manaraqmi juntanraqtsu’.
23 “Tsaynashi patronnin kayno nirqan: ‘Nänikunapa y chakrakunapapis aywarkur tarishqayki runakunata imanöpapis pushamuy wayïman juntananyaq. 24 Noqa kaynömi nï: Puntata qayatsishqä runakunaqa yanukatsishqä mikuyta manami yawapäkunqatsu’ ”.
Discïpulun kananpaq Jesús yachatsishqan
25 Atska runakuna qatirpaptinmi Jesús kayno nirqan: 26 “Pipis discïpulü kayta munarqa mamanta, taytanta, warminta, tsurinkunata, wawqinkunata, paninkunata y kikinpa vïdanta kuyashqanpita noqata mas kuyamätsun. Tsayno mana kuyamarqa manami discïpulü kanmantsu. 27 Cruzninta apaqno mana qatirämarqa* manami discïpulü kanmantsu.*
28 “Mayqaykipis wayita ruranaykipaqqa shumaqraqmi yarpachakunki qellayniki aypashqanta o mana aypashqantapis. 29 Cimientuta ruraykular kachariptikiqa lapan rikaqkunami jamurpäshunki kayno nir: 30 ‘¡Kay runaqa manapis puëdiykarmi wayi ruratsiyta qalaykatsishqa!’
31 “Mayqan reypis juk nacionwan manaraq pelyar ¿manaku puntataqa shumaqraq yarpachakun kayno nir: ‘Ishkay chunka waranqa (20,000) soldädukunata chunka waranqa (10,000) soldäduläwan vincishaqtsuraq o manatsuraq’? 32 Mana vincinanpaq kashqanta tantiyarqa contran rey karulachöraq kaykaptinmi wilakuqkunata kachan manana pelyapäkunanpaq. 33 Tsaynölami mayqaykipis noqa rayku imaykikunatapis mana kacharirqa discïpulü kankimantsu”.
Kachiman Jesús tinkutsishqan
34 “Kachiqa alimi kaykan. Qamyakäkurmi itsanqa imapaqpis mana välinnatsu. 35 Chakrapaqpis ni chulpapaqpis manana väliptinmi jitariykuntsina. ¡Rinriyuq kaqkunaqa nishqäkunata wiyakäritsun!”