Romanos
Wakin Israel runakunala salvakushqan
11 Israel runakunata ¿Tayta Dios kachariykushqatsuraq? ¡Manami! Noqapis Abraham aylu kar Benjamín trïbupita Israel runami kaykä.* 2 Israel runakunata Tayta Dios manami kachaykushqatsu. Paykunataqa unaypita patsami akrashqa kuyashqan runakuna kananpaq. ¿Manaku musyapäkunki Tayta Diospa palabran Elíaspita imata nishqantapis? Israel mayinkunapaq lakikushpan Tayta Diosta manakur Elías kayno nirqan: 3 “Tayta Dios, lapan profëtaykikunatami wanutsishqa. *Altarnikikunatapis juchutsirmi ushashqa. Japalänami kawaykar quëdashqä. Kananqa noqatapis wanutsimänanpaqnami ashirkaykäman”.*
4 Elías tsayno niptinmi Tayta Dios kayno nirqan: “Manami yarpashqaykinötsu kaykan. Qanchis waranqa (7,000) runakunatami akrashqä Baalta imaypis mana adorapäkunanpaq”.*
5 Elías kawashqan witsannömi kananpis wakin Israel runakuna Tayta Diosta sirvirkaykan. Tsayno sirvirkaykan Tayta Dios kuyapar akrashqanpitami. 6 Manami imatapis alita rurapäkushqanpitatsu akrarqan, sinöqa jutsayuq kaptinpis kuyapäkuq karmi akrarqan. Alita rurashqanpita akrarqa manami kuyapäkuq kartsu akranman karqan.
7 Tsaymi akrashqan kaq Israel runakunala salvacionta taripäkun. Wakin kaq Israel runakunaqa salvacionta ashirpis manami tarintsu. Paykunapa shonquntami Tayta Dios chukruyätsirqan wilakuyninta mana chaskikärinanpaq. 8 Tayta Diospa palabranchöpis kaynömi qelqaraykan:
“Pasaypa mana tantiyakuq kananpaqmi Tayta Dios upatakätsishqa.
Tsaymi kananyaqpis paykunaqa rikaykarpis mana rikaqno karkaykan
y wiyaykarpis mana wiyaqno karkaykan”.*
9 Tsayno kaqkunapaqmi rey Davidpis Tayta Diosta manakur kayno nirqan:
“Fiestacho mikupäkushqanpis paykunapaq trampa kaykulätsun.
Bendicionnikita churamunaykipa trukanqa castigaykulay.
10 Paykunapa nawinkunapis qaprayätsun.
Imaypis mana derechakänanpaq waqtankunapis kurkuyätsun”.*
Mana Israel runakunapis salvakushqan
11 Israel runakunaqa ¿manatsuraq imaypis Jesucristuta chaskikunqa? ¡Aw, chaskikunqami! Mana Israel runakunatapis Tayta Dios salvaykaqta rikarmi Israel runakunapis tantiyakunqa Jesucristuta chaskikärinanpaq. 12 Tsayno kaptinpis Jesucristuta mana chaskikäriptinmi mana Israel runakunana Jesucristuta chaskikur salvakurkaykan. Paykuna salvakurkaykashqan kushikuypaq kaptinpis Israel runakuna salvakuptinqa masraqmi kushikuypaq kanqa.
13 Mana Israel runakuna, shumaq tantiyakäriy. Tayta Dios churamashqa *apostolnin kar mana Israel runakunaman imaykanöpapis ali wilakuyninta apanäpaqmi. 14 Tsaymi wilakü mana Israel runakuna salvakuqta rikashpan Israel mayïkuna wakilanpis Jesucristuta chaskikur salvakärinanpaq. 15 Israel runakuna Jesucristuta mana chaskikuptinpis mana Israel runakunaqa maytsaychömi Jesucristuta chaskikurkaykan. Paykunapis salvashqa karmi wanushqano kashqanpita kawarimushqanöna karkaykan.
Mana Israel runakuna mana alabakunanpaq yätsishqan
16 Mäsata rakirkur *primiciata Tayta Diospaq apaptinqa lapan mäsapis *sagrädumi kaykan. Tsaynölami yörapa sapin sagrädu kaptinqa rämankunapis sagrädu kaykan. 17 Israel runakunapis sagrädu kaykarmi Jesucristuta mana chaskikushpan olïvu yörapita muturishqano karkaykan. Qamkunaqa olïvu yöraman injertashqanönami karkaykanki. Tsaymi sacha olïvupa rämankunano kaykarpis tsay ali olïvu yörapa sapinpita salvacionta chaskirkaykanki.*
18 Olïvu yöraman injertashqano kaykarqa ama alabakäriytsu Israel runakunapita mas väliq kashqaykita. Manami rämatsu yörata kawayta qon, sinöqa sapinmi. 19 Capazchari qamkuna kayno nirkaykanki: “Imano kaptinpis Israel runakunaqa mutushqa rämakunanömi karkaykan. Paykunata salvananpa trukanqa noqakunatanami Tayta Dios salvarkaykäman”.
20 Tsay nishqaykinölami kaykan. Tsayno kaptinpis muturishqa rämano karkaykan Jesucristuman mana yärakärishqanpitami. Qamkunaqa injertashqano karkaykanki Jesucristuman yärakärishqaykipitami. Qamkunapis Tayta Diosta mana cäsukurqa paqta mutushqa rämano rikakunkiman. 21 Legïtimu olïvupa rämanno kaykaptinpis mana cäsukuq Israel runakunata Tayta Dios manami salvantsu. Paykunatapis mana salvaykarqa qamkunatapis mana cäsukuptikiqa manami salvashunkipaqtsu.
22 Tayta Dios kuyapäkuq y castigakuq kashqanta tantiyakäriy. Mana cäsukuqkunataqa castiganmi. Cäsukuqkunatami itsanqa kuyapar salvan. Kuyapäshushpaykipis mana cäsukuptikiqa qamkunatapis rämatanömi muturishunki. 23 Tsaynölami Jesucristuman yärakuptinqa Israel runakunatapis yöraman injertashqa rämano kananpaq Tayta Dios kuyapar salvanqa. Payqa munayniyuqmi kaykan yöraman yapay injertananpaqpis.
24 Mana Israel runa karmi qamkunaqa sacha olïvupa rämanno karkaykanki. Tsayno kaykaptikipis Jesucristuta chaskikäriptikimi Tayta Dios salvashushqanki. Israel runakuna legïtimu olïvupa rämanno kaykaptinqa Jesucristuta chaskikäriptinmi paykunatapis salvanqa.
Israel runakunapis salvakunanpaq nishqan
25 Wawqi panikuna, mana alabakunaykipaqmi runakuna mana musyashqanta kanan wilashayki. Wakin Israel runakuna kanan chukru shonqu karpis manami tsaynölatsu kanqa. Paykuna tsayno kanqa mana Israel runakunapita Tayta Dios akrashqankunata salvananyaqlami. 26 Tsaypitanami lapan Israel runakunapis salvakärinqa. Tayta Diospa palabranchöpis kaynömi qelqaraykan:
“Salvakuqmi *Siónpita shamunqa.
Jacobpita miraqkunatami tantiyatsinqa jutsankunata kacharinanpaq.*
27 Jutsa rurashqanta perdonarmi paykunawan *pactuta rurashaq”.*
28 Tsayno kaptinpis kananqa Israel runakuna Jesucristupa ali wilakuyninta manami chaskikuyta munapäkuntsu. Tayta Diospa contran kaptinmi paykunapa trukan qamkunatana salvarkaykäshunki. Tayta Diospa contran kanan kaykaptinpis Abrahamta, Isaacta y Jacobta promitishqanta cumplirmi Israel runakunata imaypis kuyaykan. 29 Tayta Dios imatapis promitirqa cumplinmi. Pitapis salvananpaq akrarqa imaypis salvanmi.
30 Nawpataqa manami Tayta Diosta cäsukurqaykitsu. Kananqa Israel runakunanami mana cäsukärintsu. Tsaymi paykunapa trukan Tayta Dios qamkunatana kuyapaykäshunki. 31 Tsayno kuyapaykäshunki Israel runakunatapis tantiyakuptin Tayta Dios kuyapar salvananpaqmi. 32 Tsaymi juk tiempucho Israel runakuna mana cäsukuq kananpaq yarpayninkunata Tayta Dios upatakätsirqan y juk tiempuchönami mana Israel runakunapis mana cäsukuq kananpaq yarpayninkunata upatakätsirqan. Tsaymi Israel runakunatapis y mana Israel runakunatapis kuyapäkuq kayninwanraq salvan.
33 ¡Tayta Dios pasaypa yachaq y tantiyaqmi kaykan!
¡Pay yarpashqankunata y rurashqankunata manami pipis tantiyayta kamäpakuntsu!*
34 Tayta Dios yarpashqankunata ¿pilaqa musyantsuraq?
Yachaq kananpaq ¿pilaqa payta yachatsintsuraq?*
35 Diosta mandananpaq ¿piraq munayniyuq kanman?*
36 Lapantapis Tayta Diosmi kamashqa.
Pay munaptinmi lapan imaykapis kaykan.
Lapanpis paylapami kaykan.*
¡Imayyaqpis Tayta Dios alabashqa kaykulätsun!
Amén.