Gálatas
Lutan yachatsikuqkunata mana chaskipänanpaq nishqan
5 Jesucristo salvamaptintsimi *Moisés qelqashqan leykunapa munaynincho kashqantsipita librina kaykantsi.* Tsayno kaykaptinqa tsay leykunata cumplinaykipaq obligashuptiki ama cäsupäkuytsu. 2 Noqa kaynömi nï: *Señalakuptikiraq Tayta Dios salvashushqaykita yarpaptikiqa Jesucristuman yärakushqaykipis manakaqlapaqmi kaykan. 3 Yapaypis kaynömi nï: Pipis señalakuq kaqqa Moisés qelqashqan leykunata lapantaraqmi cumplinman. 4 Tsay leykunata cäsukur pipis salvakuyta munarqa Jesucristupita y Tayta Diospa kuyakuyninpitapis witikärishqami.
5 Noqantsimi itsanqa Espíritu Santu tantiyatsimaptintsi musyantsi Jesucristuman yärakur salvakunantsipaq kashqanta. 6 Jesucristuta chaskikushqa kaptintsiqa manami señalakushqa kashqantsitsu ni mana señalakushqa kashqantsitsu välin, sinöqa payman yärakur kuyanakur kawashqantsimi.
7 Jesucristuman yärakushpaykiqa alimi karqayki. ¿Pitaq shimita jatipäshushqanki rasunpa kaq wilakuyta mana cäsukunaykipaq? 8 Paykuna yachatsishqanqa manami qayamaqnintsi Tayta Diospitatsu kaykan. 9 Tsay lutan yachatsikuyqa levadüra mäsata jakatsishqannömi kaykan.* 10 Tayta Diostami manakuykä lutan yachatsikuqkunata manana chaskipänaykipaq. Tsay runakunataqa pï kaptinpis Tayta Diosmi juzganqa.
11 Wawqi panikuna, señalakärinanpaq yachatsiptïqa manami pipis qatikachaykämanmantsu ni Jesucristo noqantsi rayku cruzcho wanushqanta wilakushqäpita chikimanmantsu. 12 “Señalakurraqmi salvakärinki” nir yachatsishuqnikikunaqa penqayninta sapipita chipyaq kutsuriykutsun.
Espíritu Santupa makincho kawanantsipaq yachatsishqan
13 Wawqi panikuna, Tayta Dios qayashushqanki librina kapäkunaykipaqmi. Librina karpis jutsata ama rurapäkuytsu, sinöqa jukniki juknikipis kuyanakur yanapanakäriy.* 14 Diospa leynincho kaynömi niykan: “Kikiki kuyakushqaykino runa mayikita kuyapäkunki”.
Tsay nishqanta cäsukurqa lapan leyninkunatami cumplirkaykanki.* 15 Tsayno kaykaptinqa cuidädu chikinakärinkiman. Chikinakurqa jaqayätsinakur qarqunakunkipaqmi.
16 Tsaymi kayno nï: Espíritu Santu tantiyatsishushqaykino kawapäkuy. Tsayno kawarqa manami shonquyki munashqanno jutsata rurapäkunkipaqtsu.* 17 Lutan yarpaykunaqa Espíritu Santupa contranmi kaykan y Espíritu Santunami lutan ruraykunapa contran. Tsaymi ishkan apänakuptin alita rurayta munarpis mana kamäpakärinkitsu.* 18 Espíritu Santu tantiyatsishushqaykita cäsukurqa manami leykunapa munayninchönatsu karkaykanki.*
19 Lutan yarpashqankunata ruraqkunaqa [majanta jarukärin,] *fornicación jutsata rurapäkun, melanaypaq kaqkunata rurapäkun, shanaripakur jutsata rurapäkun, 20 ïdulukunata adorapäkun, runa mayinta brüjutsipäkun, runa mayinta chikipäkun, rimanakärin, cëlanakärin, imalapitapis rabyakärin, nanaparänakun, qarqunakärin, jaqayätsinakun, 21 envidiösu kapäkun, [runa mayinta wanutsipäkun,] upyalaman churakan, shinkakurkur lutankunata rurapäkun y tsaynölami ima jutsatapis rurapäkun. Nawpata nishqänölami kananpis kayno nï: Tsayno kawaqkunaqa Tayta Dios *mandaykashqanman manami chayanqatsu.
22 Espíritu Santupa munaynincho kawarmi itsanqa kuyanakuntsi, kushikuntsi, jawka kawantsi, pacienciakuntsi, ali shonqu kantsi, yanapakuq kantsi, awnishqantsita cumplintsi, 23 humildi kantsi y alilata ruranantsipaq tantiyakuntsi. Tsayno kawarqa manami ima leytapis manakaqman churaykantsitsu.
24 Jesucristupana karmi unay kawaynintsita cruzcho wanutsishqantsina.* Tsaymi jutsa ruraykuna yarpaynintsiman shamuptinpis mana chaskipantsinatsu. 25 Espíritu Santupa munaynincho kaykarqa pay tantiyatsimashqantsino kawashun. 26 Tsayno kawarqa pitapis rabyanätsir ama runa tukushuntsu ni envidiösu kashuntsu.