Isaías
4 Tsay witsanqa walkalanami kawaykar quëdaqkuna kanqa. Tsaymi qanchis warmikuna juk runalata ruwakur kayno nipäkunqa: “Mikupäkunäpaq kikïkunami arukärishaq. Röpäkunatapis kikïkunami rurakärishaq. Itsanqa japala kashqäpita pipis mana jamurpämänanpaq noqakunapapis runä kaykulay”.
Shamuq watakunacho kushishqa kawananpaq nishqan
2 Tsay witsanmi TAYTA DIOS tsintsitsimushqan kuyaylapaq y kushikuypaq kanqa.
Mikuy ali poquptinmi kawaykar quëdaqkuna kushishqa y respitashqa kanqa.
3 Tsaymi *Sión jirkancho quëdaqkunapaq y Jerusaléncho kachaykushqan kaqkunapaq runakuna kayno nipäkunqa:
“Paykunaqa Tayta Diosta sirviq *santu runakunami karkaykan”.
Tsay nishqannömi kanqa Jerusaléncho padrunashqa kaqkuna.
4 Jerusalén runakunata Tayta Dios castigarmi jutsa ruraq kashqanpita y wanutsikuq kashqanpita maylanqa.
5 Nirkurmi yana pukutayta yuritsimur Sión jirkanta y tsaycho juntaraykaq runakunata lantupanqa.
Tsay pukutaymi jatun toldu mashtaraqno paykunata tsapanqa.
Tsakaypanami fiyupa atsikyaq ninata yuritsimunqa.
Tsay jananpami Tayta Diospa chipchipyaynin kaykanqa.
6 Tsaynöpami fiyupa shanaypis mana rupanqatsu
ni tamyapis mana ushmanqatsu
ni shukukuy wayrapis mana apanqatsu.